លោក ម៉ៅ មុនីវណ្ណ អតីតអ្នកតំណាងរាស្ត្រគណបក្ស សម រង្ស៊ី មណ្ឌលកំពង់ចាម បច្ចុប្បន្នបានមករួមរស់ជាមួយគណបក្សសិទ្ធិមនុស្ស បានឲ្យវិទ្យុអាស៊ីសេរីដឹងនៅថ្ងៃទី២៦ ខែមីនាថា មានស្លាកគណបក្ស សម រង្ស៊ី មិនតិចជាង ២០ស្លាកទេ ត្រូវបានសកម្មជនដែលមានភក្ដីភាពជាមួយលោក ទម្លាក់ចេញពីមុខផ្ទះ និងកំពុងត្រៀមទម្លាក់ស្លាកដទៃទៀតតាមស្រុកចំនួន១១ នៅមុនការបោះឆ្នោតសមាជិកព្រឹទ្ធសភាឆ្នាំ២០១២ ចូលមកដល់។
លោកថ្លែងថា គណបក្ស សម រង្ស៊ី នឹងត្រូវបាត់បង់ការគាំទ្រ ហើយឈានដល់ការរំលាយគណបក្សទាំងមូល ប្រសិនបើលោក សម រង្ស៊ី មិនកែទម្រង់ផ្ទៃក្នុងបក្សដែលកើតមាន ដោយលោកបានចោទថា គ្រួសារនិយមឲ្យបានស៊ីជម្រៅទេនោះ។
លោក ម៉ៅ មុនីវណ្ណ ឲ្យដឹងដូច្នេះ ៖ «ថ្ងៃនេះគាត់ទម្លាក់ពីរស្លាក់ ហើយមានចរន្តថ្នាក់ដឹកនាំមួយចំនួនទៀតមកចូលរួមជាមួយគណបក្សសិទ្ធិមនុស្ស»។
លោក ម៉ៅ មុនីវណ្ណ បានទៅចូលរួមជាមួយគណបក្សសិទ្ធិមនុស្ស នៅថ្ងៃទី២៣ ខែមីនា បន្ទាប់ពីរូបលោកត្រូវគណបក្ស សម រង្ស៊ី បង្ខំឲ្យលាលែងចេញពីសមាជិកគណៈកម្មាធិការអចិន្ត្រៃយ៍ សមាជិកគណៈកម្មាធិការនាយកគណបក្ស សម រង្ស៊ី កាលពីថ្ងៃទី២២ ខែមីនា ឆ្នាំ២០១១ រួចមក។
លោក ស៊ន វុទ្ធី សកម្មជនគណបក្ស សម រង្ស៊ី ដែលធ្លាប់មានភក្ដីភាពជាមួយលោក ម៉ៅ មុនីវណ្ណ រស់នៅស្រុកត្បូងឃ្មុំ ខេត្តកំពង់ចាម បានថ្លែងថា រូបគាត់បានត្រៀមទម្លាក់ស្លាក់គណបក្ស សម រង្ស៊ី ចេញពីមុខផ្ទះ និងដាក់ជំនួសស្លាកសញ្ញាគណបក្សសិទ្ធិមនុស្សជំនួសវិញ។ លោកថា ការទម្លាក់ស្លាក់ចេញពីមុខផ្ទះ គឺដោយសារលោកអស់ជំនឿទៅលើការដឹកនាំរបស់គណបក្ស សម រង្ស៊ី។
លោក ស៊ន វិទ្ធី បញ្ជាក់ ៖ «ឯកឧត្តម សម រង្ស៊ី គាត់មិនជឿពាក្យល្អ តែគាត់ជឿមនុស្សពីរក្ដាប់តូច។ លោក អេង ឆៃអ៊ាង ប្រជាធិបតេយ្យវាគ្មានជំនឿ»។
យ៉ាងនេះក្ដី លោក សម រង្ស៊ី និងលោក សុន ឆ័យ ប្រធានក្រុមអ្នកតំណាងរាស្ត្រគណបក្ស សម រង្ស៊ី បានអះអាងថា ការចាកចេញរបស់លោក ម៉ៅ មុនីវណ្ណ និងសកម្មជនមួយចំនួននៅខេត្តកំពង់ចាម គឺមិនបានប៉ះពាល់ដល់ប្រជាប្រិយភាពគណបក្ស សម រង្ស៊ី ក្នុងការបោះឆ្នោតឃុំសង្កាត់ និងសកលនាឆ្នាំ២០១២ និង២០១៣ នោះទេ។
