ទីប្រឹក្សារដ្ឋាភិបាលនិងជាអ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្រ្តី លោក ទិត សុធា បានឲ្យដឹងនៅថ្ងៃទី២៦ មករាថា លោក សម រង្ស៊ី ត្រូវបញ្ឈប់ការផ្សព្វផ្សាយឯកសាររបស់ខ្លួនចំនួន១៥ទំព័រនិយាយអំពីវៀតណាមបានឈ្លានពានយកទឹកដីកម្ពុជានៅខែត្រស្វាយរៀងនោះជាបន្ទាន់ បើមិនដូច្នេះទេរដ្ឋាភិបាលនឹងពិចារណាប្តឹងលោក សម រង្ស៊ី បន្ថែមទៀតពីរឿងនេះ។
លោក ទិត សុធា មានប្រសាសន៍ដូច្នេះ ៖ «ការបង្កើតនូវឯកសារ ការអះអាងទាំងប៉ុន្មានរបស់ឯកឧត្ដម សម រង្ស៊ី គឺជាការភូតភរកុហក គឺជាការបង្កើតបញ្ហាមួយដើម្បីបំពុលបរិយាកាសនៅក្នុងសង្គម ធ្វើឲ្យប៉ះពាល់ដល់សន្តិសុខនិងសណ្ដាប់ធ្នាប់»។
លោក ទិត សុធា បានបន្ថែមថា រាជរដ្ឋាភិបាលបោះបង្គោលព្រំដែនកម្ពុជា-វៀតណាម គឺឈរលើគោលការណ៍ត្រឹមត្រូវ ដោយផ្អែកលើផែនទីដែលបានតម្កល់ទុកនៅអង្គការសហប្រជាជាតិឆ្នាំ១៩៦៤ និងយោងលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ សភាបានអនុម័តហើយព្រះមហាក្សត្រក៏បានឡាយព្រះហស្ដនិងប្រកាសឲ្យប្រើផងដែរ។
យ៉ាងនេះក្តី មន្រ្តីនាំពាក្យគណបក្សប្រឆាំង លោក យឹម សុវណ្ណ បានបញ្ជាក់ថា ឯកសារ១៥ទំព័រដែលលោក សម រង្ស៊ី បានចេញផ្សាយ គឺជាព័ត៌មានពិតដែលបានរៀបចំដោយអ្នកជំនាញនិងអ្នកប្រវត្តិសាស្រ្តនៅប្រទេសបារាំង ហើយសន្ធិសញ្ញាបំពេញបន្ថែមឆ្នាំ២០០៥ ដែលសភាអនុម័តនោះ គឺតំណាងរាស្រ្តគណបក្សសមរង្ស៊ី បានប្រឆាំងទាំងអស់មិនទទួលស្គាល់នោះទេ។
លោក យឹម សុវណ្ណ បានឲ្យដឹងដូច្នេះ ៖ «ឯកសារដែលប្រមូលនិងចងក្រងដោយអ្នកជំនាញនៅប្រទេសបារាំង អ្នកជំនាញការខាងព្រំដែន ហើយអ្នកប្រវត្តិសាស្រ្ដ អ្នកព័ត៌មានវិទ្យា ដែលគេបានប្រជុំគ្នា គេរៀបចំជាឯកសារដើម្បីបង្ហាញជូនសាធារណៈជាតិនិងអន្តរជាតិថា បង្គោលដែលឯឝឧត្ដមប្រធាន(សម រង្ស៊ី)បានដកនោះ គឺមិនខុសច្បាប់ទេ ពីព្រោះបង្គោលហ្នុងបោះនៅលើដីខ្មែរ។ យើងបង្ហាញទៅមតិសាធារណៈជាតិនិងអន្តរជាតិថា ប្រទេសវៀតណាមនិងប្រទេសកម្ពុជាសហការគ្នាបោះបង្គោលព្រំដែន គឺប៉ះពាល់ទៅដល់បូរណភាពទឹកដីខ្មែរ»។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានមានប្រសាសន៍ថា រដ្ឋាភិបាលបានប្រើតុលាការដើម្បីគំរាមលោក សម រង្ស៊ី ដូច្នេះ គឺជាការគាបសង្កត់ដើម្បីចំណេញនយោបាយរបស់ខ្លួន។
លោក អ៊ូ វីរៈ មានប្រសាសន៍ថា ៖ «ពេលយើងមានជម្លោះព្រំដែនជាមួយនឹងថៃ រដ្ឋាភិបាលព្យាយាមខ្លាំងណាស់ក្នុងការបង្ហាញនូវភស្តុតាងឬមួយឯកសារបែបហ្នឹង តែព្រំដែនជាមួយប្រទេសកម្ពុជានិងវៀតណាមនេះវិញ មិនត្រឹមតែមិនយកចិត្តទុកដាក់ទេ បែរជារារាំងមិនឲ្យមានការជួយក្នុងការផ្សព្វផ្សាយ»។
លោក សម រង្ស៊ី ត្រូវបានតុលាការខែត្រស្វាយរៀង ចោទប្រកាន់ពីបទព្រហ្មទណ្ឌថា បានបំផ្លាញទ្រព្យសម្បត្តិសាធារណៈនៃការដកតម្រុយបង្គោលព្រំដែនកម្ពុជា-វៀតណាម លេខ១៨៥ នៅក្នុងស្រុកចន្ទ្រា ខែត្រស្វាយរៀង កាលពីខែតុលាកន្លងទៅ ហើយតុលាការនឹងកាត់ទោសលោកនៅថ្ងៃពុធ ទី២៧ មករា ជាមួយប្រជាពលរដ្ឋម្ចាស់ដីស្រែចំនួន៥នាក់ផ្សេងទៀត៕