ប្រជាពលរដ្ឋជាច្រើននាក់នៅភូមិកោះក្បានកណ្ដាល ឃុំសំរោង ស្រុកចន្ទ្រា បានឲ្យដឹងថា ក្រុមមន្ត្រីអាជ្ញាធរ រួមមានអភិបាលស្រុកចន្ទ្រាផង បានកោះហៅពួកគាត់មានគ្នាប្រមាណ៣០នាក់ឲ្យចូលរួមប្រជុំនៅថ្ងៃអាទិត្យ ទី១៥ វិច្ឆិកា ដែលធ្វើឲ្យពួកគាត់កាន់តែព្រួយបារម្ភមួយកម្រិតទៀត ព្រោះក្រុមមន្ត្រីបានប្រាប់ឲ្យពួកគាត់ធ្វើការអត់ធ្មត់ រង់ចាំដំណោះស្រាយពីសំណាក់រាជរដ្ឋាភិបាល។
ស្ត្រីម្នាក់ដែលបានចូលរួមប្រជុំ អ្នកស្រី មាស ស្រី អាយុ៣៩ឆ្នាំ បានថ្លែងថា រូបគាត់កាន់តែភ័យព្រួយនិងអស់សង្ឃឹមថែមទៀត ក្រោយពីបានស្ដាប់ការណែនាំរបស់ក្រុមមន្ត្រីទាំងនោះ។
ការកំណត់ព្រំដែនកម្ពុជា វៀតណាម
អ្នកស្រី មាស ស្រី បានឲ្យដឹងថា ៖ «គេថាចេះតែឲ្យយើងប្រឹងទៅ ឲ្យអង្គការគេដោះស្រាយឲ្យ យើងធ្វើសំណុំរឿងប្ដឹងឡើង ខ្ញុំថាប្ដឹងឡើងម៉េច? ប្ដឹងឡើងអស់រយៈប៉ុន្មាន១៦ខែហើយ អត់មានរកឲ្យប្រជាជនផង។ ប្រជាជនឆោឡោអ៊ីចឹង បានធ្វើជាហៅប្រជាជនមកប្រជុំ ប្រជាជនអត់សុខចិត្ត អ៊ីចឹងបានខ្ញុំពិបាកចិត្តណាស់ ឥឡូវមិនដឹងទៅណាទេ!»។
ចំណែកឯស្ត្រីម្នាក់ទៀត អ្នកស្រី នាង ផល្លី អាយុ៣៨ឆ្នាំ បានសម្ដែងចម្ងល់ពាក់ព័ន្ធនឹងការលើកឡើងរបស់ក្រុមមន្ត្រីស្ដីពីការទទួលខុសត្រូវរបស់មេបក្សប្រឆាំង លោក សម រង្ស៊ី ដែលបានដកបង្គោលកំណត់ព្រំដែនកាលពីថ្ងៃទី២៥ តុលា កន្លងទៅ។
អ្នកស្រី នាង ផល្លី បានបញ្ជាក់ថា ៖ «គេថា កុំអាងលោក សម រង្ស៊ី ពេក កាលគាត់ដកហ្នឹង គាត់ធានាអះអាង ឥឡូវគាត់អត់ធានាទេ គេសុំរួចខ្លួនហើយ គេនិយាយអ៊ីចឹង តើពិតមែនឬអត់?»។
អភិបាលស្រុកចន្ទ្រា លោក ជា យាង បានទទួលស្គាល់ថា មានការប្រជុំជាមួយប្រជាពលរដ្ឋមែន តែលោកបានបដិសេធមិនធ្វើសេចក្ដីអធិប្បាយជុំវិញការដែលអាជ្ញាធរកោះប្រជុំប្រជាពលរដ្ឋទាក់ទិននឹងការបោះបង្គោលព្រំដែនកម្ពុជា-វៀតណាមនោះឡើយ។
ប្រធានសមាគមគ្រូបង្រៀនកម្ពុជាឯករាជ្យ និងជាតំណាងក្រុមប្រឹក្សាឃ្លាំមើលកម្ពុជា លោក រ៉ុង ឈុន បានមានប្រសាសន៍ថា ក្ដីកង្វល់ដែលប្រជាពលរដ្ឋរស់នៅតាមបណ្ដោយព្រំដែនកម្ពុជា-វៀតណាមបានលើកឡើង អាចជាកម្មវត្ថុសម្រាប់រាជរដ្ឋាភិបាលយកមកពិចារណា។
លោក រ៉ុង ឈុន បានមានប្រសាសន៍ថា ៖ «មិនមែនគ្រាន់តែប្រតិកម្មពីអាជ្ញាធរយួនបន្តិចបន្តួច ហើយមកដាក់បន្ទុកលើប្រជាពលរដ្ឋ លើអ្នកតំណាងរាស្ត្រខ្លួនឯងពេលនេះ ចង្អុលបង្ហាញឲ្យឃើញថា រដ្ឋាភិបាលយើងហាក់បីដូចជាពាក់ព័ន្ធ ឬមួយរណបរដ្ឋាភិបាលប្រទេសជិតខាង»។
កាលពីថ្ងៃទី២៥ តុលាកន្លងទៅ លោក សម រង្ស៊ី ប្រធានគណបក្សសមរង្ស៊ី បានដឹកនាំការដង្ហែអង្គកឋិនទានទៅកាន់វត្តមួយនៅតំបន់ជាយដែន ឈ្មោះវត្តអង្គរំដេញ។ ក្រោយពីបានស្ដាប់នូវការថ្លែងទុក្ខរបស់ប្រជាពលរដ្ឋស្ដីពីការបាត់បង់ដីធ្លី លោក សម រង្ស៊ី រួមជាមួយប្រជាពលរដ្ឋប្រមាណ១០០នាក់បានចុះទៅដកបង្គោលតម្រុយកំណត់ព្រំដែនកម្ពុជា-វៀតណាមចំនួន៦ដើមចេញពីដីស្រែរបស់ប្រជាកសិករខ្មែរ បន្ទាប់មក លោក សម រង្ស៊ី បានរងការប្ដឹងទៅរដ្ឋសភា ដោយស្នើសុំឲ្យមានការដកអភ័យឯកសិទ្ធិតំណាងរាស្ត្ររបស់លោក៕