កាលពីថ្ងៃពុធ ទី៨ ខែតុលាម្សិលមិញនេះ គណបក្សសមរង្ស៊ីបានបង្ហាញនូវភស្តុតាងដ៏ធ្ងន់ធ្ងរជាច្រើននៃការបន្លំទម្រង់ពិសេស១០១៨ដែលបានអនុញ្ញាតឲ្យអ្នកបោះឆ្នោតអាចមានសិទ្ធិបោះឆ្នោតបាននៅពេលដែលគេពុំមានប័ណ្ណបោះឆ្នោតដែលត្រូវយកទៅបង្ហាញនៅកន្លែងបោះឆ្នោត។
នៅក្នុងអ៊ីម៉េលបីទំព័រដែលវិទ្យុអាស៊ីសេរីទទួលបានកាលពីថ្ងៃពុធ គណបក្សសមរង្ស៊ីបានចោទប្រកាន់ថា ប្រធានក្រុមប្រឹក្សាឃុំគឺជាអ្នកដែលមានសិទ្ធិក្នុងការចុះហត្ថលេខានិងបោះត្រាក្រុមប្រឹក្សាឃុំលើទម្រង់១០១៨ ហើយគណៈកម្មាធិការជាតិរៀបចំការបោះឆ្នោតជាតិគ.ជ.ប.ដោយស្ថិតនៅក្រោមឥទ្ធិពលរបស់គណបក្សប្រជាជនកម្ពុជាកំពុងកាន់អំណាចបានឃុបឃិតជាមួយក្រុមប្រឹក្សាឃុំប្រើឧបាយកលដ៏មានប្រសិទ្ធភាពទាំងនេះដើម្បីធ្វើបញ្ជីឈ្មោះខ្មោចអនុញ្ញាតឲ្យយកឈ្មោះខ្មោចទាំងនោះបោះឆ្នោតគាំទ្រគណបក្សប្រជាជនកម្ពុជា។ ក្នុងអ៊ីម៉េលនោះក៏បានបង្ហាញឯកសារឲ្យដឹងនូវការសារភាពរបស់ក្រុមការងារបោះឆ្នោតរបស់គណបក្សប្រជាជនកម្ពុជានិងស្មៀនឃុំពីគណបក្សប្រជាជនកម្ពុជា។
សូមជម្រាបថា វិទ្យុអាស៊ីសេរីមិនអាចសុំប្រតិកម្មបានភ្លាមៗពីមន្ត្រីនៃគណៈកម្មាធិការជាតិរៀបចំការបោះឆ្នោតនិងមន្ត្រីឃុំមួយចំនួនបាននៅឡើយទេ ដែលគណបក្សសមរង្ស៊ីបានចោទប្រកាន់និងមានឈ្មោះព្រមទាំងឯកសារភស្តុតាងចោទប្រកាន់ផងនោះដែលបានភ្ជាប់និងផ្សព្វផ្សាយក្នុងទំព័រវ៉ឹបសាយថ៍របស់ខ្លួន៕