មូលហេតុចំនួនមេឃុំបក្សសមរង្ស៊ីកើនឡើងនៅខេត្តព្រះវិហារ

លទ្ធផលការបោះឆ្នោតរើសសមាជិកក្រុមប្រឹក្សាឃុំ សង្កាត់ កាលពីខែមិថុនា កន្លងទៅ បានបង្ហាញថា ចំនួនអាសនៈមេឃុំរបស់គណបក្ស សម រង្ស៊ី នៅខេត្តព្រះវិហារ បានកើនឡើង។

ដោយ កែវ និមល
2012-08-13

us.mp3

តំណាងពលរដ្ឋ ៣១៩គ្រួសារ ដែលមានជម្លោះដីធ្លីនៅស្រុកជាំក្សាន្ត ខេត្តព្រះវិហារ តវ៉ា និងសុំកិច្ចអន្តរាគមន៍ពីប្រមុខរដ្ឋាភិបាល នារាជធានីភ្នំពេញ កាលពីថ្ងៃទី២៦ មិថុនា ឆ្នាំ២០១២។

RFA/Morm Moniroth

មន្ត្រីគណបក្ស សម រង្ស៊ី អះអាងថា មូលហេតុចំនួនមេឃុំបក្សនេះកើនឡើង គឺដោយសារតែទំនាស់ដីនៅក្នុងខេត្តនេះធ្វើឲ្យប្រជាពលរដ្ឋខ្លះអស់ជំនឿលើការដឹកនាំរបស់បក្សប្រជាជន រួចងាកមករកបក្ស សម រង្ស៊ី វិញ។ តែទោះយ៉ាងណាចំនួនកើនឡើងនេះ មានតិចតួចនៅឡើយ បើប្រៀបធៀបជាមួយសមាជិកបក្សប្រជាជន។

ខេត្តព្រះវិហារជាខេត្តមួយស្ថិតនៅតំបន់ដាច់ស្រយាល ជាប់ព្រំដែនប្រទេសថៃ និង ឡាវ។ ប្រជាពលរដ្ឋខេត្តព្រះវិហារ ភាគច្រើនជាជនជាតិភាគតិចដែលប្រកបរបរធ្វើស្រែ និងចំការ នៅលើដីដែលមានសណ្ឋានជាខ្ពង់រាប។

នៅក្នុងចំណោមឃុំ សង្កាត់ របស់ខេត្តព្រះវិហារ ចំនួន ៥១ មានឃុំចំនួន ៧ មានមេឃុំមកពីគណបក្ស សម រង្ស៊ី។ ចំនួនមេឃុំរបស់គណបក្ស សម រង្ស៊ី នេះ បានកើនឡើងពី ២ ឃុំ ក្នុងអាណត្តិទី២ មកចំនួន ៧ឃុំ នៅក្នុងការបោះឆ្នោតរើសមេឃុំ ចៅសង្កាត់អាណត្តិទី៣។ ចំនួនឃុំទាំង ៧ ក្នុងចំណោម ៥១ឃុំ សង្កាត់ ទូទាំងខេត្ត នៅមានចំនួនតិចតួចនៅឡើយ ប៉ុន្តែបើនិយាយពីតួលេខកំណើនពី ២ ឃុំទៅ ៧ឃុំ គឺជាតួលេខមួយគួរឲ្យចាប់អារម្មណ៍។

លោក ស៊ាង សួនឌឿន តំណាងគណបក្ស សម រង្ស៊ី ប្រចាំខេត្តព្រះវិហារ មានប្រសាសន៍ឲ្យដឹងថា ការកើនចំនួនអាសនៈ និងតំណែងមេឃុំរបស់គណបក្ស សម រង្ស៊ី នៅខេត្តព្រះវិហារ នេះ បានមកដោយសារការខិតខំប្រឹងប្រែងធ្វើសកម្មភាព និងឃោសនារបស់សមាជិកគណបក្ស សម រង្ស៊ី ប្រចាំខេត្តព្រះវិហារផង និងដោយសារការកើនជំនឿរបស់ប្រជាពលរដ្ឋមកលើគណបក្ស សម រង្ស៊ី ផង។

