លោកស្រី កែ សុវណ្ណរតន៍ អគ្គលេខាធិការស្តីទីគណបក្សសមរង្ស៊ីបានមានប្រសាសន៍ប្រាប់វិទ្យុអាស៊ីសេរីនៅល្ងាចថ្ងៃអង្គារនេះថា ការធ្វើសមាជវិសាមញ្ញនេះគឺដើម្បីរៀបចំពង្រឹងគោលនយោបាយសមាជិកក្រុមប្រឹក្សាឃុំសង្កាត់របស់បក្ស។
លោកស្រី កែ សុវណ្ណរតន៍ បានមានប្រសាសន៍ថា ៖ «ដោយសារថាឆ្នាំ២០០៩នេះនឹងមានការរៀបចំបោះឆ្នោតអសកលមួយដែលជ្រើសរើសក្រុមប្រឹក្សារាជធានី ខេត្ត ស្រុក ខណ្ឌ។ ដោយសារថាការបោះឆ្នោតនេះអង្គបោះឆ្នោតគឺក្រុមប្រឹក្សាឃុំសង្កាត់ដែលកំពុងនៅក្នុងតំណែងជាអ្នកបោះឆ្នោត ហើយការបោះឆ្នោតនេះគឺបោះឆ្នោតដោយអសកល អ៊ីចឹងហើយគណបក្សក៏សម្រេចធ្វើសមាជមួយគឺជាសមាជវិសាមញ្ញ»។
សមាជវិសាមញ្ញនេះនឹងមានសកម្មជនតំណាងគណបក្សខេត្ត ក្រុង ចូលរួមចំនួនប្រមាណ២៥០០នាក់។
លោកស្រី កែ សុវណ្ណរតន៍ បានមានប្រសាសន៍ទៀតថា នៅក្នុងសមាជវិសាមញ្ញនោះគឺដើម្បីឲ្យសមាជិកក្រុមប្រឹក្សាឃុំសង្កាត់នៅក្នុងតំណែងឲ្យត្រៀមខ្លួនក្នុងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌនោះដែរ។
លោកស្រី កែ សុវណ្ណរតន៍ បានបញ្ជាក់ថា ៖ «សមាជវិសាមញ្ញនេះក្នុងគោលបំណងជួបជុំជាមួយនឹងសមាជិកគណបក្សសមរង្ស៊ីដែលជាក្រុមប្រឹក្សាឃុំសង្កាត់ ថ្នាក់ដឹកនាំគណបក្សសមរង្ស៊ីខេត្ត ក្រុង ដើម្បីពង្រឹងរចនាសម្ព័ន្ធគណបក្សឡើងវិញ។ ទី២ គឺរៀបចំយុទ្ធសាស្ត្ររបស់គណបក្សដើម្បីចូលរួមក្នុងការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌនេះ»។
សូមបញ្ជាក់ថា គណបក្សសមរង្ស៊ីបានបង្កើតឡើងតាំងពីថ្ងៃទី៩ ខែវិច្ឆិកា ឆ្នាំ១៩៩៥មក ដែលមកដល់ពេលនេះមានរយៈពេល១៣ឆ្នាំដែលបានប្តូរមកពីឈ្មោះគណបក្សជាតិខ្មែរ មានរូបព្រះបាទ ជយវរ្ម័នទី៧ ជាសញ្ញាសម្គាល់ មកជាគណបក្សសមរង្ស៊ីមានរូបភ្លើងទានជាសញ្ញាសម្គាល់វិញ ហើយមានសមាជិកគណៈអចិន្ត្រៃយ៍ចំនួន១៥រូប មានសមាជិកគណៈកម្មការនាយកចំនួន៩៣រូប មានរចនាសម្ព័ន្ធថ្នាក់ជាតិរហូតដល់រចនាសម្ព័ន្ធដល់ថ្នាក់ភូមិទាំង២៤ខេត្តក្រុង រួមជាមួយនឹងសាខានៅក្រៅប្រទេសផងដែរ។
គណបក្សសមរង្ស៊ីមានសមាជិកសភាព្រឹទ្ធសភាចំនួន២រូប សមាជិករដ្ឋសភាចំនួន២៦រូប និងសមាជិកក្រុមប្រឹក្សាឃុំសង្កាត់ចំនួន២៦៦០រូប។
លោកស្រី កែ សុវណ្ណរតន៍ បានថ្លែងថា ៖ «គណបក្សសមរង្ស៊ីមានសាខានៅក្រៅប្រទេសទៀត មានន័យថា មានរចនាសម្ព័ន្ធតាំងពីលើរហូតដល់ក្រោមហើយមានសាខានៅឯនាយសមុទ្រ។ ពីលើដល់ក្រោមហ្នឹងមានន័យថា តាំងពីថ្នាក់ជាតិ ថ្នាក់ខេត្ត ថ្នាក់ស្រុក ថ្នាក់ឃុំ រហូតដល់ថ្នាក់ភូមិ»។
គណបក្សសមរង្ស៊ីធ្លាប់បានចូលរួមបោះឆ្នោតជ្រើសរើសសមាជិកសភាជាតិចំនួន៣លើករួចមកហើយ និងចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់ចំនួនពីរលើក៕