ទាហានខ្មែរមួយចំនួននៅតំបន់ភ្នំចាក់ច្រែងកើតជំងឺគ្រុនចាញ់
ដោយ សាវយុត
2009-07-08
កងទាហានខ្មែរដែលការពារនៅតំបន់ជម្លោះព្រំដែនខ្នងភ្នំចាក់ច្រែង ចម្ងាយប្រមាណ១៧គីឡូម៉ែត្រភាគខាងជើងឈៀងខាងលិចពីប្រាសាទព្រះវិហារ បានឲ្យដឹងថា ពួកគេខ្លះកំពុងទទួលរងជំងឺគ្រុនចាញ់ដែលអាចបណ្តាលមកពីភ្លៀងធ្លាក់ខ្លាំង ធាតុអាកាសត្រជាក់និងការប្រើទឹកមិនស្អាតដែលដក់នៅតាមខ្នងភ្នំនោះ។
ថ្ងៃ១៥ វិច្ឆិកា ២០០៨: ទាហានខ្មែរនៅខ្សែត្រៀមជួរមុខនៃតំបន់ប្រាសាទព្រះវិហារ ក្នុងខែត្រព្រះវិហារ។
តាមពលទាហានមួយរូបដែលសុំមិនបញ្ចេញឈ្មោះក្នុងកងវរលេខ៨២នៃកងពលលេខ៨ដែលកំពុងប្រចាំការនៅតំបន់ជម្លោះព្រំដែនលើខ្នងភ្នំចាក់ច្រែង បានមានប្រសាសន៍កាលពីព្រឹកថ្ងៃពុធ ទី៨ ខែកក្កដា ថា ទាហាននៅក្រុមរបស់គាត់មួយចំនួនកំពុងកើតជំងឺគ្រុនចាញ់។
ទាហានដដែលបានមានប្រសាសន៍ទៀតថា គ្រប់ទាហានទាំងអស់ដែលកំពុងការពារព្រំដែននៅតំបន់ចាក់ច្រែងសុទ្ធតែមានមុងចងដេកនៅពេលយប់ ក៏ប៉ុន្តែនៅតែកើតជំងឺគ្រុនចាញ់ ប្រហែលបណ្តាលមកពីការប្រើប្រាស់ទឹកដែលដក់នៅតាមភ្នំដែលលាយឡំជាមួយស្លឹកឈើរលួយនិងធាតុអាកាសត្រជាក់ ៖ «គ្នាឈឺ គ្នាគ្រុនចាញ់ មួយកងខ្ញុំនេះដូចជា៣០-៤០នាក់ ជោះឈាម ដាក់សេរ៉ូមហើយឲ្យឡើងវិញៗ»។
ទាហានខ្មែរម្នាក់ទៀតដែលកំពុងប្រចាំការនៅតំបន់ខ្នងភ្នំចាក់ច្រែងដែរ បានមានប្រសាសន៍ថា គាត់បានគ្រុនញាក់ដោយសារកើតជំងឺគ្រុនចាញ់ ដោយបានទៅឲ្យពេទ្យជោះឈាមពិនិត្យមានកម្រិត២ខ្វែង ៖ «...យប់មិញខ្ញុំញាក់ទៀត ញាក់ម្សិលមិញពេលល្ងាចផង កណ្ដាលយប់ញាក់ទៀត សុំមេចុះទៅជោះឈាមទៅ»។
មេបញ្ជាការជាន់ទាបដែលគ្រប់គ្រងកម្លាំងទាហាននៅតំបន់ជម្លោះផ្ទាល់បានឲ្យដឹងថា ទាំងនាយទាហាននិងពលទាហានមួយចំនួនគឺកំពុងទទួលរងជំងឺគ្រុនចាញ់ ប៉ុន្តែមិនមានចំនួនច្រើនគួរឲ្យព្រួយបារម្ភទេ។
