លោក សម រង្ស៊ី បន្តថា ការចងសម្ព័ន្ធភាពនោះ បើមិនប្រុងប្រយ័ត្នទេ វានាំឲ្យសំឡេងគាំទ្រកាន់តែឃ្លាតឆ្ងាយទៅទៀត។ ដូចនេះ ការចងសម្ព័ន្ធភាពត្រូវយល់គ្នាឲ្យច្បាស់ពីបំណងនិងជំហរសម្ព័ន្ធភាពមិនសំខាន់ពីតួនាទីមុខតំណែងនៃអំណាចបុគ្គលដឹកនាំសម្ព័ន្ធភាពឡើយ។
លោក សម រង្ស៊ី មានប្រសាសន៍ដូច្នេះថា ៖ «អាស្រ័យលើការជជែកគ្នា មិនមែនគណបក្សសមរង្ស៊ី ជាអ្នកសម្រេចម្នាក់ឯងទេ យើងត្រូវតែជជែកគ្នា រករបៀបទំនាក់ទំនងគ្នា របៀបឈានទៅរកការប្រកាសថានឹងច្របាច់ចូលគ្នា ឬក៏រូបមន្តយ៉ាងម៉េចៗ ដំណាក់កាលយ៉ាងម៉េចៗហ្នឹង ទាល់តែយើងជួបគ្នាដើម្បីសម្រេចជាមួយគ្នា ប៉ុន្តែគោលដៅយើងមានដូចគ្នា យើងបានកំណត់ហើយ»។
ប្រធានគណបក្សសិទ្ធិមនុស្ស លោក កឹម សុខា មានប្រសាសន៍នៅថ្ងៃអាទិត្យនេះដែរថា លោកនឹងទៅជួបចរចាជាមួយលោក សម រង្ស៊ី នៅសប្តាហ៍ក្រោយនេះ ជុំវិញការស្នើសុំចងសម្ព័ន្ធភាពរវាងគណបក្សទាំង២ ៖ «ដូចខ្ញុំជម្រាបអ៊ីចឹង ចង់ឲ្យបានចម្លើយខាងគណបក្សសមរង្ស៊ីជាផ្លូវការថាតើគោលការណ៍របស់គណបក្សសមរង្ស៊ី គឺសម្ព័ន្ធភាពជាមួយគណបក្សសិទ្ធិមនុស្សឬទេ? ឲ្យគាត់ព្រមជាគោលការណ៍សិន។ ហើយចំពោះគោលជំហរយ៉ាងម៉េច ទិសដៅយ៉ាងម៉េចអាហ្នឹងជជែកគ្នា អត់មានបញ្ហាអីទេ»។
ប្រធានគណបក្សសមរង្ស៊ីអះអាងថា កន្លងមក ការចងសម្ព័ន្ធភាពរវាងគណបក្សមួយ ទៅគណបក្សមួយ ដែលមិនគោរពនីតិវិធីផ្ទៃក្នុងសម្ព័ន្ធភាពបាននាំឲ្យឥទ្ធិពលកម្លាំងប្រជាធិបតេយ្យនៃសំឡេងគាំទ្របានថយចុះ ៖ «ហើយយើងឃើញហើយលទ្ធផលនៃការបោះឆ្នោត អ្នកណាដែលមិនគោរពពាក្យសម្ដីរបស់ខ្លួនគឺប្រជារាស្រ្ដមិនបោះឆ្នោតឲ្យ ឃើញថាធ្លាក់សំឡេងច្រើន ហើយគណបក្សខ្លះ ស្ទើរតែរលាយដោយសារមានមេដឹកនាំដែលមិនគោរពពាក្យសម្ដីរបស់ខ្លួន»។
ចំណែកនាយកអង្គការខុមហ្រ្វែល លោក គល់ បញ្ញា បានដាស់តឿនថា សម្ព័ន្ធភាពរវាងគណបក្សមួយទៅគណបក្សមួយ ជាការល្អសម្រាប់ឧត្តមគតិរួបរួមដើម្បីជាប្រយោជន៍នៃគណបក្ស និងលទ្ធិប្រជាធិបតេយ្យ។ ក៏ប៉ុន្តែ សម្ព័ន្ធភាពនោះក៏ជាអាវុធមុខ២ដែរ បើមានមេគណបក្សនៃគណបក្សណាមួយ ក្បត់គ្នានៅក្នុងសម្ព័ន្ធភាពនោះ វាហុចផលចំណេញនយោបាយទៅគណបក្សផ្សេងទៅវិញ។
សូមជម្រាបថា កាលពីថ្ងៃ៧ ខែមករា សប្តាហ៍នេះ ប្រធានគណបក្សសិទ្ធិមនុស្ស លោក កឹម សុខា មានប្រសាសន៍ថា ក្រោយបង្កើតចេញជាសម្ព័ន្ធភាពគណបក្សទាំង២រួច គណបក្សសិទ្ធិមនុស្ស នឹងប្រគល់តំណែងប្រធាននិងឈរឈ្មោះជានាយករដ្ឋមន្រ្តី ដឹកនាំសម្ព័ន្ធភាពនោះ ដល់លោក សម រង្ស៊ី ទៀតផង៕