តំណាងរាស្រ្តគណបក្សសមរង្ស៊ី គឺលោក សុន ឆ័យ នៅថៃ្ងសុក្រនេះបានសម្ដែងការព្រួយបារម្ភនិងរិះគន់ថា សេចក្តីព្រាងច្បាប់ប្រឆាំងអំពើពុករលួយរបស់រដ្ឋាភិបាល ដែលសភាជាតិគ្រោងបើកការពិភាក្សាដើម្បីអនុម័តនៅសប្តាហ៍ក្រោយនេះ គឺនៅមានចំណុចចន្លោះប្រហោងច្រើន ហើយបានញ៉ាំងឲ្យមានការសង្ស័យថា ច្បាប់នេះក្លាយជាឧបករណ៍បម្រើឲ្យជនពុករលួយនិងអ្នកមានអំណាចទៅវិញ។
ប៉ុន្តែមន្រ្តីជាន់ខ្ពស់និងតំណាងរាស្រ្តនៃគណបក្សប្រជាជនកម្ពុជាបានសម្ដែងការសាទរចំពោះសេចក្តីព្រាងច្បាប់នេះថា ជាឧបរណ៍សំខាន់នៅក្នុងការប្រឆាំងអំពើពុករលួយ និងបម្រើប្រទេសជាតិ។
ប្រភពដដែលបានបញ្ជាក់ឲ្យដឹងថា សេចក្តីព្រាងច្បាប់ប្រឆាំងអំពើពុករលួយនេះត្រូវបានគណៈកម្មការអចិន្រៃ្តយ៍របស់សភាជាតិប្រជុំសម្រេចនៅថៃ្ងសុក្រនេះ ដាក់ចូលក្នុងរបៀបវារៈដើម្បីពិភាក្សានិងអនុម័តនៅក្នុងកិច្ចប្រជុំសភាវិសាមញ្ញ នៅថៃ្ងទី១០ ខែមីនា សប្តាហ៍ក្រោយនេះ តាមសំណើរបស់ប្រមុខរដ្ឋាភិបាលកម្ពុជា គឺលោក ហ៊ុន សែន។
តំណាងរាស្រ្តគណបក្សសមរង្ស៊ី លោក សុន ឆ័យ បានមានប្រសាសន៍នៅក្នុងសន្និសីទកាសែតនៅថៃ្ងសុក្រនេះ ថា ៖ «យើងបារម្ភថា អាចនឹងយកទៅប្រើប្រាស់ក្នុងការទៅរំខានដល់សង្គមស៊ីវិលផ្នែកសិទ្ធិមនុស្ស ផ្នែកអីដែលមានការរិះគន់ទៅរដ្ឋាភិបាល ហើយជាកត្តាមួយដែលគេអាចរកឃើញការចាយលុយខុសបន្តិចបន្តួចអ៊ីចឹងអីទៅ យកទៅបង្កើតបញ្ហា ហើយនិងគណបក្សប្រឆាំង ឬក៏អ្នកណាដែលសហការជាមួយបក្សប្រឆាំង អាចផ្ដល់ធនធានអី គេអាចរកឃើញ គឺធ្វើឲ្យខូចខាតដល់ការរកស៊ីរបស់គាត់។ ដូច្នេះគឺថា អ្នកដែលកាន់ការនេះគឺអាចដឹងទាំងអស់ អ្នកណាដែលមានកំហុសអី ដឹងទាំងអស់ នៅលើតុទាំងអស់ ហើយគេសម្រេចជាឯកច្ឆន្ទថា តើគេអាចដាក់ទោសអ្នកណាបាន?»។
ផ្ទុយពីការរិះគន់ខាងលើនេះ លោក ជាម យៀប តំណាងរាស្រ្តគណបក្សប្រជាជនកម្ពុជា និងជាប្រធានគណៈកម្មការទទួលបន្ទុកសេដ្ឋកិច្ច និងហិរញ្ញវត្ថុរបស់សភាជាតិ បានមានប្រសាសន៍ថា សេចក្តីព្រាងច្បាប់នេះមានសារសំខាន់សម្រាប់ប្រយុទ្ធប្រឆាំងនឹងអំពើពុករលួយ។
