លោក ទិត សុធា ទីប្រឹក្សារបស់រាជរដ្ឋាភិបាល និងជាអ្នកនាំពាក្យអង្គភាពព័ត៌មាន និងប្រតិកម្មរហ័សរបស់ទីស្ដីការគណៈរដ្ឋមន្ត្រី បានមានប្រសាសន៍កាលពីព្រឹកថ្ងៃអាទិត្យ ទី៤ ខែមេសា ថា ប្រជាពលរដ្ឋដែលធ្លាប់រស់នៅជាប់ដីរបស់លោក សុន ឆ័យ ចំនួន ២៦៥គ្រួសារ គឺគេបានយល់ព្រមចាកចេញអស់ហើយ នៅតែលោក សុន ឆ័យ ម្នាក់ប៉ុណ្ណោះដែលនៅតែជំទាស់សាលដីការបស់តុលាការកំពូល ដែលសម្រេចឲ្យរឹបអូសជាសម្បត្តិសាធារណៈរបស់រដ្ឋ។
លោក ទិត សុធា បានមានប្រសាសន៍ថា មកដល់ពេលនេះសមត្ថកិច្ចក៏បានអនុវត្តន៍សាលដីការួចរាល់អស់ហើយ ប្រសិនបើលោក សុន ឆ័យ មិនទទួលយក គឺរដ្ឋាភិបាលនឹងមានវិធានការជាបន្តបន្ទាប់ទៀត។
លោក ទិត សុធា មានប្រសាសន៍ដូច្នេះ ៖ «ចំនួនប្រជាពលរដ្ឋទាំងអស់ ២៦៦គ្រួសារ គឺ ២៦៥គ្រួសារគេបានឯកភាពអស់ហើយ ដូច្នេះមិនអាចយកបុគ្គលម្នាក់មកប្រឆាំងទៅនឹងទិដ្ឋភាពច្បាប់ ហើយធ្វើឲ្យប៉ះពាល់ដល់សេចក្ដីសម្រេចសាលដីកាស្ថាពររបស់តុលាការបានទេ។ សាលដីកាហ្នឹងគឺមានតម្លៃ មានអធិបតេយ្យ ដែលឆន្ទានុសិទ្ធិរបស់តុលាការ ហើយលោក សុន ឆ័យ គឺមិនអាចប្រឆាំងនឹងសាលដីកានេះបានទេ។ មកដល់ពេលនេះ សមត្ថកិច្ចក៏បានអនុវត្តនូវសាលដីការួចរាល់អស់ហើយ បើសិនជាគាត់មិនទទួល គឺនឹងមានវិធានការជាបន្តបន្ទាប់ទៀត»។
នៅថ្ងៃអាទិត្យ ទី៤ មេសានេះ វិទ្យុអាស៊ីសេរីមិនអាចទាក់ទងសុំប្រតិកម្មពីលោកតំណាងរាស្ត្រ សុន ឆ័យ ថាតើមានគម្រោងធ្វើដូចម្ដេចទៀតនោះទេ។
ប៉ុន្តែកាលពីថ្ងៃទី១ ខែមេសា នៅពេលដែលសមត្ថកិច្ចចុះអនុវត្តសាលដីការបស់តុលាការកំពូលរឹបអូសយកដីរបស់លោកនោះ លោក សុន ឆ័យ បានសម្ដែងការមិនពេញចិត្តចំពោះសាលដីការបស់តុលាការកំពូលនោះទេ ដោយមានប្រសាសន៍យ៉ាងដូចនេះ ៖ «គឺជាការប្លន់យកដីតាមរយៈប្រព័ន្ធតុលាការ ការយកដីដោយមិនគោរពតាមច្បាប់ភូមិបាល។ ប្រើកម្លាំងប្រដាប់អាវុធបែបនេះ គឺជាអំពើយង់ឃ្នងដែលផ្ទុយអំពីគោលការណ៍ច្បាប់។ នេះមិនប្រព្រឹត្តត្រឹមតែខ្ញុំទេ ពលរដ្ឋដែលលោកមានដីបន្តិចបន្តួចក៏ទទួលរងគ្រោះបែបនេះជាច្រើនករណីហើយ»៕