លោក ស៊ាង សួនឌឿន៖ «បញ្ហាដែលយើងយកបាន ៧ ឃុំទៀតនេះ តាមពិតផ្ដើមចេញពីការរួបរួមកម្លាំងគ្នារឹងមាំ ហើយយើងខិតខំប្រឹងប្រែងដើម្បីទៅរកសំឡេងឆ្នោតទាល់តែយើងមានការរឹងមាំ អត់មានការបែកបាក់ផ្ទៃក្នុង។ យើងបានអំពាវនាវឲ្យបងប្អូនបោះឆ្នោតឲ្យគណបក្ស សម រង្ស៊ី ដើម្បីរំដោះបងប្អូនឲ្យផុតការអត់ឃ្លាន ភិតភ័យ បាត់បង់ដីធ្លី។ នេះជាគោលការណ៍យើងបានលើក»។

លោក ស៊ាង សួនឌឿន បានពន្យល់អំពីមូលហេតុនៃការកើនឡើង ការគាំទ្រពីសំណាក់ប្រជាពលរដ្ឋមកលើគណបក្ស សម រង្ស៊ី ថា គណបក្ស សម រង្ស៊ី មានការសន្យា និងបានលើកយកបញ្ហាកើតឡើងប្រចាំថ្ងៃ ប៉ះពាល់ប្រយោជន៍ប្រជាពលរដ្ឋមកពន្យល់ប្រជាពលរដ្ឋ ដើម្បីឲ្យប្រជាពលរដ្ឋគាំទ្របោះឆ្នោតឲ្យ។

លោក ស៊ាង សួនឌឿន៖ «គឺរាល់ពេលបោះឆ្នោតរកសំឡេង យើងលើកយកបញ្ហាជាក់ស្ដែងរបស់មូលដ្ឋានដែលគាត់មានទុក្ខលំបាកមកលើក។ ដូចជាបញ្ហាបាត់បង់ព្រៃឈើនៅក្នុងឃុំ ស្រុក របស់គាត់ យើងលើកបញ្ជាក់ជូន។ តែកាលណាបាត់បង់ព្រៃឈើ គឺព្រៃឈើនោះវាដុះលើដីរបស់គាត់។ អ៊ីចឹងវាបាត់ពីរ គឺកាលណាបាត់បង់ព្រៃឈើ វាបាត់ដីនោះទៀត។ យើងបញ្ជាក់ឲ្យគាត់ដឹងថា ឈើនោះវាមានទាក់ទងប្រយោជន៍បងប្អូនផ្ទាល់នោះ គឺបញ្ហាច្បោះ ជ័រទឹក។ កាលណាគេកាត់ច្បោះជ័រទឹកយក អាហ្នឹងដែលយើងបញ្ជាក់ជូនបងប្អូន ធ្វើឲ្យគាត់មួម៉ៅ ក្ដៅក្រហាយ។ អ៊ីចឹងមានតែបងប្អូនបោះឆ្នោតឲ្យគណបក្ស សម រង្ស៊ី មក ដើម្បីឲ្យបងប្អូនផុតពីការលំបាក»។

មេឃុំមួយរូបមកពីគណបក្ស សម រង្ស៊ី ដែលទើបជាប់ឆ្នោតថ្មីនៅក្នុងអាណត្តិទី៣ នេះ នៅឃុំស្រយ៉ង់ ឈ្មោះ ប៉ែន ឡាម។ លោកមានប្រសាសន៍ថា លោកបានទទួលការគាំទ្រពីប្រជាពលរដ្ឋបានឡើងធ្វើជាមេឃុំនេះ ដោយសារលោកបានអះអាងប្រាប់ប្រជាពលរដ្ឋមុនពេលបោះឆ្នោតថា គណបក្ស សម រង្ស៊ី នឹងប្រឹងប្រែងធ្វើការបម្រើប្រជាពលរដ្ឋ។

ឈ្មោះ ប៉ែន ឡាម៖ «បាទ! ម៉្យាងមកពីក្រុមហ៊ុនយកដីបងប្អូនច្រើនពេក។ ម៉្យាងទៀត បងប្អូនធ្វើការនៅក្នុងគណបក្ស សម រង្ស៊ី នេះ ចុះហត្ថលេខាអ្វីៗលើដីអី គឺអត់យកលុយពីបងប្អូនប្រជាជនទេ គឺមិនទាមទារកម្រៃដ៏លើសលប់ពីបង្អូនទេ។ នេះជាឥទ្ធិពលមួយដ៏ល្អរបស់គណបក្ស សម រង្ស៊ី។ មានម៉្យាងទៀតនោះ គឺសមាជិកគណបក្សប្រជាជនមានកន្លែងខ្លះនិយាយស្តីមិនសមរម្យទៅដល់បងប្អូនមើលងាយធ្វើឲ្យគេខឹង»។

