គណបក្សប្រឆាំងពុំបានសម្ដែងការភ្ញាក់ផ្អើល ឬក៏មានប្រតិកម្មខ្លាំងក្លាចំពោះសមាជិកគណបក្ស សម រង្ស៊ី ចំនួន៨០នាក់ ដែលមានគម្រោងផ្ដាច់ខ្លួនពីគណបក្ស សម រង្ស៊ី ទៅចូលរួមរស់ជាមួយគណបក្សប្រជាជនកម្ពុជា នៅក្នុងខេត្តបាត់ដំបង។ មន្ត្រីបក្សប្រឆាំងចាត់ទុកថា លំហូរនេះមិនអាចមានឥទ្ធិពលគ្របដណ្ដប់លើប្រជាប្រិយភាពរបស់គណបក្ស សម រង្ស៊ី ទេ។
ប្រធានស្ដីទីគណបក្ស សម រង្ស៊ី ប្រចាំខេត្តបាត់ដំបង លោក សោ ចាន់ដេត បានថ្លែងនៅថ្ងៃសៅរ៍ ទី១១ ខែសីហា ថា គណបក្សកាន់អំណាចធ្លាប់បានប្រើប្រាស់យុទ្ធសាស្ត្រនេះច្រើន នាពេលកន្លងមក។ គណបក្សប្រជាជន បានទិញទឹកចិត្តមន្ត្រីគណបក្ស សម រង្ស៊ី បានម្នាក់ ឬពីរនាក់ ប៉ុន្តែពួកគេបានយកប្រជាពលរដ្ឋជាសមាជិករបស់គណបក្សប្រជាជនទៅប្រកាសថា ជាសមាជិកគណបក្ស សម រង្ស៊ី។
លោក សោ ចាន់ដេត៖ «នេះជារឿងធម្មតា ហើយរឿងចាស់អត់មានអីត្រូវភ្ញាក់ផ្អើលទេ។ ហើយគណបក្សកាន់អំណាច គេចង់ធ្វើម៉េចស្រេចគេធ្វើទៅ។ ហៅមនុស្សមក១ពាន់ ១ម៉ឺននាក់ ដែលពលរដ្ឋគេចែកអំណោយឲ្យ ហើយគេថាបក្សនេះបក្សនោះក៏ថាបាន ពីព្រោះគេប្រើប្រាស់ធនធានរដ្ឋ វាអត់មានអីចម្លែក។ ហើយមនុស្សទាំងអស់ គេដឹងហើយថា នេះជាល្បិចកល ជាយុទ្ធសាស្ត្ររបស់គណបក្សប្រជាជន ដើម្បីបំពងសំឡេង អត់ប៉ះពាល់ដល់ការគាំទ្ររបស់គណបក្ស សម រង្ស៊ី ទេ»។
លោក កែវ ជា អតីតប្រធានក្រុមការងារទ្រទ្រង់គណបក្ស សម រង្ស៊ី ស្រុកបាណន់ និងជាសមាជិកក្រុមប្រឹក្សាខេត្តបាត់ដំបង បានថ្លែងថា សមាជិកគណបក្ស សម រង្ស៊ី ចំនួន៨០នាក់ នៅស្រុកបាណន់ បានផ្ដាច់ខ្លួនពីគណបក្ស សម រង្ស៊ី ទៅចុះចូលជាមួយគណបក្សប្រជាជនកម្ពុជា។ ក្នុងចំណោមសមាជិកទាំង៨០នាក់នោះ មាន៣នាក់ជាមន្ត្រីក្រុមប្រឹក្សាឃុំ។ លោកថា មូលហេតុដែលអ្នកគាំទ្រគណបក្ស សម រង្ស៊ី ចូលជាមួយគណបក្សប្រជាជន គឺដោយសារពួកគេអស់ជំនឿលើគណបក្សប្រឆាំង។
លោក កែវ ជា៖ «ក្នុងគណបក្សហ្នឹង គ្មានយុត្តិធម៌ គ្មានសច្ចធម៌ទេ។ គេរកមនុស្សណាដែលមានលុយយកមកធ្វើ។ អ្នកណាអត់លុយ គេខំតស៊ូ បោះបង់ ដកគេចោល ដោយគ្មានគោលការណ៍ច្បាស់លាស់ណាមួយ ដែលបញ្ជាក់ថា ជាគោលការណ៍របស់គណបក្សទេ។ ជាពិសេស ខ្ញុំផ្ទាល់ ខ្ញុំខំធ្វើនៅគណបក្សនេះតាំងពីឆ្នាំ១៩៩៥ ខ្ញុំជាស្ថាបនិករបស់គណបក្ស តែទីបំផុត គេអត់មើលឃើញខ្ញុំ គេបោះបង់ខ្ញុំចោល។ ខ្ញុំតស៊ូអស់ទាំងលុយ ទីបំផុតគេអត់មើលឃើញយើង»។
