មន្ត្រីគណបក្ស សម រង្ស៊ី ក៏បានទាមទារឲ្យរដ្ឋាភិបាលបង្ហាញតម្លាភាពពីកិច្ចព្រមព្រៀង និងការការពារបូរណភាពសមុទ្រកម្ពុជា។
ក្ដីបារម្ភនេះ កើតឡើងបន្ទាប់ពីមានសេចក្ដីរាយការណ៍របស់កាសែតថៃ កាលពីថ្ងៃអង្គារ ទី១៦ ខែសីហា ថា លោក ថាក់ស៊ីន នឹងដឹកនាំគណៈប្រតិភូវិនិយោគទុនមួយចំនួនមកកម្ពុជា នៅថ្ងៃទី១៩ និង ២០ ខែសីហា នេះ ដើម្បីចរចារឿងបែងចែកផលប្រេងកាត និងឧស្ម័ន ក្នុងឈូងសមុទ្រថៃ នៅពេលដែលព្រំដែនសមុទ្រប្រទេសទាំងពីរមិនទាន់បានកំណត់ច្បាស់លាស់។
អ្នកនាំពាក្យគណបក្ស សម រង្ស៊ី លោក យឹម សុវណ្ណ កាលពីថ្ងៃពុធ ទី១៧ ខែសីហា បានសម្ដែងការស្វាគមន៍គម្រោងធ្វើវិនិយោគទុននៅកម្ពុជា ប៉ុន្តែគម្រោងនោះត្រូវតែធ្វើឡើងដើម្បីប្រយោជន៍ពលរដ្ឋកម្ពុជា មិនមែនដើម្បីបុគ្គល ៖ «គោលការណ៍សំខាន់គឺកុំឲ្យបាត់បង់ដីរបស់ខ្មែរ។ យើងមានក្របខ័ណ្ឌច្បាប់នៅអន្តរជាតិ យើងត្រូវឲ្យអ្នកភូមិផងរបងយើងគោរពបូរណភាពទឹកដីរបស់យើង។ សេចក្ដីសម្រេចណាក៏ដោយ គឺមិនប៉ះពាល់ដល់ដីយើង»។
កាលពីដើមឆ្នាំ២០១០ កន្លងទៅនេះ លោកនាយករដ្ឋមន្ត្រី ហ៊ុន សែន បានអះអាងថា ក្រុមហ៊ុនឈ្មោះ ឆេវរ៉ុន (Chevron) សហរដ្ឋអាមេរិក ដែលបានរកឃើញអណ្ដូងប្រេងចំនួន ៤កន្លែង នៅបាតសមុទ្ទកម្ពុជា ក្នុងខេត្តព្រះសីហនុ។ ក្រុមហ៊ុននេះនឹងបូមយកដំណក់ប្រេងដំបូងនៅថ្ងៃទី១២ ខែ១២ ឆ្នាំ២០១២ នៅវេលាម៉ោង ១២យប់។
កាសែតថៃផ្សាយបន្តថា លោក ថាក់ស៊ីន អតីតទីប្រឹក្សាសេដ្ឋកិច្ចកម្ពុជា និងទីប្រឹក្សាផ្ទាល់របស់លោក ហ៊ុន សែន បានបញ្ជាឲ្យរដ្ឋមន្ត្រីឧស្សាហកម្មថៃ រៀបចំផែនការសហការនឹងកម្ពុជា ដើម្បីបង្កើតកិច្ចព្រមព្រៀងក្នុងវិស័យប្រេងកាត។ លោកចង់ឲ្យក្រុមហ៊ុនរដ្ឋថៃ ឈ្មោះថា ភីធីធី (PTT) មានភាគហ៊ុនក្នុងវិនិយោគទុននេះផងដែរ។
ក្នុងដំណើរទស្សនកិច្ចរបស់លោកមកកម្ពុជា ក្នុងសប្ដាហ៍នេះ លោក ថាក់ស៊ីន ក៏គ្រោងនឹងលេងកីឡាវាយកូនគោលជាមួយនឹងលោក ហ៊ុន សែន និងរដ្ឋមន្ត្រីក្រសួងការពារជាតិ លោក ទៀ បាញ់។
