កូនប្រុសបារម្ភពីសុខភាពម្ដាយដែលកើតអេដស៍ហើយជាប់ពន្ធនាគារ
ដោយ មណ្ឌលកែវ
2009-10-17
កូនប្រុសរបស់អ្នកស្រី មូល លន់ ជនជាប់ចោទក្នុងរឿងក្តីទំនាស់ដីធ្លីនៅខេត្តកំពត បានសម្ដែងពីការព្រួយបារម្ភចំពោះសុខភាពម្តាយនៅពេលដែលគាត់ពុំអាចយកថ្នាំពន្យារជីវិតទៅឲ្យម្តាយគាត់នៅក្នុងពន្ធនាគារ។
លោក សែម ប្រុស កូនប្រុសបង្កើតរបស់អ្នកស្រី មូល លន់ បានប្រាប់វិទ្យុអាស៊ីសេរីនៅព្រឹកថ្ងៃសុក្រ ទី១៦ តុលា ថា លោកមានការព្រួយបារម្ភចំពោះសុខភាពម្តាយ ដោយគាត់មានជំងឺប្រចាំកាយគឺជំងឺអេដស៍អស់រយៈពេលជាច្រើនឆ្នាំ។ គាត់ត្រូវលេបថ្នាំជាប្រចាំថ្ងៃយ៉ាងទៀងទាត់។ បច្ចុប្បន្នគាត់ត្រូវជាប់ក្នុងពន្ធនាគារដែលលោកមិនអាចចូលសួរសុខទុក្ខដើម្បីផ្តល់ថ្នាំឲ្យគាត់លេបជាទៀងទាត់បានដូចពេលមុនៗ។
លោក សែម ប្រុស បានឲ្យដឹងថា ៖ «ព្រឹកហ្នឹងមិនដឹងគេឲ្យគាត់លេបទៀងទាត់ដែរឬក៏ម៉េចមិនដឹង ខ្ញុំអត់បានជួបមុខគាត់ផ្ទាល់ផង។ សុំគេជួប គេថាបើជួបមុខផ្ទាល់គេទារ១០ម៉ឺន(រៀល) ហើយខ្ញុំអត់លុយ អ៊ីចឹងខ្ញុំបានត្រឹមតែផ្ដាំផ្ញើតាមគេទៅ»។
អ្នកស្រី មូល លន់ ត្រូវបានប៉ូលិសចាប់ខ្លួនតាមអំណាចនៃដីការបស់តុលាការខេត្តកំពតពីបទប្រើប្រាស់ឯកសារក្លែង កាលពីថ្ងៃអង្គារ ទី១៣ តុលា នៅទីដែលគាត់លាក់ខ្លួនឯទីក្រុងភ្នំពេញ ដើម្បីព្យាបាលជំងឺនិងដើម្បីប្រើឱកាសតតាំងចំពោះរឿងក្តីទំនាស់ដីធ្លី ដែលគាត់ត្រូវចាញ់ក្តីនៅឯសាលាដំបូងខេត្តកំពត ហើយដែលគាត់បានចោទប្រកាន់ថា ការកាត់ក្តីនេះមានភាពអយុត្តិធម៌ចំពោះគាត់។
ទោះបីជាយ៉ាងនេះក្តី មន្ត្រីអង្គការលីកាដូប្រចាំខេត្តកំពត គឺអ្នកស្រី ង៉ែត សូសែន ដែលបានទៅជួបជាមួយលោក ឯម បូ អនុប្រធានពន្ធនាគារខេត្ត បានបញ្ជាក់ពីមូលហេតុដែលលោកមិនអនុញ្ញាតឲ្យកូនរបស់អ្នកស្រី មូល លន់ យកថ្នាំទៅឲ្យដោយផ្ទាល់ ប្រាប់វិទ្យុអាស៊ីសេរីយ៉ាងដូច្នេះថា ៖ «ខាងពន្ធនាគារគាត់បានទទួលហើយ ហើយគាត់បានឲ្យមីងហ្នឹងលេបទៅតាមវេជ្ជបញ្ជា ប៉ុន្តែមិនអាចឲ្យយកទៅទុកទាំងអស់ ទាំង៣កំប៉ុងហ្នឹងទេ ព្រោះវាទាក់ទងទៅនឹងសុវត្ថិភាពអ្នកជាប់ឃុំ»។
