កាលពីថ្ងៃទី២ ខែឧសភា សមាជិកគណបក្ស សម រង្ស៊ី ឃុំរវៀង ស្រុកសំរោង ខេត្តតាកែវ ត្រូវបានសមាជិកគណបក្សប្រជាជនកម្ពុជា គំរាមសម្លាប់។ មួយថ្ងៃក្រោយមក លោក ញ៉ិល ភាព បានដាក់ពាក្យប្តឹងលោក តឹម យឿន ទៅអាជ្ញាធរ ដើម្បីរកដំណោះស្រាយ។
សំណុំរឿងប្ដឹងផ្ដល់របស់សមាជិកគណបក្ស សម រង្ស៊ី ប្ដឹងសមាជិកគណបក្សប្រជាជនកម្ពុជា ឃុំរវៀង ស្រុកសំរោង ខេត្តតាកែវ ឈានមកដល់ទីបញ្ចប់តាំងពីថ្ងៃទី៤ ខែឧសភា ឆ្នាំ២០១២ ដោយតម្រូវឲ្យចុងចម្លើយសារភាពកំហុស និងធ្វើកិច្ចសន្យាថា ឈប់និយាយពាក្យគំរាមកំហែងគេទៀត។
ភាគីដើមបណ្ដឹង លោក ញ៉ិល ភាព មានប្រសាសន៍ថា គណៈកម្មការឃុំរៀបចំការបោះឆ្នោត បានកោះហៅលោក និងចុងចម្លើយជួបគ្នាដើម្បីធ្វើការសម្របសម្រួល។
លោកបន្តថា ភាគីម្ខាងទៀតបានសារភាពទទួលកំហុស ព្រមទាំងចុះកិច្ចសន្យាជាលាយលក្ខណ៍អក្សរទៀតផង ប៉ុន្តែលោកមិនទុកចិត្ត ១០០% នោះឡើយ៖ «គាត់បានធ្វើកិច្ចសន្យាថា អត់ធ្វើបែបហ្នឹងតទៅទៀត។ ចិត្តខ្ញុំនៅតែមានការភ័យខ្លាច។ ខ្ញុំនៅបន្តដាក់ពាក្យបណ្ដឹងនៅព្យួរនៅប៉ុស្តិ៍ហ្នឹង សម្រាប់ថ្ងៃក្រោយយើងមានរឿងអីកើតឡើងចំពោះខ្លួនយើង យើងអាចយកលិខិតទាំងអស់ហ្នឹងមកធ្វើជាភស្តុតាង»។
លោក ញ៉ិល ភាព បានបន្តថា ចំណុចដែលគួរឲ្យចាប់អារម្មណ៍ត្រង់ថា មន្ត្រីគណបក្សប្រជាជនឃុំនោះបានហៅសាក្សីនៅកន្លែងកើតទំនាស់ទៅសួរនាំ និងបានបដិសេធថា លោក ទឹម យឿន មិនមែនជាសកម្មជនរបស់ខ្លួនទៀតទេ។
ប្រធានគណៈកម្មការឃុំរៀបចំការបោះឆ្នោត លោក សួន សុគន្ធ មានប្រសាសន៍ថា រឿងនេះមិនមានអ្នកណានៅពីក្រោយខ្នងចុងចម្លើយទេ ដោយភាគីគណបក្សប្រជាជននិយាយដដែលៗថា អ្នកណាធ្វើអ្នកហ្នឹងទទួលខុសត្រូវ។
លោកបន្តថា ការព្រួយបារម្ភរបស់លោក ញ៉ិល ភាព ជារឿងត្រឹមត្រូវ៖ «ដាក់តម្កល់បណ្ដឹងដើម្បីរក្សាសុវត្ថិភាពទៅថ្ងៃមុខ និងព្រមានចុងចម្លើយកុំឲ្យធ្វើបែបនេះទៀតផង»។