រដ្ឋាភិបាលកម្ពុជា នៅមិនទាន់បញ្ជាក់ពីវត្តមានលោក ថាក់ស៊ីន នៅកម្ពុជា នៅឡើយទេ។
លោក ទៀ បាញ់ កាលពីថ្ងៃពុធ ទី១៧ ខែសីហា មានប្រសាសន៍ថា លោកមិនទាន់មានព័ត៌មានពីដំណើរទស្សនកិច្ចលោក ថាក់ស៊ីន នៅកម្ពុជា។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន កាលពីថ្ងៃពុធ មានប្រសាសន៍ថា លោកមិនទាន់មានព័ត៌មានផ្លូវការស្ដីពីដំណើរទស្សនកិច្ចនេះនៅឡើយដែរ ប៉ុន្តែលោក ថាក់ស៊ីន នឹងចាប់ផ្ដើមដំណើរទស្សនកិច្ចលោកនៅអាស៊ី ដូច្នោះលោកប្រហែលអាចនឹងមានវត្តមាននៅកម្ពុជា។
លោក ផៃ ស៊ីផាន បន្តទៀតថា រដ្ឋាភិបាលនឹងប្ដេជ្ញាការពារផលប្រយោជន៍ និងបូរណភាពកម្ពុជា ប្រសិនបើមានកិច្ចព្រមព្រៀងវិនិយោគណាមួយជាមួយនឹងប្រទេសថៃ នៅឈូងសមុទ្រថៃ ៖ «រាជរដ្ឋាភិបាលទទួលបានការសរសើរ និងលើកទឹកចិត្តអំពីប្រុងប្រយ័ត្នការចរចា ដូចជាលទ្ធផលឃើញស្រាប់ហើយលើឆាកអន្តរជាតិ តាមរយៈនៅក្នុងគណៈកម្មាធិការបេតិកភណ្ឌពិភពលោក វិស័យព្រះវិហារ និងវិស័យដទៃទៀត រដ្ឋាភិបាលមានពិសោធន៍គ្រប់គ្រាន់»។
រដ្ឋាភិបាលថៃ កាលពីខែសីហា បានប្រកាសពីគោលបំណងក្នុងការចរចាឡើងវិញជុំវិញបញ្ហាតំបន់ត្រួតស៊ីគ្នានៅឈូងសមុទ្រថៃ ក្រោយពេលដែលបញ្ហានេះបានពន្យារពេលអស់រយៈពេល ៥ឆ្នាំរួចមកហើយ។
កម្ពុជា និងថៃ បានបង្កើតអនុស្សរណៈយោគយល់គ្នា កាលពីឆ្នាំ២០០១ អំពីគម្រោងរៀបចំរួមគ្នានៅលើតំបន់ឈូងសមុទ្រត្រួតស៊ីគ្នា។ កិច្ចព្រមព្រៀងនេះបានខកខានមិនបានសម្រេច ដោយសារតែរដ្ឋប្រហារទម្លាក់រដ្ឋាភិបាល លោក ថាក់ស៊ីន កាលពីឆ្នាំ២០០៦។ អនុស្សរណៈយោគយល់គ្នាត្រូវបានអតីតរដ្ឋាភិបាលលោក អាភីស៊ិត វេតឆាឈីវ៉ាក់ (Abhisit Vejjajiva) បានលុបចោលកាលពីឆ្នាំ២០០៩ នៅពេលដែលលោក ថាក់ស៊ីន ត្រូវបានរដ្ឋាភិបាលកម្ពុជា តែងតាំងជាទីប្រឹក្សាសេដ្ឋកិច្ចខ្លួន៕