គណបក្ស សម រង្ស៊ី នឹងធ្វើសមាជគណបក្សត្រៀមខ្លួនស្វែងរកជ័យជម្នះសម្រាប់ការបោះឆ្នោតនៅពេលខាងមុខដោយគណបក្សនៅតែសង្ឃឹមថា ប្រធានគណបក្ស លោក សម រង្ស៊ី នឹងអាចចូលរួមការបោះឆ្នោតនៅកម្ពុជា។
ការប្រកាសគម្រោងសមាជគណបក្ស ធ្វើឡើងបន្ទាប់ពីមន្ត្រីជាន់ខ្ពស់គណបក្សប្រជាជនកម្ពុជា បានប្រកាសជាសាធារណៈថា លោក សម រង្ស៊ី ត្រូវតែជាប់ពន្ធនាគារគ្រប់ចំនួនសិនទើបអាចចូលរួមប្រកួតការបោះឆ្នោតបាន។
តំណាងរាស្ត្រគណបក្ស សម រង្ស៊ី លោកស្រី មូរ សុខហួរ មានប្រសាសន៍កាលពីថ្ងៃពុធ ទី៣ សីហា ថា សមាជគណបក្សជាការពង្រឹងចលនាបក្សសម្រាប់ការបោះឆ្នោតដោយគ្មានលើកបញ្ហាលោក សម រង្ស៊ី មកពិភាក្សានោះទេ។
លោក សម រង្ស៊ី បច្ចុប្បន្នកំពុងស្នាក់នៅនិរទេសខ្លួនទៅប្រទេសបារាំង ពីការតាមចាប់របស់សមត្ថកិច្ចរដ្ឋាភិបាលភ្នំពេញ ក្រោយពីតុលាការបានកាត់ទោសឲ្យលោកជាប់ពន្ធនាគារច្រើនជាង ១០ឆ្នាំ ពីបទរិះគន់បង្គោលតម្រុយព្រំដែនខ្មែរ និងវៀតណាម។
លោកស្រី មូរ សុខហួរ បន្តថា រដ្ឋាភិបាលដែលដឹកនាំដោយគណបក្សប្រជាជនកម្ពុជា ត្រូវអនុញ្ញាតឲ្យមានវត្តមានលោក សម រង្ស៊ី ចូលរួមការបោះឆ្នោត ដើម្បីឲ្យការប្រកួតប្រជែងមួយនេះមានភាពយុត្តិធម៌ ៖ «លោកប្រធាន សម រង្ស៊ី មានវត្តមាននៅប្រទេសកម្ពុជាយើង ហើយវត្តមានរបស់លោក សម រង្ស៊ី ក្នុងពេលបោះឆ្នោត ២០១២ និង ២០១៣ ជាការចាំបាច់បំផុតមិនអាចបដិសេធបានទេ...»។
ទោះបីលោក សម រង្ស៊ី កំពុងរស់នៅនិរទេសខ្លួននៅបរទេសក៏ដោយ ក៏លោក សម រង្ស៊ី នៅតែបន្តដឹកនាំប្រឆាំងគោលនយោបាយរដ្ឋាភិបាលស្ដីពីការស្វែងរកដំណោះស្រាយបញ្ហាព្រំដែន និងបញ្ហាលទ្ធិប្រជាធិបតេយ្យមួយចំនួនទៀត។
ថ្មីៗនេះលោក សម រង្ស៊ី បានអំពាវនាវឲ្យពលរដ្ឋខ្មែរក្រោកឡើងបះបោរប្រឆាំងនឹងរដ្ឋាភិបាល ដោយបង្កើតឲ្យមានជាបដិវត្តន៍ផ្កាឈូក។ លោក សម រង្ស៊ី ក៏បានទាមទារឲ្យមន្ត្រីដឹកនាំរដ្ឋាភិបាលចុះចេញពីតំណែង ដោយសារតែការបរាជ័យដោះស្រាយបញ្ហាព្រំដែនក្បែរប្រាសាទព្រះវិហារ។