ប្រធានអង្គការលីកាដូ អ្នកស្រី ពុង ឈីវកេក មានប្រសាសន៍ថា ៖ «ជនគ្រប់រូប ទោះបីជាមានទោសមានអីនៅក្នុងពន្ធនាគារ ក៏មានសិទ្ធិនឹងទទួលមេធាវី ទទួលបងប្អូន គ្រួសារ មិត្តភ័ក្តិអី ដែលចង់ទៅសួរសុខទុក្ខ គឺត្រូវតែផ្ដល់សិទ្ធិនេះទៅដល់ជនដែលនៅក្នុងពន្ធនាគារ។ សិទ្ធិហ្នឹងមិនអាចបំបិទបានទេ។ អ៊ីចឹងបើកូនយកថ្នាំទៅ ត្រូវតែខាងពន្ធនាគារអនុញ្ញាតឲ្យកូនហ្នឹងផ្ដល់ថ្នាំហ្នឹងឲ្យដល់ដៃម្ដាយ»។
កាលពីថ្ងៃទី១៥ កញ្ញាកន្លងទៅ នាយកដ្ឋាននគរបាលព្រហ្មទណ្ឌក្រសួងមហាផ្ទៃបានផ្ញើលទ្ធផលនៃការស្រាវជ្រាវទៅជូនព្រះរាជអាជ្ញាអមសាលាដំបូងខេត្តតាកែវ ដោយបញ្ជាក់ថា ឯកសារដែលភាគីដើមបណ្តឹងយកទៅប្រើក្នុងរឿងក្តីដែលបណ្តាលឲ្យអ្នកស្រី មូល លន់ ចាញ់ក្តីនៅសាលាដំបូងខេត្តកំពត គឺជាឯកសារក្លែងបន្លំ។
លោកមេធាវី សុក សំអឿន មានប្រសាសន៍ថា ឯកសារសន្និដ្ឋានរបស់ក្រសួងមហាផ្ទៃអាចជួយឲ្យអ្នកស្រី មូល លន់ មានសិទ្ធិប្តឹងទៅតុលាការកំពូលដើម្បីលុបសាលក្រមសម្រេចរបស់សាលាដំបូងខេត្តកំពតបាន និងអាចឈានទៅដល់ការជំនុំជម្រះក្តីសាឡើងវិញផងដែរ៕
អត្ថបទដែលទាក់ទង
អាជ្ញាធរខែត្រកំពង់ធំចាប់ខ្លួនពលរដ្ឋ៤នាក់បន្ថែមទៀតក្នុងរឿងជម្លោះដី
ជនជាតិភាគតិចនៅមណ្ឌលគិរីបារម្ភថាក្រុមហ៊ុនធ្វើឲ្យបាត់ដីចម្ការវិលជុំ
ពលរដ្ឋមានជម្លោះដីនៅឧត្ដរមានជ័យបន្តតវ៉ានៅទីស្ដីការគណៈរដ្ឋមន្រ្តី
ស្ថានភាពបញ្ហាជម្លោះដីនៅស្រុកសន្ទុកខេត្តកំពង់ធំ
សង្គមស៊ីវិលស៊ើបអង្កេតករណីក្រុមហ៊ុនរំលោភបំពានលើជនជាតិភាគតិច
សមត្ថកិច្ចខែត្រកំពង់ធំចាប់ខ្លួនពលរដ្ឋ៣នាក់ក្នុងរឿងជម្លោះដី
សមត្ថកិច្ចខែត្រកំពង់ធំបាញ់បង្រ្កាបការតវ៉ារបស់ពលរដ្ឋក្នុងរឿងជម្លោះដី
អាជ្ញាធរវៀតណាមហាមឃាត់ខ្មែរក្រោមមិនឲ្យធ្វើស្រែលើដីដូនតា
ក្រឡាបញ្ជីតុលាការខេត្តកំពង់ធំរងការចោទថាគំរាមពលរដ្ឋក្នុងរឿងទំនាស់ដី
អាជ្ញាធរខេត្តមណ្ឌលគិរីគ្រោងកោះប្រជុំក្រុមហ៊ុនដែលមិនវិនិយោគចំគោលដៅ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
i have the same view with ms pong chivgec that the peple behind ba can receive every thing if the guard think all those thing are safe.also can see their family, lawyer and friend.
2009-10-17 18:00
មើលមតិទាំងអស់.