បក្សសមរង្ស៊ីត្រៀមធ្វើពិធីរំឭកវិញ្ញាណក្ខន្ធអ្នកស្លាប់នៅថ្ងៃ៥-៦ កក្កដា
ay.mp3
លោក យឹម សុវណ្ណ មន្ត្រីនាំពាក្យគណបក្ស សម រង្ស៊ី មានប្រសាសន៍ថា នៅព្រឹកថ្ងៃសុក្រ ទី៦ ខែកក្កដា នាទីស្នាក់ការថ្មីគណបក្ស សម រង្ស៊ី ខណ្ឌមានជ័យ មានប្រារព្ធពិធីបុណ្យបង្សុកូល និងរាប់បាត្រព្រះសង្ឃចំនួន ២០អង្គ ដើម្បីឧទ្ទិសដល់វិញ្ញាណក្ខន្ធអ្នកស្លាប់ក្នុងព្រឹត្តិការបង្ហូរឈាម ថ្ងៃទី៥-៦ ខែកក្កដា ឆ្នាំ១៩៩៧។
ការរៀបចំពិធីបុណ្យនេះ លោក យឹម សុវណ្ណ បញ្ជាក់ថា មិនមែនដើម្បីកេងចំណេញនយោបាយដូចមេដឹកនាំគណបក្សខ្លះលើកឡើងនោះទេ ប៉ុន្តែជាការដឹងគុណដល់អ្នកស្នេហាជាតិដែលបានពលីជីវិតក្នុងបុព្វហេតុការពារជាតិមាតុភូមិ។
លោក យឹម សុវណ្ណ បន្ថែម៖ «អ្នកដែលបានជាប់ពាក់ព័ន្ធក្នុងថ្ងៃរដ្ឋប្រហារត្រូវតែទទួលខុសត្រូវចំពោះអាយុជីវិតនៃកងទ័ពរបស់យើងដែលបានបាត់បង់ជីវិតក្នុងថ្ងៃទាំងអស់នោះ។ ហើយធ្វើយ៉ាងម៉េចជៀសវាងកុំឲ្យមានការប្រព្រឹត្តអំពើហិង្សាបែបនេះទៀតក្នុងពេលអនាគត។ យើងមិនត្រូវអនុញ្ញាតឲ្យមានវប្បធម៌គ្មានទោសពៃរ៍នៃការកាប់សម្លាប់គ្នាចេះតែប្រព្រឹត្តទៅក្នុងសង្គមខ្មែរ ហើយវប្បធម៌គ្មានទោសពៃរ៍នេះ បានផ្ដល់នូវផលវិបាកគ្មានទីបញ្ចប់រហូតមកទល់បច្ចុប្បន្ននេះ ក៏នៅតែមានអ្នកដែលប្រើប្រាស់អំពើហិង្សាបាញ់សម្លាប់ប្រជាពលរដ្ឋអ្នកស្លូតត្រង់។ អ្នកទាំងអស់នោះក៏មិនទាន់បានទទួលខុសត្រូវ ហើយក៏មិនទាន់ទទួលទោសទណ្ឌទៅតាមច្បាប់នោះទេ»។
ក្នុងព្រឹត្តិការណ៍ផ្ទុះអាវុធថ្ងៃទី៥-៦ កក្កដា ឆ្នាំ១៩៩៧ បានបង្កឡើងដោយ គណបក្សហ៊្វុនស៊ិនប៉ិច គ្រានោះដឹកនាំដោយសម្ដេចក្រុមព្រះ នរោត្តម រណឫទ្ធិ បានប៉ះទង្គិចគ្នាជាមួយគណបក្សប្រជាជនកម្ពុជា។
ទោះយ៉ាងណា ប៉ុន្មានឆ្នាំចុងក្រោយនេះសាធារណជនបានកត់សម្គាល់ថា មេដឹកនាំគណបក្សហ៊្វុនស៊ិនប៉ិច មិនបានរៀបចំពិធីបុណ្យរំលឹកខួបព្រឹត្តិការណ៍ផ្ទុះអាវុធ ថ្ងៃទី៥-៦ ខែកក្កដា ដើម្បីឧទ្ទិសដល់វិញ្ញាណក្ខន្ធយុទ្ធជនពលីក្នុងហេតុការណ៍នោះទេ។
ត្រង់ចំណុចនេះ លោក ញឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិច បានបញ្ជាក់ថា រូបលោកមិនបានបំភ្លេចចោលជនរងគ្រោះក្នុងព្រឹត្តិការណ៍ផ្ទុះអាវុធថ្ងៃ៥-៦ កក្កដា ឆ្នាំ១៩៩៧ ទេ ប៉ុន្តែបានយកពិធីបុណ្យនេះរៀបចំក្នុងថ្ងៃបុណ្យភ្ជុំបិណ្ឌជំនួសវិញ។
