មន្ត្រីរដ្ឋបាលព្រៃឈើខេត្តឧត្តរមានជ័យ បានឲ្យដឹងថា មេបញ្ជាការយោធាប្រចាំតំបន់បានយល់ព្រមសហការជាមួយរដ្ឋបាលព្រៃឈើ ដើម្បីដាក់បញ្ជាឲ្យទាហានមួយចំនួនដែលចូលទៅសង់ខ្ទមរុករានកាន់កាប់ដីព្រៃសហគមន៍រំដួលវាសនាក្នុងភូមិសាស្ត្រក្រុងសំរោងកន្លងមកនោះ ត្រូវរុះរើចាកចេញឲ្យអស់ពីតំបន់ព្រៃការពារទាំងនោះវិញ។
នាយកផ្នែករដ្ឋបាលព្រៃឈើប្រចាំខេត្តឧត្តរមានជ័យ លោក ឃុន សុភា បានមានប្រសាសន៍កាលពីរសៀលថ្ងៃសុក្រ ទី១២ ខែមីនាថា កាលពីថ្ងៃព្រហស្បតិ៍ (១១ មីនា) មន្ត្រីរដ្ឋបាលព្រៃឈើបានចុះទៅជួបពន្យល់មេបញ្ជាការយោធាប្រចាំតំបន់ប្រតិបត្តិការសឹករងក្រុងសំរោងឲ្យបានយល់ពីតំបន់ព្រៃសហគមន៍រំដួលវាសនាដែលរដ្ឋាភិបាលបានការពារ ហើយមេបញ្ជាការយោធាតំបន់នោះបានយល់ និងបានសហការក្នុងការបញ្ជាឲ្យពលទាហានក្រោមឱវាទរុះរើខ្ទមចំនួន៣៥ខ្នងដែលសាងសង់ខុសច្បាប់ចេញពីតំបន់ព្រៃសហគមន៍។
លោក ឃុន សុភា មានប្រសាសន៍ដូច្នេះ ៖ «ទាហានទាំងអស់មាន៣៧ ប៉ុន្តែទាហានក្នុងអង្គភាពគាត់៣៥ ឯ២ទៀតមិនដឹងអ្នកណា។ ដោយឡែករឿងប្រជាពលរដ្ឋនៅតំបន់នោះអាហ្នឹងរឿងរបស់អាជ្ញាធរផ្សេងវិញ។ យើងចុះកិច្ចសន្យាអីជាមួយគ្នា ធ្វើកំណត់ហេតុសព្វគ្រប់ហើយ ខ្ញុំនៅតែធ្វើរបាយការណ៍មួយជូនមកខាងរដ្ឋបាលព្រៃឈើហ្នឹង ហើយនឹងចម្លងជូនខេត្តក្រុងឲ្យលោកដឹង»។
មេបញ្ជាការយោធានៃតំបន់ប្រតិបត្តិការសឹករងប្រចាំក្រុងសំរោង លោកវរសេនីយ៍ត្រី ហ៊ាន សុខ បានមានប្រសាសន៍ថា លោកហ៊ានអះអាងឲ្យទាហានរបស់លោកទាំងអស់ដែលបានចូលទៅសង់ទីលំនៅខុសច្បាប់ត្រូវចេញពីព្រៃសហគមន៍។ មន្ត្រីយោធាដដែលបានមានប្រសាសន៍ថា ការបញ្ជាឲ្យទាហានចាកចេញពីដីព្រៃសហគមន៍នោះ គឺជាកិច្ចសហការគ្នាដើម្បីរក្សាព្រៃឈើរបស់រដ្ឋ។
លោក ហ៊ាន សុខ បានឲ្យដឹងថា ៖ «នៅលើដីនោះនឹងរុះរើចេញនិងឈប់ឲ្យកសាងបន្ថែម។ ឥឡូវយើងសហប្រតិបត្តិការ អ្វីដែលពាក់ព័ន្ធនឹងការហាមឃាត់របស់ស្ថាប័នរដ្ឋ គឺកងទ័ពត្រូវចូលរួម»។
ចំណែកមេបញ្ជាការយោធាប្រចាំតំបន់ប្រតិបត្តិការសឹកខេត្តឧត្តរមានជ័យ លោកឧត្តមសេនីយ៍ ម៉ុក សុវណ្ណ បានមានប្រសាសន៍ថា លោកយល់ស្របនឹងការសម្របសម្រួលគ្នារវាងមន្ត្រីរដ្ឋបាលព្រៃឈើជាមួយទាហានរបស់លោកឲ្យចាកចេញពីព្រៃសហគមន៍នោះ ៖ «ធ្វើអ៊ីចឹងហើយ សម្របសម្រួលគ្នាហើយមិនអីទេណា»។
កាលពីថ្ងៃទី៤ ខែមីនាកន្លងមក ទាហានមួយក្រុមក្នុងវរសេនាធំលេខ១ ក្រោមការគ្រប់គ្រងរបស់តំបន់ប្រតិបត្តិការសឹករងក្រុងសំរោង បានប្រើអាវុធបាញ់រះទៅលើមន្ត្រីរដ្ឋបាលព្រៃឈើ និងបានចាប់ខ្លួនក្រុមសហគមន៍ការពារព្រៃឈើវាយដំលើរាងកាយ បណ្តាលឲ្យរងរបួស៥នាក់នៅពេលដែលក្រុមមន្ត្រីចម្រុះបានចុះទៅសហគមន៍ព្រៃឈើរំដួលវាសនា ដើម្បីធ្វើកិច្ចសន្យាជាមួយប្រជាពលរដ្ឋនិងគ្រួសារទាហានជាង១៥០គ្រួសារឲ្យរុះរើលំនៅខុសច្បាប់ចេញពីតំបន់ព្រៃការពារ។
ក្រុមសហគមន៍ការពារព្រៃឈើបានឲ្យដឹងថា កាលពីពេលថ្មីៗគេបានដាក់ពាក្យបណ្តឹងទៅតុលាការខេត្តសៀមរាប ប្រឆាំងអំពើហិង្សារបស់ទាហានទាំងនោះនឹងទារសំណងជំងឺចិត្តជាប្រាក់១០០លានរៀលផង៕