ក្រោយពីតុលាការក្រុងភ្នំពេញសាកសួរមួយព្រឹកមក លោក ហូរ វ៉ាន់ តំណាងរាស្រ្តគណបក្សសមរង្ស៊ីបានប្រាប់អ្នកកាសែតនៅក្រៅរបងតុលាការថា កាសែត ឌឹឃែមបូឌាដេលី បានសរសេរខុសពីអ្វីដែលលោកផ្តល់បទសម្ភាសន៍កាលពីល្ងាចថ្ងៃ២០ ខែមេសា ឆ្នាំ២០០៩។
លោកបានសុំឲ្យកាសែតនោះកែតម្រូវការផ្សាយនៅថ្ងៃ២២ ខែមេសា ហើយនៅថ្ងៃ២៣ មេសា ឆ្នាំ២០០៩ កាសែតភ្នំពេញប៉ុស្តិ៍ បានសួរលោកពីរឿងពាក់ព័ន្ធនឹងសញ្ញាបត្រយោធានេះទៀត។
លោក ហូរ វ៉ាន់ បានបញ្ជាក់ថា ៖ «ខ្ញុំថាសញ្ញាបត្រវាជាគុណធម៌ វាជាការមួយដែលជួយឲ្យមេដឹកនាំម្នាក់ៗគឺមានឥទ្ធិពលកាន់តែខ្ពស់ឡើង គេអាចដឹកនាំកូនចៅកាន់តែមានប្រសិទ្ធភាព។ បញ្ហាទី២ បើនិយាយពីសញ្ញាបត្រថាគ្មានតម្លៃនោះក៏ពុំពិតដែរ ព្រោះខ្ញុំអត់មានបាននិយាយថាសញ្ញាបត្រគ្មានតម្លៃទេ! ខ្ញុំគ្រាន់តែបាននិយាយថា សញ្ញាបត្រដែលនឹងមានគុណភាពនោះលុះត្រាតែប្រកបដោយលក្ខណៈ៣ ហើយលក្ខណៈ៣ហ្នឹងជាលក្ខណៈសកល»។
លោក ហូរ វ៉ាន់ ទៅបំភ្លឺនៅតុលាការនេះក្រោយពីកាសែតផ្សាយក្នុងស្រុកឈ្មោះ ឌឹ ឃែមបូឌៀ ដេលី បានស្រង់សម្ដីចុះផ្សាយក្នុងអត្ថបទមួយកាលពីថ្ងៃ២១ ខែមេសា ឆ្នាំ២០០៩ និយាយពីក្រុមមន្រ្តីកងយោធពលខេមរភូមិន្ទទទួលបានសញ្ញាបត្របញ្ចប់ការសិក្សាពីវៀតណាម ដោយស្រង់សម្ដីថា លោក ហូរ វ៉ាន់ សមាជិកសភាគណបក្សសមរង្ស៊ី មានប្រសាសន៍ថា សញ្ញាបត្រយោធនេះគ្មានអ្វីក្រៅពីការពារប្រវត្តិរូបរបស់មន្រ្តីទាំងនោះទេ។
កាសែតស្រង់សម្ដី លោក ហូរ វ៉ាន់ ថាសញ្ញាបត្រដែលត្រូវបានផ្តល់ឲ្យនេះ គ្រាន់តែដើម្បីពង្រឹងអំណាចរបស់អ្នកទទួលលើកូនចៅរបស់ពួកគេប៉ុណ្ណោះ ប៉ុន្តែគុណភាពរបស់សញ្ញាបត្រគឺគ្មានតម្លៃ។
មេធាវីរបស់លោក ហូរ វ៉ាន់ គឺលោក គង់ សំអុន មានប្រសាសន៍ថា ការដកស្រង់សម្ដីរបស់កាសែត ឌឹ ឃែមបូឌៀ ដេលី ចុះផ្សាយនោះមិនត្រឹមត្រូវតាមសម្ដីកូនក្តី ហើយបានសុំឲ្យកែតម្រូវច្រើនលើកមកហើយ វាជាការយល់ច្រឡំគ្មានមូលដ្ឋានចោទប្រកាន់ គ្មានរឿងធំដុំ។
វិទ្យុអាស៊ីសេរីនៅថ្ងៃនេះមិនអាចទាក់ទងសុំការបំភ្លឺពីមេធាវី២រូប គឺលោក ខេង លី និងលោក តាន់ ម៉េងស្រូយ អ្នកការពារនិងតំណាងឲ្យនាយទាហានជាន់ខ្ពស់នៃកងយោធពលខេមរភូមិន្ទទាំង២២រូបដែលបានទទួលសញ្ញាបត្រនោះបានទេ។
មន្រ្តីការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ក្នុងឆ្នាំ២០០៩ ការប្តឹងអ្នកតំណាងរាស្រ្តនៃគណបក្សនយោបាយមានច្រើននៅក្នុងប្រព័ន្ធតុលាការដែលនាំឲ្យមានការព្រួយបារម្ភ ដូចជារឿងលោក ហូរ វ៉ាន់ នេះ ជារឿងអាចនិយាយគ្នាបានដោយគាត់បានកែតម្រូវជាបន្តបន្ទាប់រួចមកហើយ ប៉ុន្តែរាល់ការបញ្ចេញមតិ ទាំងអ្នកសារព័ត៌មាន ទាំងអ្នកតំណាងរាស្រ្ត គេតែងតែយកច្បាប់ព្រហ្មទណ្ឌមកចោទប្រកាន់ជាបទបរិហារកេរ្តិ៍ ញុះញង់ គេមិនបានប្រើច្បាប់សារព័ត៌មានឡើយនាំឲ្យទស្សនៈក្នុងការបញ្ចេញមតិនានាក្នុងសង្គមទៅជាចង្អៀត៕