ការរារាំងត្រូវបានធ្វើឡើងនៅចន្លោះទីស្នាក់ការត្រួតពិនិត្យច្រកទ្វារតំបន់ព្រំដែនដូនរ័ត្ន និងតម្រុយបង្គោលព្រំដែនលេខ ១០៣ ស្ថិតក្នុងភូមិដូនរ័ត្ន ឃុំរូង ស្រុកមេមត់ អស់រយៈពេលប្រមាណ៣០នាទី ។
ប្រធានក្រុមអ្នកតំណាងរាស្ត្រគណបក្ស សម រង្ស៊ី លោក សុន ឆ័យ ថ្លែងថា ការរារាំងពីសំណាក់ភាគីវៀតណាមបង្ហាញថាវៀតណាមបានរំលោភលើបូរណភាពទឹកដីកម្ពុជា ព្រោះកងកម្លាំងការពារព្រំដែនវៀតណាមបានចូលមកឃាត់តំណាងរាស្ត្រនិងមន្ត្រីខ្មែរនៅលើទឹកដីខ្មែរ ។
លោក សុន ឆ័យ មានប្រសាសន៍បន្តថា ៖ «បើភាគីវៀតណាមមានការអាថ៌កំបាំងមិនឲ្យគណៈប្រតិភូយើងបានទៅឃើញគ្រាន់តែតម្រុយនោះ អាហ្នឹងអាចជាបញ្ហាមួយរឹតតែធ្វើឲ្យមានការសង្ស័យ មន្ទិលកាន់តែខ្លាំងហើយ ថាមានអាថ៌កំបាំងអី បានជាមិនឲ្យយើងទៅមើលតម្រុយហ្នឹង ?»។
ទោះយ៉ាងណា អភិបាលខេត្តកំពង់ចាម លោក ហ៊ុន ណេង អះអាងថា ភាគីវៀតណាមបានធ្វើការរារាំង ព្រោះអ្នកតំណាងរាស្ត្រនិងមន្ត្រីគណបក្ស សម រង្ស៊ី បានចូលក្នុងទឹកដីវៀតណាម ហើយថា ក្រុមអ្នកតំណាងរាស្ត្រនិងមន្ត្រីទាំងនោះមិនស្គាល់ទីតាំងភូមិសាស្ត្រនៃតំបន់នោះឡើយ ។
មុននឹងទៅមើលតម្រុយបង្គោលព្រំដែនលេខ ១០៣ នៅក្នុងឃុំរូង ក្រុមអ្នកតំណាងរាស្ត្រនិងមន្ត្រីគណបក្ស សម រង្ស៊ី បានទៅពិនិត្យបង្គោលព្រំដែនកម្ពុជា-វៀតណាមលេខ ១០៨ និង ១០៩ ក្នុងឃុំដារ ស្រុកមេមត់ ដែលនៅទីនោះ លោក សុន ឆ័យ ថ្លែងថា ភូមិចំនួន១៤នៅស្រុកមេមត់ត្រូវបាត់បង់ក្នុងការបោះបង្គោលព្រំដែន ដោយលោកសំអាងលើផែនទីដែលអាជ្ញាធរស្រុកមេមត់កំពុងតែប្រើប្រាស់ និងការជួបផ្ទាល់ជាមួយមន្ត្រីអាជ្ញាធរនិងប្រជាពលរដ្ឋមួយចំនួន ។
ប្រជាពលរដ្ឋរស់នៅក្នុងឃុំដារ អ្នកស្រី យ៉ែម មួន បានឲ្យដឹងថា ដីចុងក្រោយរបស់អ្នកស្រីទំហំ ១ហិកតារកន្លះត្រូវបាត់បង់ ។
អ្នកស្រី យ៉ែម មួន បញ្ជាក់ថា ៖ «ឥឡូវបាត់បង់ទឹកដីទៀត ខ្ញុំមិនដឹងបានដីណាធ្វើទេ អស់រលីងហើយបងអើយ ! លើកទី២ហើយនេះ ។ ឆ្នាំមុនគេយកខាងខ្វាតហ្នឹងអស់ ៨ហិកតាររួចហើយ ដល់ឥឡូវមកយកលើកទី២ទៀត អស់រលីងទៀតនែ ខ្ញុំបានអីធ្វើទេ !»។
ស្ត្រីឈ្មោះ សោម ភី រស់នៅភូមិដូនរ័ត្ន ឃុំរូង រៀបរាប់ថា ដីរបស់អ្នកស្រីប្រហែល ១ហិកតារកន្លះ ត្រូវបាត់បង់ ហើយបច្ចុប្បន្ន កសិករវៀតណាមកំពុងតែធ្វើស្រែនៅលើដីនោះ ។
អ្នកស្រី សោម ភី ថ្លែងយ៉ាងដូច្នេះ ៖ «អាស្រែក្រឡេកឃើញនុះ អាព្រៃទទឹងទៅកើតហ្នឹងស្រែខ្ញុំ ចា ! យួនយកអស់ហើយ នៅតែប៉ុណ្ណឹងឯងបានជាខ្ញុំហ្នឹងណា ! ខ្ញុំបានស្រែមួយនេះនែ ! ជាប់របងវត្តនេះ ។ ហ្នឹងខ្ញុំជម្រាបប្រាប់ក្មួយ នៅតែប៉ុណ្ណឹង !»។
ប្រធានគណៈកម្មការព្រំដែនខ្មែរ នៅប្រទេសបារាំង លោក ស៊ាន ប៉េងសែ មានប្រសាសន៍ថា រដ្ឋាភិបាលកម្ពុជាមិនត្រូវព្រងើយកន្តើយចំពោះប្រជាពលរដ្ឋដែលបាត់បង់ដីធ្លីដោយសារការបោះបង្គោលព្រំដែននោះទេ ។
លោក ស៊ាន ប៉េងសែ បន្តថា ៖ «ប្រជារាស្ត្រដែលបានត្អូញត្អែរ ថាយួនហ្នឹងចូលមកនៅក្នុងស្រុកខ្មែរហ្នឹង គឺការពិតប្រាកដដូច្នោះមែន ព្រោះខ្ញុំ ខ្ញុំដឹងថា មិនមែនតែពីរបីហិកតារទេ ។ មានកន្លែងខ្លះ រតនគិរី មណ្ឌលគីរី វាចូលមកជិត១៥គីឡូម៉ែត្រតទៅនៅក្នុងហ្នឹង»។
លោក ស៊ាន ប៉េងសែ បានបន្ថែមថា ដើម្បីរក្សាបាននូវបូរណភាពទឹកដី លោកសុំឲ្យរដ្ឋាភិបាលកម្ពុជាគោរពសន្ធិសញ្ញាក្រុងប៉ារីស និងរដ្ឋធម្មនុញ្ញនៃប្រទេសកម្ពុជា ហើយសន្ធិសញ្ញាក្រុងប៉ារីសអាចតម្រូវឲ្យលុបចោលនូវសន្ធិសញ្ញាទាំងឡាយណាដែលប៉ះពាល់ដល់បូរណភាពទឹកដីកម្ពុជា ៕