ពីទីក្រុងប៉ារីស លោក សម រង្ស៊ី នៅតែសម្ដែងក្ដីសង្ឃឹមថា លោកនឹងមានវត្តមាននៅកម្ពុជា សម្រាប់ការបោះឆ្នោត ពីព្រោះស្ថានភាពនៅកម្ពុជា នឹងមានការផ្លាស់ប្ដូរ ៖ «ខ្ញុំជឿថា នឹងមានការប្រែប្រួលពីហ្នឹងទៅឆ្នាំ២០១២ ២០១៣ វាមានពេលវេលាយូរគួរសមដែរ ហើយឃើញមានព្រឹត្តិការណ៍ថ្មីៗកំពុងតែកើតនៅទូទាំងពិភពលោក ឃើញរបបផ្ដាច់ការដួលរលំម្ដងមួយៗ ដូច្នេះមិនអាចជនផ្ដាច់ការចង់អះអាងអ្វីបានស្រេចតែចិត្តរបស់គេទេ។ ខ្ញុំជឿថា កម្លាំងប្រជារាស្ត្រនឹងមានការផុលផុសកាន់តែខ្លាំងឡើង នឹងនាំមកនូវការផ្លាស់ប្ដូរនៅប្រទេសកម្ពុជា»។
ការអះអាងរបស់លោក សម រង្ស៊ី ត្រូវបានតំណាងរាស្ត្រគណបក្សប្រជាជនកម្ពុជា លោក ជាម យៀប បានបដិសេធថា ការលើកឡើងនេះមិនអាចក្លាយជាការពិត ដោយសារតែលោក សម រង្ស៊ី ត្រូវប្រឈមមុខជាប់ពន្ធនាគារជាមុនសិនមុននឹងអាចឈរឈ្មោះបោះឆ្នោតបាន។
លោកបន្តថា គណបក្សប្រជាជនកម្ពុជា មិនមែនខ្លាចប្រជាប្រិយភាពលោក សម រង្ស៊ី ក្នុងការដណ្ដើមអំណាចនោះទេ ហើយករណីលោក សម រង្ស៊ី ក៏មិនមែនជាករណីនយោបាយផងដែរ ៖ «បុគ្គល សម រង្ស៊ី ប្រជាប្រិយភាពរបស់គាត់ បើគាត់ចំណាប់ណាស់គាត់ឈ្នះឆ្នោតហើយ មិនមែនបុគ្គលហ្នឹងអាចជាន់កម្ពុជាភ្លាម ឬក្រឡាប់អី អត់»។
លោក ជាម យៀប ធ្លាប់បានប្រាប់វិទ្យុអាស៊ីសេរីថា លោក សម រង្ស៊ី អាចវិលត្រឡប់មកកម្ពុជា វិញបាន លុះត្រាតែលោកឈប់រិះគន់រដ្ឋាភិបាល។ លោក ហ៊ុន សែន នាយករដ្ឋមន្ត្រីធ្លាប់បានប្រកាសជាសាធារណៈហើយថា រដ្ឋាភិបាលនឹងមិនសុំការលើកលែងទោសពីព្រះមហាក្សត្រឲ្យលោក សម រង្ស៊ី បើទោះបីជាលោក សម រង្ស៊ី សរសេរសំបុត្រទៅលោកដើម្បីសុំឲ្យមានការលើកលែងទោស។
លោក សម រង្ស៊ី ធ្លាប់បានសម្ដែងក្ដីសង្ឃឹមថា ការវិលត្រឡប់របស់លោកនឹងកើតឡើងនៅពេលដែលកម្ពុជា មានបដិវត្តន៍ផ្លាស់ប្ដូររដ្ឋាភិបាល។ ក្ដីសង្ឃឹមរបស់លោក សម រង្ស៊ី ត្រូវបានលោក ហ៊ុន សែន ទាត់ចោល និងគំរាមថា បដិវត្តន៍បែបពិភពអារ៉ាបនឹងមិនអាចកើតមានឡើងនៅកម្ពុជានោះទេ។
លោក ហ៊ុន សែន បានគំរាមថា នឹងប្រើប្រាស់អ្នកគាំទ្រគណបក្សប្រជាជនកម្ពុជា ដើម្បីបង្ក្រាបការទាមទារទម្លាក់លោកចេញពីតំណែង៕