លោកមេឃុំស្រយ៉ង់ មានប្រសាសន៍ថា នៅក្នុងពេលលោកកាន់តំណែងលោកនឹងប្រកាន់គោលការណ៍យុត្តិធម៌ មិនពុករលួយ និងមិនចុះហត្ថលេខាលក់ដីក្នុងឃុំទៅឲ្យក្រុមហ៊ុននានា ដែលចង់មករឹបអូសយកដីប្រជាពលរដ្ឋដោយខុសច្បាប់។

ប្រជាពលរដ្ឋមួយរូបឈ្មោះ ចេក វី រស់នៅឃុំស្រយ៉ង់ បានឲ្យដឹងថា មូលហេតុដែលសមាជិកគណបក្ស សម រង្ស៊ី ឈ្នះឆ្នោត បានធ្វើមេឃុំនៅក្នុងឃុំស្រយ៉ង់ ដោយសារបេក្ខជនគណបក្សមកពី បក្ស សម រង្ស៊ី កន្លងមក បានធ្វើអំពើល្អជាមួយប្រជាពលរដ្ឋ ទើបប្រជាពលរដ្ឋគាំទ្រគាត់៖ «គណបក្ស សម រង្ស៊ី ជាប់ឆ្នោតនេះ ដោយសារប្រជាជនគេស្រឡាញ់គណបក្ស សម រង្ស៊ី ណាស់។ ពីព្រោះគាត់ធ្វើល្អជាមួយប្រជាពលរដ្ឋណាស់។ កាលមុនគាត់ធ្វើអនុឃុំ គាត់ធ្វើល្អជាមួយប្រជាជន ទើបគេបោះឆ្នោតឲ្យទៅ»។

លោក ប៉ោយ ស៊ុម ជាមេឃុំត្បែង២ មកពីគណបក្ស សម រង្ស៊ី ហើយបានកាន់តំណែងជាមេឃុំត្បែង២ តាំងពីអាណត្តិមុន ឲ្យដឹងថា គណបក្ស សម រង្ស៊ី កើនចំនួនមេឃុំពី ២ឃុំ មក ៧ឃុំនេះ ដោយសារប្រជាពលរដ្ឋមើលឃើញអំពើល្អដែលបេក្ខជនមេឃុំមកពីគណបក្ស សម រង្ស៊ី បានធ្វើសកម្មភាព៖ «បាទ! សេវាសាធារណៈ យើងអត់បានជំរិតទារប្រាក់ទេ ហើយដោះស្រាយរកភាពយុត្តិធម៌ ហើយការពារដីធ្លីចំការរបស់ប្រជាពលរដ្ឋ មិនចុះហត្ថលេខាឲ្យដីទៅក្រុមហ៊ុនទេ»។

ខេត្តព្រះវិហារ មានស្រុកចំនួន ៧ និងក្រុង១ មានឃុំ និងសង្កាត់ចំនួន ៥១។ ឃុំទាំង ៧ ដែលមានមេឃុំមកពីគណបក្ស សម រង្ស៊ី គ្រប់គ្រង គឺឃុំត្បែង១ ឃុំត្បែង២ ឃុំឆែប២ ឃុំខ្យង ឃុំស្រយ៉ង់ ឃុំម្លូព្រៃ២ និងឃុំប្រមេរ៉ិ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

Castro De La Monreo

ពី Paris, France

I know wright! the supreme advisers to the king are pack of laws. How can they couldn't interpretation all those laws and take any action if the prime minister said something wrong? Why just Mr. Seun Song Bert alone has reaction? Come on Papa act like the men. Don't try to critic under the shield like turtle is not nice. I don't care who you are pro quo.

Aug 14, 2012 06:11 PM

អ្នកអានអនាមិក

ពិតជាគួរអោយអស់សំណើចណាស់ ២៤ កើនបានតែ ១ខេត្ត។ គណបក្សសមរង្សីយើងគួរតែខំប្រឹងបន្ថែមទៀត សូមកុំទាន់មានមោទនភាពខ្លាំងពេក។

Aug 14, 2012 10:26 AM

David

ពី Lowell, MA

ធ្វើល្អទទួលផលល្អ!

Aug 13, 2012 08:28 PM

អ្នកអានអនាមិក

I hope the new SRP village chieves will pay heed to the land grabbing and illegal logging in that area. I also hope that they will not sell their souls to CPP and logging companies for the sake of money and get-rich-quick. We poor villagers depend on the forest for our livelihood. This government is too corrupted to the point of no return to protect the land and the trees as long as they can get rich quick without considering of ther people's suffering and livelihood.

Aug 13, 2012 07:15 PM