តំណាងរាស្ត្របក្សសមរង្ស៊ីត្រូវគេបដិសេធមិនឲ្យជួប ហង្ស ចក្រា

ដោយ ឡេង ម៉ាលី

2009-07-03

អ្នកតំណាងរាស្រ្តគណបក្សប្រឆាំងបានគ្រោងនឹងចូលទៅសួរសុខទុក្ខចាងហ្វាងកាសែត ខ្មែរម្ចាស់ស្រុក លោក ហង្ស ចក្រា នៅថ្ងៃសុក្រនេះ ប៉ុន្តែអ្នកទទួលខុសត្រូវនៅពន្ធនាគារបដិសេធ។

អ្នកស្រី កែ សុវណ្ណរតន៍ អ្នកតំណាងរាស្រ្តគណបក្សសមរង្ស៊ីនៅមណ្ឌលសៀមរាប បានបញ្ជាក់ថា ពួកគេនឹងព្យាយាមធ្វើការស្នើសុំជាថ្មីទៀត។

អ្នកស្រី កែ សុវណ្ណរតន៍ បានឲ្យដឹងថា ៖ «យើងបានដាក់លិខិតទៅហើយ ហើយតាមចៅក្រមជំនុំជម្រះ ហើយគាត់បានឆ្លើយជាផ្ទាល់មាត់ មិនបានជាលាយលក្ខណ៍អក្សរទេ ថាយើងអាចទៅជួបបាន ប៉ុន្តែព្រឹកមិញហ្នឹងពន្ធនាគារបានឆ្លើយថា ដោយសារគ្មានចំណារជាលាយលក្ខណ៍អក្សរ អ៊ីចឹងខាងពន្ធនាគារមិនហ៊ានទទួលខុសត្រូវ។ យើងត្រូវរៀបចំឯកសារបន្តទៀត»។

ប្រធានពន្ធនាគារព្រៃស លោក ម៉ុង គឹមហេង បានអះអាងថា លោកមិនទាន់ឃើញសំណើសុំចូលជួបនោះនៅឡើយទេ ។ ខាងពន្ធនាគារនឹងអនុញ្ញាត បើសិនមានលិខិតបញ្ជាក់ណាមួយពីក្រសួងមហាផ្ទៃ ៖ «ការជួបជុំរបស់គាត់នេះ រាល់ការអនុញ្ញាតត្រូវសុំឆ្លងខាងក្រសួងមហាផ្ទៃ»។

ចាងហ្វាងកាសែតខ្មែរម្ចាស់ស្រុក លោក ហង្ស ចក្រា អាយុ៥៥ឆ្នាំ ត្រូវបានរដ្ឋាភិបាលប្តឹងផ្តល់នៅក្នុងបទសរសេរព័ត៌មានមិនពិត និងបទបរិហារកេរ្តិ៍ ក្រោយពីលោកបានសរសេរអត្ថបទមួយក្រោមចំណងជើងថា លោក ហ៊ុន សែន បំបែកសំបុកមន្ត្រីពុករលួយជុំវិញ លោក សុខ អាន និងអត្ថបទមួយទៀតក្រោមចំណងជើងថា មន្ត្រីនិយមលោក សុខ អាន នឹងប្រឈមមុខក្នុងការដកចេញពីតំណែង។

លោក ហង្ស ចក្រា ត្រូវបានតុលាការកាត់ទោសដាក់ពន្ធនាគារចំនួន១ឆ្នាំ និងពិន័យជាប្រាក់៩លានរៀល៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។