មេបញ្ជាការរងកងវរលេខ៨២ចំណុះឲ្យកងពលលេខ៨ដែលកំពុងគ្រប់គ្រងកងទ័ពខ្មែរនៅតំបន់ខ្នងភ្នំចាក់ច្រែង លោកវរសេនីយ៍ត្រី លី ផុន បានមានប្រសាសន៍ថា មាននាយទាហាននិងពលទាហានមួយចំនួនបានទទួលរងជំងឺគ្រុនចាញ់ដែលអាចបណ្តាលមកពីធាតុអាកាលត្រជាក់ដោយចុះអ័ព្ទខ្លាំង ប្រហែលជាការចុះអ័ព្ទដោយមានទឹកសន្សើមអាចនាំមេរោគគ្រុនចាញ់មកជាមួយ ក៏ប៉ុន្តែមន្ទីរពេទ្យរបស់អគ្គបញ្ជាការកងយោធពលខេមរភូមិន្ទនៃក្រសួងការពារជាតិដែលបោះជំរំនៅជិតតំបន់គ១ មានថ្នាំពិសេសៗគ្រប់គ្រាន់សម្រាប់ទប់ទល់នឹងជំងឺគ្រុនចាញ់នេះ។
លោកវរសេនីយ៍ត្រី លី ផុន បានបញ្ជាក់ថា ៖ «ជំងឺគ្រុនចាញ់ ដោយតំបន់ព្រៃនេះវាសំបូរទៅដោយមេឃចុះអ័ព្ទ ទឹកសន្សើម។ ទឹកសន្សើមនេះហើយដែលនាំមកនូវបាក់តេរីប៉ះពាល់ដល់សុខភាពនាយទាហាន ពលទាហានខ្លះ ប៉ុន្តែខាងអគ្គមេបញ្ជាការខាងក្រសួងការពារជាតិយើងមានថ្នាំពិសេសៗច្រើនជាងនេះទៅទៀត ដែលសម្ដេចតេជោលោកជូនមកដល់កងយោធពលខេមរភូមិន្ទ»។
កងរក្សាព្រំដែនខ្មែរនៅតំបន់ខ្នងភ្នំចាក់ច្រែងបានឲ្យដឹងថា ការប្រឈមមុខដាក់គ្នារវាងទាហានខ្មែរនិងប៉ារ៉ាថៃដែលធ្លាប់តែតានតឹង រហូតមកដល់ថ្ងៃពុធនេះគឺមានភាពធូរស្រាលជាងមុន បន្ទាប់ពីមេបញ្ជាការយោធាជាន់ខ្ពស់ខ្មែរថៃឧស្សាហ៍ជួបប្រជុំដើម្បីបន្ធូរបន្ថយភាពតានតឹង ក៏ប៉ុន្តែកងទាហានប៉ារ៉ាថៃដែលបានបញ្ជូនមកបោះជំរំចូលមកតំបន់ហាមឃាត់មិនឲ្យមានកងទ័ពជាង២ខែមកហើយមិនទាន់មានផែនការដកចេញនៅឡើយទេ៕
អត្ថបទដែលទាក់ទង
- មេបញ្ជាការខ្មែរ-ថៃគ្រោងជួបប្រជុំគ្នាដើម្បីបន្ធូរបន្ថយភាពតានតឹង
- ស្ថានភាពនៅតំបន់ប្រាសាទព្រះវិហារ ថ្ងៃ៧ វិច្ឆិកា
- ស្ថានភាពនៅតំបន់ព្រំដែនខ្មែរ-ថៃ ថ្ងៃ៣១ តុលា
- មន្រ្តីខ្មែរប្រតិកម្មតបនឹងព័ត៌មានថាថៃនឹងប្រើច្បាប់អន្តរជាតិក្នុងករណីថាក់ស៊ីន
- ស្ថានទូតខ្មែរនៅបាងកកទទួលបានការធានាសុវត្ថិភាពពីរដ្ឋាភិបាលថៃ
- រដ្ឋាភិបាល៖ ការទាមទារឲ្យកម្ពុជាដកទ័ពចេញពីតំបន់ប្រាសាទព្រះវិហារគឺខុសច្បាប់
- ក្រសួងការបរទេសប្រកាសឲ្យទូតខ្មែរនៅថៃគិតពីបញ្ហាសុវត្ថិភាព
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.