លោក យន្ត ថារូ អ្នកតំណាងរាស្ត្រគណបក្សសមរង្ស៊ី មានប្រសាសន៍ឲ្យវិទ្យុអាស៊ីសេរីដឹងតាមទូរស័ព្ទពីខេត្តព្រះវិហារ នៅថ្ងៃទី៦ ខែមេសា ថា គោលបំណងនៃការដាក់លិខិត គឺចង់ឲ្យកុលបុត្រខ្មែរជំនាន់ក្រោយចងចាំនូវប្រវត្តិសាស្ត្រដ៏ជូរចត់នៃការបាត់បង់ទឹកដីខ្មែរ នៅថ្ងៃទី៤ ខែមិថុនា ទៅប្រទេសវៀតណាម និងចង់ឲ្យពលរដ្ឋខ្មែរគ្រប់រូបយកថ្ងៃទី៤ ខែមិថុនា ជាទិវាប្រារព្ធពិធីកាន់ទុក្ខទាំងអស់គ្នា។
លោក យន្ត ថារូ បញ្ជាក់ពីគោលបំណងនៃការថ្វាយលិខិតទៅព្រះមហាក្សត្រដូច្នេះ ៖ «យើងយល់ថា ថ្ងៃទី៤ ខែមិថុនា ឆ្នាំ១៩៤៩ ជាថ្ងៃមួយធ្វើឲ្យខ្មែរទាំងអស់គ្នាមានការឈឺចាប់ និងសោកស្ដាយជាខ្លាំង ពីព្រោះថ្ងៃនោះបារាំងបានកាត់ទឹកដីខ្មែរទៅឲ្យវៀតណាមត្រួតត្រាដោយខុសច្បាប់»។
ដែនដីខ្មែរកម្ពុជាក្រោមរបស់ប្រទេសកម្ពុជា មានចំនួន ២១ខេត្តក្រុង និងមានទំហំ ៦៨.៩៦៥គីឡូម៉ែត្រក្រឡា ត្រូវបានអាណានិគមបារាំង កាត់ប្រគល់ទៅឲ្យប្រទេសវៀតណាមគ្រប់គ្រង កាលពីថ្ងៃទី៤ ខែមិថុនា ឆ្នាំ១៩៤៩ ដែលគិតមកដល់ពេលនេះមានរយៈពេល ៦១ឆ្នាំ។
បន្ថែមលើលិខិតទូលថ្វាយព្រះមហាក្សត្រ លោក តាំង សារៈ ប្រធានសមាគមខ្មែរកម្ពុជាក្រោមពិភពលោកប្រចាំប្រទេសកម្ពុជា បានសាទរ និងបានចាត់ទុកគំនិតផ្ដួចផ្ដើមរបស់ក្រុមអ្នកតំណាងរាស្ត្រគណបក្សសមរង្ស៊ី ដែលបានដាក់លិខិតទៅព្រះមហាក្សត្រដាក់ថ្ងៃទី៤ ខែមិថុនា ជាទិវាកាន់ទុក្ខ នៃការបាត់បង់ទឹកដីខ្មែរទៅបរទេសថា មានសារសំខាន់បំផុតសម្រាប់ពលរដ្ឋខ្មែរ។
លោក តាំង សារៈ បញ្ជាក់ឲ្យដឹងដូច្នេះ ៖ «ខ្ញុំមិនថា គណបក្សណាទេ ជាពិសេសតំណាងរាស្ត្រទាំង៩រូបហ្នឹងដែលមានការយកចិត្តទុកដាក់ ហើយនិងមានការសោកស្ដាយស្រណោះ និងការអាណិតអាសូរចំពោះបងប្អូនខ្មែរកម្ពុជាក្រោម ដែលក្រោយពីថ្ងៃទី៤ ខែមិថុនា ឆ្នាំ១៩៤៩ ដែលបារាំងបានចុះហត្ថលេខាប្រគល់ទឹកដីកូសាំងស៊ីន បច្ចុប្បន្នជាទឹកដីខ្មែរកម្ពុជាក្រោម នៅក្រោមការគ្រប់គ្រងរបស់រដ្ឋអំណាចវៀតណាមដោយខុសច្បាប់ហ្នឹង ធ្វើឲ្យខ្មែរកម្ពុជាក្រោមទទួលរងទុក្ខវេទនា»។
ទោះយ៉ាងនេះក្ដី លោក ទិត សុធា ទីប្រឹក្សារាជរដ្ឋាភិបាល និងជាមន្ត្រីនាំពាក្យអង្គភាពព័ត៌មានប្រតិកម្មរហ័សនៃទីស្ដីការគណៈរដ្ឋមន្ត្រី មានប្រសាសន៍ឲ្យវិទ្យុអាស៊ីសេរី ដឹងនៅថ្ងៃទី៦ ខែមេសា ដោយបានចាត់ទុកការដាក់លិខិតរបស់តំណាងរាស្ត្របក្សប្រឆាំងថា ឆ្លៀតកេងចំណេញខាងផ្នែកនយោបាយ និងមានបំណងចង់បំបែកបំបាក់មិត្តភាពរវាងប្រទេសទាំងពីរ។
លោក ទិត សុធា បន្តថា ការបាត់បង់ទឹកដីខ្មែរកម្ពុជាក្រោមមិនមែនមានតែតំណាងរាស្ត្របក្សប្រឆាំងនោះទេដែលមានការសោកស្ដាយនោះ សូម្បីប្រជាពលរដ្ឋខ្មែរទូទៅ ក៏ដូចជារដ្ឋាភិបាល និងមន្ត្រីបក្សប្រជាជនកម្ពុជា ក៏មានការសោកស្ដាយដូច្នេះគ្នាដែរ។ ដូច្នេះគណបក្សសមរង្ស៊ី កុំឆ្លៀតឱកាសកេងចំណេញផលប្រយោជន៍នយោបាយពីការបាត់បង់ទឹកដីខ្មែរកម្ពុជាក្រោមតទៅទៀត។
លោក ទិត សុធា មានប្រសាសន៍ដូច្នេះ ៖ «សូមឲ្យបក្សប្រឆាំងហ្នឹងកុំយកថ្ងៃនេះ សម្រាប់ជាប្រយោជន៍នយោបាយនៅពីក្រោយខ្នង»។
វិទ្យុអាស៊ីសេរីមិនទាន់អាចទំនាក់ទំនងមន្ត្រីខុទ្ទកាល័យព្រះមហាក្សត្រ ជុំវិញការដាក់លិខិតរបស់ក្រុមតំណាងរាស្ត្របក្សសមរង្ស៊ី ស្នើសុំព្រះករុណាព្រះរាជទានដាក់ថ្ងៃទី៤ ខែមិថុនា ជាថ្ងៃបុណ្យជាតិ ទិវាកាន់ទុក្ខបាននៅឡើយទេនៅថ្ងៃទី៦ ខែមេសានេះ៕