លោក ជាម យៀប បានបញ្ជាក់ថា ៖ «អានេះគឺជាដងដាវមួយដែលយើងចាំបាច់ត្រូវប្រគល់ជូនទៅតុលាការ ដើម្បីអនុវត្តនូវរាល់ការងារ ក្រោយពេលព្រះករុណា ព្រះអង្គឡាយព្រះហស្តលេខា លោករៀបចំឲ្យប្រើប្រាស់។ ខ្ញុំគ្រាន់តែសុំជម្រាបថា អ្វីដែលលោក សុន ឆ័យ បានលើកឡើងគឺជាសិទ្ធិរបស់គាត់ទេ ប៉ុន្តែគ្រាន់តែថា គាត់លៃយ៉ាងម៉េចកុំឲ្យតែប៉ះសិទ្ធិអ្នកដទៃបានហើយ!»។
លោក សុន ឆ័យ តំណាងរាស្រ្តគណបក្សប្រឆាំង បានលើកបង្ហាញអំពីចំណុចចន្លោះប្រហោងសំខាន់ៗ នៅក្នុងសេចក្តីព្រាងច្បាប់នោះថា ការប្រកាសទ្រព្យសម្បត្តិរៀងរាល់ ២ឆ្នាំម្តង ត្រូវបានគេចាត់ទុកជាឯកសារព័ត៌មានយ៉ាងសម្ងាត់បំផុត មិនឲ្យសាធារណជនបានដឹងឮ ឬតាមដានទ្បើយ។
ពុំមានមាត្រាណាមួយចែងអំពីការផ្តន្ទាទោសចំពោះមន្រ្តីប្រឆាំងអំពើពុករលួយ ក្នុងករណីមានការឃុបឃិតគ្នាជាមួយអ្នកប្រព្រឹត្តអំពើពុករលួយនោះ។
សេចក្តីព្រាងច្បាប់ប្រឆាំងអំពើពុករលួយដែលសភាជាតិគ្រោងបើកកិច្ចប្រជុំវិសាមញ្ញពិភាក្សានិងអនុម័តនៅថៃ្ងទី១០ ខែមីនាសប្តាហ៍ក្រោយនេះ គឺមានចំនួន ៥៧មាត្រា និង ៩ជំពូក។
សហគមន៍ប្រទេសម្ចាស់ជំនួយអន្តរជាតិ និងសង្គមស៊ីវិលនានាក្នុងប្រទេសកម្ពុជា កំពុងតែទន្ទឹងរង់ចាំសេចក្ដីព្រាងច្បាប់នេះអស់រយៈពេលជាង ១៥ឆ្នាំមកហើយ តាំងពីឆ្នាំ១៩៩៤មក។
ឯកសារស្រាវជ្រាវឯករាជមួយចេញផ្សាយកាលពីឆ្នាំ២០០៤កន្លងទៅ ស្តីពីការវាយតម្លៃស្ថានការណ៍អំពើពុករលួយក្នុងប្រទេសកម្ពុជា បានរកឃើញថា ប្រទេសកម្ពុជាបានបាត់បង់ថវិកាចំណូលរដ្ឋរវាងពី ៣០០លានដុល្លារអាមេរិក ទៅ ៥០០លានដុល្លារអាមេរិកក្នុងមួយឆ្នាំៗ ដោយសារអំពើពុករលួយ អំពើរត់ពន្ធខុសច្បាប់ និងអំពើខុសច្បាប់នានា។
កាលពីថៃ្ងទី១៧ ខែមករាកន្លងទៅនេះ មានការបើកវគ្គបណ្តុះបណ្តាលមួយដល់សិក្ខាកាមចំនួន ៦២នាក់ សម្រាប់ ៤វគ្គ ផ្តោតលើវិធីសាស្រ្តនិងជំនាញនានាសម្រាប់ការស្ទង់មតិ ស្រាវជ្រាវ ស៊ើបអង្កេតអំពើពុករលួយ យន្តការបណ្ដឹង ការរៀបចំសំណុំរឿងពុករលួយ និងការប្រកាសទ្រព្យសម្បត្តិ។
វគ្គបណ្តុះបណ្តាលនោះត្រូវបានបង្រៀនដោយអ្នកឯកទេសមានបទពិសោធន៍ខ្ពស់លំដាប់អន្តរជាតិមកពីសហរដ្ឋអាមេរិក និងទីក្រុងហុងកុង ក្រោមកិច្ចឧបត្ថម្ភដោយ USAID សហការជាមួយនឹងអង្គភាពប្រឆាំងអំពើពុករលួយរបស់រដ្ឋាភិបាល៕