ជនរងគ្រោះ ឈ្មោះ សៃ សែន អាយុ ៤០ឆ្នាំ រស់នៅភូមិថ្មដា ត្រូវឃាតករបាញ់ចំនួន ៤គ្រាប់ ស្លាប់នៅនឹងកន្លែងកើតហេតុកាលពីវេលាម៉ោង ១១អធ្រាត្រថ្ងៃទី២២ ខែវិច្ឆិកា ឆ្នាំ២០០៨។
ប្អូនប្រុសបង្កើតជនរងគ្រោះ ឈ្មោះ សៃ សុខ មានប្រសាសន៍ឲ្យដឹងថា បងប្រុសគាត់ទៅចាំក្របីជាមួយកូនប្រុសអាយុ ១៣ឆ្នាំ ហើយតាមការបំភ្លឺរបស់កូនប្រុសនោះបញ្ជាក់ថា គាត់ត្រូវគេបាញ់ខណៈដែលភ្ញាក់ពីដេក ហើយទៅដេញក្របី ពេលត្រឡប់មកខ្ទមវិញ ក៏ត្រូវឃាតករមានគ្នាចំនួន ២នាក់ បាញ់សម្លាប់។
លោក សៃ សុខ មានប្រសាសន៍ថា ៖ «គាត់ចុះមកមើលក្របី គាត់ឡើងដល់ជណ្ដើរគេបាញ់នៅលើជណ្ដើរតែម្ដង។ កូនគាត់ថា មនុស្សដងខ្លួនទាបម្នាក់ ខ្ពស់ម្នាក់ ហើយវាបាញ់ប្រហែលចម្ងាយ ៨-៩ម៉ែត្រ»។
បើតាមប៉ូលិសមូលដ្ឋានដែលបានពិនិត្យសាកសពឲ្យដឹងថា ជនរងគ្រោះត្រូវគេបាញ់ត្រូវភ្លៅដៃស្មានិងគុម្ពត្រចៀក ក៏ប៉ុន្តែឃាតករពុំមានបន្សល់វត្ថុតាងណាមួយនៅទីកើតហេតុនោះទេ ក្រៅពីសម្បកគ្រាប់កាំភ្លើងអាកាចំនួន៣គ្រាប់ដែលប៉ូលិសរកឃើញ។
អធិការប៉ូលិសស្រុកសៀមប៉ាង លោក វ៉ា សុផាន់ មានប្រសាសន៍បញ្ជាក់ថា មិនមានតម្រុយណាមួយដើម្បីឲ្យសមត្ថកិច្ចសន្និដ្ឋានថា ឃាតកម្មខាងលើធ្វើឡើងដោយហេតុផលគំនុំ ឬជាអំពើប្លន់ទ្រព្យសម្បត្តិនោះអ្វីនៅឡើយទេ ក៏ប៉ុន្តែតាមការស៊ើបអង្កេតជំហានដំបូងរបស់ប៉ូលិសមូលដ្ឋានរកឃើញថា នៅមុនថ្ងៃកើតហេតុ ជនរងគ្រោះមានជម្លោះខ្លាំងជាមួយអ្នកភូមិជាមួយគ្នា ហើយជនរងគ្រោះក៏ជាមនុស្សដែលអ្នកភូមិចោទប្រកាន់ថា ចេះអំពើអាបធ្មប់ផងដែរ។
យ៉ាងជាយ៉ាងនេះក្តី លោកបញ្ជាក់ថា ប៉ូលិសកំពុងបន្តការស៊ើបអង្កេតទៅលើប្រភពអាវុធដែលជនល្មើសប្រើប្រាស់សម្រាប់ការបាញ់ប្រហារនេះ។
លោក វ៉ា សុផាន់ មានប្រសាសន៍ថា ៖ «ជនសង្ស័យហ្នឹង បាញ់មួយគ្រាប់ប្រមាណជា ៩ម៉ែត្រ បាញ់ហើយ ២ជំហានបានចូលទៅបាញ់ថែមទៀត ព្រោះសម្បកផ្ទុះតៗគ្នាទៅមុខ។ ...ប៉ុន្តែបានឆ្លើយបំភ្លឺប្រាប់យើងថា នៅពេលបាញ់នោះ កូនបានងើបមើល ឃើញស្រមោលមនុស្សចំនួន ២នាក់ គ្នាក៏រត់ទៅពួននៅកៀនជញ្ជាំង ដល់ពេលបាញ់ហើយ ជនល្មើសក៏រត់ទៅ គ្នាក៏ចុះមកឱបឪពុក ឮសំឡេងថ្ងូរហើយ ក៏ដាច់ខ្យល់ទៅ កូនរបស់ជនរងគ្រោះក៏រត់ទាំងយប់»។
ប្រធានគណបក្សសមរង្ស៊ីប្រចាំស្រុកសៀមប៉ាង លោក គីន ភីន មានប្រសាសន៍បញ្ជាក់ថា ពុំទាន់មានទឡ្ហីករណ៍ណាមួយ អាចចាត់ទុកថា ជាឃាតកម្មទាក់ទិននឹងបញ្ហាគំនុំនយោបាយនៅឡើយទេ។
លោក គីន ភីន ថ្លែងដូច្នេះថា ៖ «ទោះបីជារឿងនយោបាយក៏ដោយ ឬគំនុំផ្ទាល់ខ្លួនក៏ដោយ ឬមួយក៏រឿងអបិយជំនឿក៏ដោយ ធ្វើម៉េចឲ្យចាប់ជនល្មើសផ្ដន្ទាទោសតាមផ្លូវច្បាប់ ហើយជាមួយអ្នកផ្ដល់អាវុធ»។
មន្ត្រីស៊ើបអង្កេតនៃសមាគមការពារសិទ្ធិមនុស្ស អាដហុក ខេត្តស្ទឹងត្រែង លោក ហូ សំអុល ពុំទាន់អាចធ្វើអត្ថាធិប្បាយណាមួយជុំវិញហេតុការណ៍នោះទេ ដោយអះអាងថា កំពុងចូលរួមអង្កេត។
បើតាមមន្រ្តីគណបក្សសមរង្ស៊ីប្រចាំមូលដ្ឋាននិយាយថា លោក សៃ សែន គឺជាសមាជិកសកម្មគាំទ្រគណបក្សសមរង្ស៊ីនៅមូលដ្ឋាននោះនៅក្នុងយុទ្ធនាការរកសំឡេងឆ្នោតកន្លងទៅនេះ៕