អគ្គលេខាធិការដ្ឋានគណបក្សសមរង្ស៊ី នៅថ្ងៃទី១៥ ធ្នូ ២០០៩នេះ បានចេញសេចក្តីប្រកាសព័ត៌មានមួយដើម្បីបដិសេធនូវការចោទប្រកាន់ចំពោះក្រុមអ្នកតំណាងរាស្រ្តគណបក្សសមរង្ស៊ី និងអ្នកគាំទ្រថា បានបង្កហេតុនិងធ្វើការវាយប្រហារទៅលើមន្រ្តីនគរបាលមានសមត្ថកិច្ចក្នុងអំឡុងពេលចុះពិនិត្យមើលតម្រុយព្រំដែននៅឃុំសំរោង ស្រុកចន្រ្ទា ខេត្តស្វាយរៀង កាលពីថ្ងៃទី១៤ ខែធ្នូ ឆ្នាំ២០០៩។
សេចក្តីប្រកាសព័ត៌មានបដិសេធនេះ ធ្វើឡើងបន្ទាប់ពីមានសេចក្តីរាយការណ៍របស់សារព័ត៌មានក្នុងស្រុកមួយចំនួនដែលបានដកស្រង់សម្តីមន្រ្តីនគរបាលខេត្តស្វាយរៀង ដោយនិយាយថា នៅក្នុងដំណើរចុះពិនិត្យតម្រុយព្រំដែននៅឃុំសំរោង ក្រុមអ្នកតំណាងរាស្រ្តគណបក្សសមរង្ស៊ីនិងអ្នកគាំទ្របានប្រើអំពើហិង្សាលើនគរបាលមានសមត្ថកិច្ចដែលប្រចាំការនៅទីនោះ ធ្វើឲ្យរបួសចំនួន១៥នាក់៕