វិទ្យុអាស៊ីសេរីមិនអាចទាក់ទងសុំការបំភ្លឺពីភាគីចុងចម្លើយ លោក ទឹម យឿន បានទេ។ ក៏ប៉ុន្តែសមត្ថកិច្ចមូលដ្ឋានបានលើកឡើងថា លោក ទឹម យឿន ពិតជាបានសារភាពកំហុសលើបញ្ហានេះប្រាកដមែន។ រឿងក្ដីក្ដាំនេះត្រូវបានអាជ្ញាធរមូលដ្ឋានធានាថា ក្រុមខ្លួនហ្នឹងប្រើតួនាទីដោះស្រាយដោយសុក្រឹតមិនលំអៀងឡើយ។
លោក កឹម ណឹល ជាមេឃុំមកពីគណបក្សប្រជាជនកម្ពុជា មានប្រសាសន៍ថា រឿងនេះជារឿងបុគ្គល។ យ៉ាងណាក៏ដោយ លោកនឹងប្រើតួនាទីជាមេឃុំកោះហៅភាគីទាំងពីមកនិយាយបន្ថែមទៀតដើម្បីបំបាត់ភាពសៅហ្មង៖ «យើងខ្ញុំមិនប្រកាន់និន្នាការនយោបាយ ទេ ព្រោះមានតួនាទីការពារទាំងអស់តែម្តង យើងនឹងហៅមកណែនាំបន្ថែមទៀត បើចេះតែលើកឡើងវាមានបញ្ហា»។
នាយប៉ុស្តិ៍នគរបាលឃុំរវៀង លោក ស តារា មានប្រសាសន៍ថា លោកបានតាមដាន និងស៊ើបអង្កេតរួចរាល់ហើយ វាគ្រាន់តែជារឿងយល់ច្រឡំ។ លោកបន្តថា បើមានករណីនេះកើតឡើងនៅថ្ងៃក្រោយទៀត លែងជារឿងយល់ច្រឡំហើយ សមត្ថកិច្ចនឹងធ្វើការងារតាមច្បាប់ ហើយលោកសូមឲ្យដើមបណ្ដឹងកុំមានការបារម្ភ។
លោក ស តារា៖ «គេតម្កល់នេះ គឺការពារករណីកើតមានអំពើហិង្សាថ្ងៃក្រោយ បើសិនមានលើកក្រោយ នឹងទទួលខុសត្រូវចំពោះមុខច្បាប់»។
ទាក់ទងនឹងទំនាស់នេះ ច្បាប់បោះឆ្នោតមាត្រាទី១៧៨ថ្មី បានចែងថា ត្រូវលុបឈ្មោះចេញពីបញ្ជីបោះឆ្នោត លុបឈ្មោះចេញពីបញ្ជីសាមីខ្លួន ឬលុបឈ្មោះបេក្ខភាពឈរឈ្មោះបោះឆ្នោតរបស់គណបក្សនយោបាយ ដោយគណៈកម្មការជាតិរៀបចំការបោះឆ្នោត ឬផ្ដន្ទាទោសពិន័យជាប្រាក់ពី ៥លាន ទៅ ២៥លានរៀល ដោយពុំទាន់គិតពីទោសព្រហ្មទណ្ឌផ្សេងទៀត ចំពោះជនណា និងគណបក្សនយោបាយណាដែលបានប្រព្រឹត្តអំពើ ដូចជា ញុះញង់ឲ្យអ្នកគាំទ្រ ឬអ្នកបោះឆ្នោតប្រព្រឹត្តអំពើរំលោភបំពាន អំពើគំរាមកំហែងទៅលើបេក្ខជន ឬគណបក្សនយោបាយដទៃ។ ធ្វើការគាបសង្កត់ ឬគំរាមកំហែង ឬបង្ខំឲ្យគេបោះឆ្នោតឲ្យគណបក្សនយោបាយរបស់ខ្លួន ឬគណបក្សនយោបាយណាមួយដែលខ្លួនចូលចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។