លោក ញឹក ប៊ុនឆៃ ឲ្យដឹងដូច្នេះ៖ «រាល់ឆ្នាំយើងធ្វើនៅថ្ងៃបុណ្យភ្ជុំបិណ្ឌ ព្រោះគណៈកម្មាធិការនាយកបានយកពេលបុណ្យភ្ជុំបិណ្ឌធ្វើបុណ្យឧទ្ទិសកុសលជូនអ្នកដែលបានស្លាប់ទាំងអស់ មិនមែនតែថ្ងៃ៥-៦ កក្កដា ទេ គឺទាំងអ្នកតស៊ូតាំងពីស្លាប់នៅឆ្នាំ១៩៩៣ ទាំងអស់។ បើយើងធ្វើទៀតគឺច្រើនដងពេក ដូច្នេះគណៈកម្មការនាយកបានកំណត់យកពេលបុណ្យភ្ជុំបិណ្ឌយកទៅធ្វើពិធីនោះ ដែលស្របតាមប្រពៃណីរបស់ខ្មែរយើងផង។ ដូច្នេះបានជាយើងសម្រេចយកថ្ងៃបុណ្យភ្ជុំបិណ្ឌដើម្បីប្រារព្ធពិធីនេះ»។
ព្រឹត្តិការណ៍បង្ហូរឈាមថ្ងៃទី៥-៦ កក្កដា រវាងកម្លាំងស្មោះត្រង់សម្ដេចក្រុមព្រះ នរោត្តម រណឫទ្ធិ ដែលគ្រានោះព្រះអង្គជានាយករដ្ឋមន្ត្រីទី១ និងកម្លាំងគាំទ្រលោក ហ៊ុន សែន ជានាយករដ្ឋមន្ត្រីទី២ បានសម្លាប់មនុស្សរាប់រយនាក់។ គិតមកដល់ពេលនេះ ព្រឹត្តិការណ៍បង្ហូរឈាមថ្ងៃ៥-៦ កក្កដា ឆ្នាំ១៩៩៧ មានរយៈពេល ១៥ឆ្នាំទៅហើយ ប៉ុន្តែមិនមានអ្នកនយោបាយណាម្នាក់ចេញមុខទទួលខុសត្រូវចំពោះកំហុសឆ្គង ឬទង្វើរបស់ខ្លួននោះទេ ហើយគ្រួសារជនរងគ្រោះមិនបានទទួលយុត្តិធម៌នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ស្ថាបនា
ពី ភ្នំពេញគណបក្សសមរង្សីច្រើនតែយកសាកសពធ្វើ
អាជីវកម្មនយោបាយ។វាគ្មានអីចំណេញទេ
គួរតែបញ្ឈប់ទៅ ក្រែងវាត្រូវបណ្តាសារជនរងគ្រោះ។
Jul 06, 2012 12:13 AM
ជនរងគ្រោះព្រោះអំណាច
យល់ស្រប តែទោះបីជាយ៉ាងណាក៏ប្រសើរជាងបក្សខ្លះ ធ្វើឲ្យមានសាកសព និងឈាមស្រោចពេញដីដើម្បីរក្សារឫដណ្តើមអំណាចរបស់ខ្លួន។
Jul 08, 2012 09:25 PM
newVietBodian
ពី HannompenhHistory shows Cambodia is fully of coward politicians, they never bare any responsibilities for their mistakes, they always shamelessly denied it or point their finger to other guys even though evidents and witnesses prove they 's done it. Like the loss of Kampuchea Krom to Vietnam, The Khmer Rouge Genocide that killed over one million innocent people, The bloody coupe 5, 6 of July 1997,
Jul 05, 2012 10:42 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
