តំណាងរាស្ត្រគណបក្សប្រឆាំងចំនួន ១៣រូប បានសម្ដែងការព្រួយបារម្ភថា ការតែងតាំងទីប្រឹក្សារបស់លោក ងួន ញ៉ិល អនុប្រធានសភាជាតិកម្ពុជា រហូតដល់ចំនួន ៧១រូប អាចបណ្ដាលឲ្យរដ្ឋាភិបាលកម្ពុជា គ្មានថវិកាជាតិដើម្បីដំឡើងប្រាក់បៀវត្សរ៍ដល់មន្ត្រីរាជការ និងកងកម្លាំងប្រដាប់អាវុធ។ អ្នកតំណាងរាស្ត្រ ក៏បានស្នើឲ្យរដ្ឋាភិបាលកម្ពុជា ចាត់វិធានការបញ្ឈប់ភាពមិនប្រក្រតីនេះ។
តំណាងរាស្ត្រគណបក្ស សម រង្ស៊ី នៅមណ្ឌលព្រៃវែង លោក ជា ប៉ូច មានប្រសាសន៍ប្រាប់វិទ្យុអាស៊ីសេរី នៅថ្ងៃសៅរ៍ ទី៤ ខែកញ្ញាថា ការតែងតាំងចំនួនទីប្រឹក្សាច្រើនហួសហេតុ វាបណ្ដាលឲ្យរដ្ឋាភិបាលកម្ពុជា ចំណាយថវិកាជាតិច្រើនដោយគ្មានប្រសិទ្ធភាព។
លោក ជា ប៉ូច មានប្រសាសន៍ដូច្នេះ ៖ «ទីប្រឹក្សា ៧១នាក់ច្រើនណាស់! ទីប្រឹក្សាហ្នឹងតើមានភារកិច្ចធ្វើអ្វីខ្លះ? ហើយនៅក្នុងប៊ុយរ៉ូ (ការិយាល័យ) ឬអត? តើជួយប្រជារាស្ត្របានប៉ុណ្ណា?»។
តំណាងរាស្ត្រគណបក្សប្រឆាំងចំនួន ១៣រូប កាលពីថ្ងៃទី២៧ ខែសីហា ក៏បានផ្ញើលិខិតទៅឲ្យប្រធានរដ្ឋសភាជាតិ លោក ហេង សំរិន ដើម្បីឲ្យពន្យល់ពីមូលហេតុអ្វីបានជាលោក ងួន ញ៉ិល មានទីប្រឹក្សារហូតទៅដល់ចំនួន ៧១រូប? លិខិតរបស់តំណាងរាស្ត្រគណបក្សប្រឆាំង បានឲ្យដឹងថា ក្នុងខែសីហានេះ រដ្ឋសភាចំណាយទឹកប្រាក់ជាង ១១២លានរៀល ជាប្រាក់ឧបត្ថម្ភសម្រាប់ជីវភាពឲ្យទីប្រឹក្សារបស់លោក ងួន ញ៉ិល។
លិខិតបានស្នើឲ្យលោក ហេង សំរិន ពន្យល់ពីការចំណាយដ៏សន្ធឹកសន្ធាប់នេះ ហើយប្រសិនបើការចំណាយនេះវាជាការពិតវិញនោះ លោក ហេង សំរិន ត្រូវមានវិធានការច្បាប់ជាបន្ទាន់ ដើម្បីបញ្ឈប់ភាពមិនប្រក្រតីនេះ ដោយអាជ្ញាធរសវនកម្មជាតិ ត្រូវតែធ្វើសវនកម្មលើការចំណាយនេះ ហើយប្រសិនបើរកឃើញភាពមិនប្រក្រតីនោះ រដ្ឋសភាត្រូវផ្ដល់ព័ត៌មានទៅអង្គភាពប្រឆាំងអំពើពុករលួយ និងតុលាការដើម្បីផ្ដន្ទាទោសអ្នកប្រព្រឹត្តខុស។
លោក ហេង សំរិន បានឆ្លើយតបទៅនឹងសំណួររបស់តំណាងរាស្ត្រគណបក្សប្រឆាំងចំនួន ១៣រូប ដោយសរសេរនៅលើលិខិតរបស់តំណាងរាស្ត្រគណបក្សប្រឆាំងថា ការតែងតាំងនេះជាឆន្ទានុសិទិ្ធរបស់គ្រប់ថ្នាក់ដឹកនាំ ដែលបានអនុវត្តស្របតាមនីតិវិធីច្បាប់។
វិទ្យុអាស៊ីសេរីមិនអាចសុំការអត្ថាធិប្បាយពីលោក ងួន ញ៉ិល បានទេ នៅថ្ងៃសៅរ៍ ទី៤ ខែកញ្ញា ប៉ុន្តែប្រធានគណៈកម្មការសេដ្ឋកិច្ចហិរញ្ញវត្ថុរដ្ឋសភា លោក ជាម យៀប នៅថ្ងៃសៅរ៍ មានប្រសាសន៍ថា លោក ងួន ញ៉ិល មានទីប្រឹក្សាដល់ទៅ ៧១រូប ពីព្រោះលោកជាអនុប្រធានទីមួយរដ្ឋសភា ដោយលោកត្រូវការព័ត៌មានទូទាំងប្រទេសសម្រាប់ការដឹកនាំកិច្ចប្រជុំរដ្ឋសភា។
លោក ជាម យៀប មានប្រសាសន៍ដូច្នេះ ៖ «ព្រោះគាត់ចង់ក្ដាប់បានឲ្យគ្រប់ខេត្តដែលគេប្ដឹងពីទំនាស់អីផ្សេងៗ គាត់ឲ្យទីប្រឹក្សាហ្នឹងទៅក្ដាប់សភាពការណ៍ហ្នឹង ដើម្បីរាយការណ៍ឲ្យគាត់»។
លោកបន្ថែមថា រដ្ឋសភានឹងមិនធ្វើសវនកម្មទៅលើការចំណាយរបស់រដ្ឋសភានោះទេ ហើយរដ្ឋសភាក៏នឹងមិនកាត់បន្ថយចំនួនទីប្រឹក្សារបស់លោក ងួន ញ៉ិល ដែរ។
លោក ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី២០ ខែសីហា បានព្រមាននឹងដកមន្ត្រីរដ្ឋាភិបាល កងទ័ព និងនគរបាលណា ដែលបានអន្តរាគមន៍ឲ្យមានការផ្លាស់ប្តូរ ឬតែងតាំងតំណែងមិនប្រក្រតីក្នុងស្ថាប័នរដ្ឋ។
ការព្រមានរបស់លោក ហ៊ុន សែន ធ្វើឡើងបន្ទាប់ពីមានមន្ត្រីរដ្ឋាភិបាល បាននិងកំពុងតែធ្វើអន្តរាគមន៍យកតំណែងជំនួសពីមន្ត្រីរដ្ឋាភិបាល កងទ័ព និងនគរបាលណាដែលបានចូលនិវត្តន៍។ លោក ហ៊ុន សែន ក៏បានបញ្ជាឲ្យផ្អាកការតែងតាំង និងរើសបុគ្គលិករដ្ឋគ្រប់ក្រសួងបន្ថែមទៀត ដោយសារការចំណាយបុគ្គលិករដ្ឋ បានចំណាយលើសចំនួនកំណត់៕