លោក សម រង្ស៊ី ប្រធានគណបក្ស សម រង្ស៊ី បានផ្ដល់សម្ភាសន៍ឲ្យវិទ្យុអាស៊ីសេរី ក្នុងវេទិកាអ្នកស្តាប់វិទ្យុអាស៊ីសេរី កាលពីរាត្រីថ្ងៃទី២២ ខែមីនា ដោយបានចាត់ទុកការចាកចេញពីបក្សរបស់អតីតសមាជិកសភារបស់ខ្លួន គឺលោក ម៉ៅ មុនីវណ្ណ ថា ជាបញ្ហាបុគ្គលដែលចង់មានលាភសក្ការៈបុណ្យស័ក្តិប៉ុណ្ណោះ។
លោក សម រង្ស៊ី មានប្រសាសន៍ថា ៖ «ចង់ធ្វើប្រធានខេត្តមួយជីវិតមិនអាចទេ គឺយើងមិនអាចឲ្យអ្នកណាម្នាក់ធ្វើស្ដេចក្រាញ់១ជីវិត។ ដូចខេត្តកំពង់ចាម យើងឃើញមានអភិបាលខេត្ត លោក ហ៊ុន ណេង បង ហ៊ុន សែន ធ្វើអភិបាលខេត្ត១ជីវិត យើងឃើញថា វាច្រែះចាប់ វាដុះស្លែ»។
ទោះជាបែបនេះក្ដី លោក ហាក់ បញ្ញាកា លេខាធិការយុវជនគណបក្ស សម រង្ស៊ី ខេត្តកំពង់ចាម ដែលបានចាកចេញពីគណបក្ស សម រង្ស៊ី ទៅចូលរួមជាមួយគណបក្សសិទ្ធិមនុស្សបានឲ្យវិទ្យុអាស៊ីសេរី ដឹងនៅថ្ងៃទី២៦ ខែមីនា ថា មានប្រធានយុវជនរបស់គណបក្ស សម រង្ស៊ី មកពីស្រុកចំនួន១១ បានចាកចេញពីគណបក្ស សម រង្ស៊ី មកចូលរួមជាមួយគណបក្សសិទ្ធិមនុស្ស។
លោក ហាក់ បញ្ញាកា បន្ថែម ៖ «វានឹងអាចមានធំជាងហ្នឹងតទៅទៀត បន្ទាប់ពីបោះឆ្នោតព្រឹទ្ធសភា និងជិតបោះឆ្នោតក្រុមប្រឹក្សាឃុំសង្កាត់»។
ទាក់ទងនឹងការចាកចេញរបស់សមាជិកគណបក្ស សម រង្ស៊ី នេះដែរ លោកនាយករដ្ឋមន្ត្រី ហ៊ុន សែន កាលពីថ្ងៃទី២៤ ខែមីនា បានឡកឡឺយទៅកាន់ថ្នាក់ដឹកនាំគណបក្ស សម រង្ស៊ី ធ្ងន់ៗថា បក្សប្រឆាំងដែលធ្លាប់រិះគន់រដ្ឋាភិបាលផ្ដាច់ការនោះ បែរជាផ្ទៃក្នុងបក្សកើតមានអំពើផ្ដាច់ការទៅវិញ។
លោក ហ៊ុន សែន បញ្ជាក់ឲ្យដឹងដូច្នេះ ៖ «អ្នកដែលចេញគេប្រកាសថា បក្សដែលខ្លួននៅពីមុនហ្នឹងគឺផ្ដាច់ការ។ ខ្ញុំជួយប្រាប់ជួយបន្ទរ ព្រោះខ្លួនឯកជេររដ្ឋាភិបាលផ្តាច់ការៗ ដល់ខ្លួនឯងផ្ដាច់ការនៅប៉ុន្មាននាក់នៅមិនបានផងហ្នឹង។ មិនទាន់បានអំណាចផងផ្ដាច់ការប៉ុណ្ណឹងហើយហ្នឹង»។
ការបែកបាក់ផ្ទៃក្នុងគណបក្ស សម រង្ស៊ី នេះដែរ ត្រូវបានអ្នកវិភាគស្ថានការណ៍នយោបាយនៅកម្ពុជា លើកឡើងថា ការបែកបាក់ផ្ទៃក្នុងគណបក្ស សម រង្ស៊ី អាចជាសញ្ញានាំឲ្យគណបក្សប្រឆាំងដ៏ធំនៅកម្ពុជា អាចបាត់បង់ការគាំទ្រក្នុងការបោះឆ្នោតនាឃុំសង្កាត់ និងសកលនៅឆ្នាំ២០១២-២០១៣ ខាងមុខ៕