លិខិតរួមមួយរបស់គណបក្សទាំងពីរ គឺគណបក្ស សម រង្ស៊ី និងគណបក្ស សិទ្ធិមនុស្ស ចុះថ្ងៃទី២៨ ខែមិថុនា ផ្ញើជូនរដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស ខេង បានលើកឡើងថា មានមេឃុំ សង្កាត់ ក្រុមប្រឹក្សាឃុំ-សង្កាត់ មួយចំនួន បានរៀបចំជ្រើសរើសមេភូមិ។ ការជ្រើសរើសនោះ ត្រូវរកឃើញថា កើតឡើងនៅក្រោយថ្ងៃដែលគណៈកម្មាធិការជាតិរៀបចំការបោះឆ្នោតប្រកាសលទ្ធផលការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៣។
អ្នកតំណាងរាស្ត្រ និងជាអ្នកនាំពាក្យគណបក្ស សម រង្ស៊ី លោក យឹម សុវណ្ណ មានប្រសាសន៍បន្ថែមថា គណបក្សទាំងពីរចង់អោយក្រសួងទប់ស្កាត់ ផ្អាកការជ្រើសរើសតែងតាំងនោះជាបន្ទាន់ និងត្រូវរង់ចាំការស្នើរបស់មេឃុំ ចៅសង្កាត់ ក្រុមប្រឹក្សាឃុំ-សង្កាត់ ដែលទើបជាប់ឆ្នោត។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ក្រសួងនៅមិនទាន់បានទទួលលិខិតស្នើសុំចំណាត់ការរបស់គណបក្សនយោបាយទាំងពីរនោះនៅឡើយទេ។ បើទោះជាយ៉ាងនេះក្ដី លោក ខៀវ សុភ័គ បញ្ជាក់ថា មុនពេលចាត់វិធានការណាមួយ ក្រសួងទាមទារការស៊ើបអង្កេតអោយបានត្រឹមត្រូវម៉ត់ចត់។
សេចក្ដីណែនាំលេខ ០០៤ របស់ក្រសួងមហាផ្ទៃ ចុះថ្ងៃទី១៧ ខែមីនា ឆ្នាំ២០០៦ ស្តីពីបែបបទ នីតិវិធី នៃការជ្រើសរើសមេភូមិ ការចូលកាន់តំណែង ការផ្លាស់ប្ដូរមេភូមិ ការតែងតាំងជំនួយការមេភូមិ និងតួនាទីភារកិច្ច របៀបរបបធ្វើការរបស់មេភូមិ បានបញ្ជាក់ថា ការជ្រើសរើស និងស្នើតែងតាំងមេភូមិ និងជំនួយការ ត្រូវធ្វើឡើងដោយ មេឃុំ ចៅសង្កាត់ ក្រុមប្រឹក្សាឃុំ-សង្កាត់ និងមិនបានសំដៅដល់មេឃុំក្នុងអាណត្តិ ឬចាំផ្ទះឡើយ។
លទ្ធផលការបោះឆ្នោតក្រុមប្រឹក្សាឃុំ-សង្កាត់ បង្ហាញថា គណបក្ស សម រង្ស៊ី ទទួលបាន ២២មេឃុំ និងគណបក្ស សិទ្ធិមនុស្ស ទទួលបានចំនួន ១៨មេឃុំ ចៅសង្កាត់។ ហើយលិខិតទៅកាន់ក្រសួងមហាផ្ទៃនេះ គឺជាលិខិតលើកទី១ ដែលគណបក្សទាំងពីរ គឺគណបក្ស សម រង្ស៊ី និងគណបក្ស សិទ្ធិមនុស្ស បានចេញរួមគ្នាបន្ទាប់ពីបានប្រកាសពីនិន្នាការច្របាច់បញ្ចូលគ្នារវាងគណបក្សទាំងពីរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។