ប៉ុន្តែ ប្រធានស្ដីទីគណបក្ស សម រង្ស៊ី ប្រចាំខេត្តបាត់ដំបង លោក សោ ចាន់ដេត បានច្រានចោលការចោទប្រកាន់ និងការអះអាងរបស់លោក កែវ ជា។ លោកថា គណបក្ស សម រង្ស៊ី ពុំបានរើសអើងអ្នកមាន អ្នកក្រទេ។ ជាក់ស្ដែង ដូចរូបលោកផ្ទាល់ ជាអ្នកក្រីក្របំផុត។ ប៉ុន្តែដោយសារលោកខិតខំធ្វើការស្មោះត្រង់និងបក្ស ជួយជាតិមាតុភូមិ ទើបគណបក្សផ្ដល់ទំនុកចិត្តឲ្យ៖ «លោក កែវ ជា ប្រៀបធៀបនឹងខ្ញុំ ខ្ញុំមិនមែនជាអ្នកមានឯណា។ សូម្បីតែដីមួយចំអាម ខ្ញុំពុំមានផង។ អ៊ីចឹង អ្វីដែលលោក កែវ ជា លើកឡើងជារឿងខុសស្រឡះ»។
ទោះជាយ៉ាងនេះក្តី សមាជិកគណបក្ស សម រង្ស៊ី ទាំង៨០នាក់ នឹងប្រកាសចូលគណបក្សប្រជាជនជាផ្លូវការ នៅពេលឆាប់ៗខាងមុខនេះ ដោយមានការទទួលស្វាគមន៍ពីមន្ត្រីគណបក្សប្រជាជន។ ការចុះចូលនេះ លោក កែវ ជា បានអះអាងថា គណបក្សប្រជាជនកម្ពុជា ពុំបានសន្យាផ្ដល់តួនាទីអ្វី ឬក៏មានការទិញទឹកចិត្តនោះទេ។ ប៉ុន្តែ ពួកគាត់មើលឃើញថា គណបក្សប្រជាជនដឹកនាំប្រទេសមានការអភិវឌ្ឍ ការពារទឹកដី ជាពិសេសនៅបាត់ដំបង គាត់ឃើញជាក់ស្ដែង ដូចជាទំនប់កង្ហត មានប្រព័ន្ធប្រឡាយឆ្វាត់ឆ្វែង។ លោកនាយករដ្ឋមន្ត្រី ហ៊ុន សែន ថ្មីៗនេះបានថ្លែងនៅរដ្ឋសភាដោយបានអន្ទងអូសទាញឲ្យគណបក្សប្រឆាំងរួបរួមជាមួយគណបក្សប្រជាជនកម្ពុជា។
មន្ត្រីអង្គការសង្គមស៊ីវិលមើលឃើញថា នេះជាសារនយោបាយមួយដើម្បីអូសទាញអ្នកគាំទ្រពីគណបក្សនយោបាយ ទៅចូលគណបក្សនយោបាយមួយទៀត។ ទាក់ទងនឹងសមាជិកគណបក្ស សម រង្ស៊ី នៅក្នុងខេត្តបាត់ដំបង ចំនួន៨០នាក់ ទៅចូលជាមួយគណបក្សប្រជាជនកម្ពុជានេះ លោក ស៊ុន តឹក ប្រធានអង្គការលីកាដូ ខេត្តបាត់ដំបង ថ្លែងថា ករណីនេះជាសិទ្ធិនយោបាយរបស់ប្រជាពលរដ្ឋ។ ប៉ុន្តែ លំហូរនៃការចុះចូលនេះ តិច ឬច្រើន វាបានបង្ហាញឲ្យឃើញពីការបែកបាក់គ្នា ហើយវានឹងមានផលប៉ះពាល់ទៅដល់ប្រជាប្រិយភាពរបស់គណបក្ស សម រង្ស៊ី នៅគ្រាដែលការបោះឆ្នោតជ្រើសរើសតំណាងរាស្ត្រនឹងចូលមកដល់ នៅឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។