លោក សុន ឆ័យ បានបញ្ជាក់ថា ប្រាក់ចំណូលជាតិកន្លងមកបានធ្លាក់ចុះ កាលពីឆ្នាំ២០០៩ រហូតដល់ឆ្នាំ២០១០ ហើយនៅឆ្នាំក្រោយនេះ ប្រទេសមួយចំនួនចាប់ផ្តើមទារបំណុលដែលកម្ពុជាជំពាក់ ដូច្នេះលោកគិតថា ទាំងនេះសុទ្ធសឹងតែជាបញ្ហាដែលមិនគួរមានការបង្កើនការចំណាយដ៏ច្រើនសន្ធឹកសន្ធាប់បែបនោះឡើយ។
លោក សុន ឆ័យ មានប្រសាសន៍ដូច្នេះ ៖ «តើរដ្ឋាភិបាលអាចនឹងទៅយកពីប្រភពណា? ពីព្រោះយើងឃើញថា ការប្រមូលថវិកាជាតិមានបញ្ហាហើយ សូម្បីតែឆ្នាំ២០០៩ និង ២០១០នេះទៀត ក៏ឃើញវិស័យពន្ធដារ វិស័យពន្ធគយកំពុងធ្លាក់ចុះ តើមានលុយពីណា? បើរំពឹងប្រាក់ជំនួយបរទេស ក៏មិនអាចបំពេញចំនួន ៣ពាន់លាននេះដែរ»។
ការរិះគន់របស់តំណាងរាស្ត្របក្សប្រឆាំង សម រង្ស៊ី ធ្វើឡើងក្រោយពីកិច្ចប្រជុំមួយរបស់គណៈកម្មការហិរញ្ញវត្ថុ និងធនាគារនៃរដ្ឋសភា កាលពីថ្ងៃច័ន្ទ ទី១៩ ខែកក្កដា កន្លងទៅ ជាមួយមន្ត្រីក្រសួងហិរញ្ញវត្ថុ ជជែកអំពីផែនការយុទ្ធសាស្ត្រនៃថវិកាជាតិឆ្នាំ២០១១។
ក្នុងកិច្ចប្រជុំនោះ លោក គាត ឈន់ ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ បានប៉ាន់ប្រមាណថា ចំណាយថវិកាជាតិនឹងត្រូវដំឡើងរហូតដល់ ៣ពាន់លានដុល្លារ ក្រោយពីមានសំណើរបស់ក្រសួងនានាមកកាន់ក្រសួងហិរញ្ញវត្ថុ។
តំណាងរាស្ត្រគណបក្សប្រជាជនកម្ពុជា និងជាប្រធានគណៈកម្មការហិរញ្ញវត្ថុ និងធនាគាររបស់រដ្ឋសភា លោក ជាម យៀប បានបញ្ជាក់បន្ថែមថា គេត្រូវតែមានការបង្កើន ទោះបីតិច ឬក៏ច្រើន ដើម្បីឆ្លើយតបចំពោះគម្រោងអភិវឌ្ឍន៍ប្រទេស ហើយក្រសួងមួយចំនួនដែលត្រូវបង្កើននៅក្នុងឆ្នាំ២០១១នេះ មានដូចជាក្រសួងអប់រំ ក្រសួងសុខាភិបាល ក្រសួងអភិវឌ្ឍន៍ជនបទ និងក្រសួងកសិកម្ម។
លោកបានពន្យល់បន្តទៀត អំពីផែនការដែលត្រូវរកប្រាក់ចំណូលមកទប់ទល់សម្រាប់ការចំណាយនៅឆ្នាំ២០១១ ខាងមុខនេះដូច្នេះ ៖ «សក្ដានុពលនៃប្រភពចំណូលចេញអំពី គយ រដ្ឋាករ ចេញអំពីពន្ធដារ សារពាណិជ្ជ ការជួយឧបត្ថម្ភដោយឥតសំណង»។
ប្រភពពីមន្ត្រីក្រសួងហិរញ្ញវត្ថុ បានអះអាងថា ប្រាក់ចំណូលសម្រាប់ឆ្នាំ២០១១ នឹងមានចំនួនត្រឹមតែ ៩លាន លានរៀល គឺប្រហែលជាង ២ពាន់លានដុល្លារអាមេរិក។ រីឯសំណើនៃការចំណាយមានចំនួនដល់ទៅ ១២លាន លានរៀល គឺស្មើនឹងជិត ៣ពាន់លានដុល្លារអាមេរិក។ ថវិកាដែលនឹងត្រូវចំណាយក្នុងឆ្នាំ២០១១នេះ ច្រើនជាងប្រាក់ចំណូលដល់ទៅ 3លាន លានរៀល គឺស្មើនឹង ៧០០លានដុល្លារ ហើយច្រើនជាងការចំណាយកាលពីឆ្នាំ២០១០ ដល់ទៅជិត ៤០%។
ក្រសួងហិរញ្ញវត្ថុនឹងបើកកិច្ចប្រជុំបន្ទាប់មកទៀត ដើម្បីពិនិត្យមើលសំណើនៃការបង្កើនប្រាក់ចំណាយសម្រាប់ឆ្នាំ២០១១ នៅខ សីហា ខាងមុខនេះបន្តទៀត៕