ជំនួបនេះគឺដើម្បីពិភាក្សាស្វែងរកការគាំទ្រ ជំរុញឲ្យរដ្ឋាភិបាលធ្វើកំណែទម្រង់គណៈកម្មាធិការជាតិរៀបចំការបោះឆ្នោត និងឲ្យមានវត្តមានលោក សម រង្ស៊ី ចូលរួមការបោះឆ្នោតនៅឆ្នាំ២០១៣។
ក្នុងយុទ្ធនាការស្វែងរកការគាំទ្រពីសហគមន៍អន្តរជាតិ ជំរុញឲ្យរដ្ឋាភិបាលទីក្រុងភ្នំពេញ យល់ព្រមឲ្យមានការបោះឆ្នោតឆ្នាំ២០១៣ ដោយសេរី និងយុត្តិធម៌ មេដឹកនាំចលនាប្រជាធិបតេយ្យសង្គ្រោះជាតិ បានដឹកដៃគ្នាមកសហរដ្ឋអាមេរិក នៅដើមខែសីហា នេះ ស្នើសុំឲ្យសហរដ្ឋអាមេរិកអន្តរាគមន៍ឲ្យមានការផ្លាស់ប្ដូរនៅកម្ពុជា។ ដំណើរនៅបរទេសរបស់មេដឹកនាំចលនា លោក សម រង្ស៊ី និងកឹម សុខា ជាការបង្ហាញពីភាពសាមគ្គីគ្នាជាលើកដំបូង ចាប់តាំងពីឆ្នាំ២០០៨។
អនុប្រធានចលនា និងជាប្រធានគណបក្ស សិទ្ធិមនុស្ស លោក កឹម សុខា មានប្រសាសន៍តាមទូរស័ព្ទពីប្រទេសកាណាដា ថា លោកគ្រោងនឹងជួបមន្ត្រីជាន់ខ្ពស់ក្រសួងការបរទេសអាមេរិក និងអង្គការសហប្រជាជាតិ ដើម្បីស្នើសុំឲ្យមន្ត្រីទាំងនោះ ជំរុញឲ្យរដ្ឋាភិបាលធ្វើកំណែទម្រង់គណៈកម្មាធិការជាតិរៀបចំការបោះឆ្នោត និងអនុញ្ញាតឲ្យមានការបោះឆ្នោតដោយសេរី និងយុត្តិធម៌ ជាពិសេសមិនត្រូវបង្កឧបសគ្គដល់ការបង្កើតគណបក្សថ្មី រវាងគណបក្ស សិទ្ធិមនុស្ស និងសម រង្ស៊ី។
លោក កឹម សុខា៖ «សំខាន់ធំជាងគេ ពាក់ព័ន្ធនឹងការបោះឆ្នោតឆ្នាំ២០១៣។ យើងចង់ឲ្យមានលក្ខណៈសេរី និងយុត្តិធម៌ អាហ្នឹងធំជាងគេ ហើយផ្ដើមដំបូងចង់ឲ្យមានការផ្លាស់ប្ដូរគណៈកម្មាធិការជាតិរៀបចំការបោះឆ្នោត»។
លោក កឹម សុខា សង្ឃឹមថា ជំនួបប្រធានចលនា និងមន្ត្រីជាន់ខ្ពស់នានានៅសហរដ្ឋអាមេរិក នឹងធ្វើឲ្យមានការផ្លាស់ប្ដូរស្ថានការណ៍នយោបាយនៅកម្ពុជា។
ការប្រកាសស្វែងរកកិច្ចអន្តរាគមន៍ពីបរទេសនេះ ធ្វើឡើងមួយថ្ងៃ បន្ទាប់ពីលោកនាយករដ្ឋមន្រ្តី ហ៊ុន សែន ប្រកាសថា គណបក្សប្រជាជនកម្ពុជា គ្មានការព្រួយបារម្ភចំពោះសម្ព័ន្ធភាពថ្មី រវាងគណបក្ស សម រង្ស៊ី និងសិទ្ធិមនុស្ស។ លោក ហ៊ុន សែន បន្តថា គណបក្សថ្មីដែលគ្រោងបង្កើតនេះ មិនអាចប្រកួតប្រជែងអំណាចនឹងគណបក្សប្រជាជនកម្ពុជា បានទេ។ ទោះបីជាយ៉ាងណាក៏ដោយ លោក ហ៊ុន សែន បានប្រកាសជាសាធារណៈថា ប្រសិនបើលោកចាញ់ឆ្នោត លោកនឹងផ្ទេរអំណាចឲ្យគណបក្សឈ្នះដោយសន្តិវិធី។
លោក កឹម សុខា ឆ្លើយតបវិញថា ប្រសិនបើគណបក្សប្រជាជនកម្ពុជា គ្មានក្តីបារម្ភពីប្រជាប្រិយភាព និងការគាំទ្ររបស់គណបក្សថ្មី ដែលនឹងបង្កើតនៅពេលខាងមុខនេះ នោះរដ្ឋាភិបាលត្រូវតែអនុញ្ញាតឲ្យមានការបោះឆ្នោត ដោយសេរី និងយុត្តិធម៌។
លោក កឹម សុខា៖ «សំខាន់ការបោះឆ្នោតសេរី និងយុត្តិធម៌ ឬក៏អត់។ ទាល់តែមានភាពក្លាហានក្នុងការឲ្យបរិយាកាសល្អឬអត់ ដូចជាការឲ្យមានបរិយាកាសល្អ ដូចជាការប្រើប្រាស់ប្រព័ន្ធផ្សព្វផ្សាយ ដូចជាការចុះឈ្មោះគណបក្សនយោបាយថ្មី»។
លោក ហ៊ុន សែន ធ្លាប់បានអះអាងជាច្រើនលើកច្រើនសាមកហើយថា លោកនឹងបន្តតំណែងជានាយករដ្ឋមន្ត្រី ដោយគ្មានកំណត់។ អង្គការសិទ្ធិមនុស្សអន្តរជាតិ បានដាក់បញ្ចូលលោក ហ៊ុន សែន ទៅក្នុងបញ្ជី "ក្លឹបមួយម៉ឺន"។
អង្គការសិទ្ធិមនុស្ស (Human Rights Watch) បានបង្កើតបញ្ជីក្លឹបមួយម៉ឺន ជាបញ្ជីនៃមេដឹកនាំដែលអាចរក្សាអំណាចដោយសារការប្រើប្រាស់កងកម្លាំងយោធា ហិង្សា នយោបាយ អំពើពុករលួយ និងការប្រើប្រាស់ការគាំទ្របរទេស ដើម្បីរក្សាអំណាច។ លោក ហ៊ុន សែន បានរក្សាអំណាចបានរយៈពេលមួយម៉ឺនថ្ងៃ ប្រមាណ ២៧ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។