ប្រទេសកម្ពុជា នៅថ្ងៃទី១១ ខែកក្កដា ឆ្នាំ២០១១ បានសម្ពោធបើកឲ្យដំណើរការនៃទីផ្សារមូលបត្រលើកដំបូង ដើម្បីជំរុញការអភិវឌ្ឍសេដ្ឋកិច្ច និងវិស័យហិរញ្ញវត្ថុនៅក្នុងប្រទេសកម្ពុជា។
ទីផ្សារមូលបត្រនេះ គឺជាកិច្ចសហប្រតិបត្តិការរវាងក្រសួងសេដ្ឋកិច្ច និងហិរញ្ញវត្ថុកម្ពុជា ដែលមានភាគហ៊ុនចំនួន៥៥% និងក្រុមហ៊ុនមូលបត្រប្រទេសកូរ៉េខាងត្បូង មានភាគហ៊ុនចំនួន៤៥%។ ទីផ្សារមូលបត្រនេះ និងដំណើរការពេញលេញនៅចុងឆ្នាំ២០១១។
ទីតាំងនៃទីផ្សារមូលបត្រនេះ គឺស្ថិតនៅក្នុងអាគាររបស់ធនាគារកាណាឌីយ៉ា (Canadia Bank) ជាន់ទី២៥ និងជាន់ទី២៦ នៅក្នុងទីក្រុងភ្នំពេញ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា លោក គាត ឈន់ និងជាឧបនាយករដ្ឋមន្ត្រី ដែលធ្វើជាអធិបតីនៅក្នុងពិធីសម្ពោធនោះ បានមានប្រសាសន៍នៅថ្ងៃទី១១ ខែកក្កដា ឆ្នាំ២០១១ ថាការសម្ពោធបើកឲ្យដំណើរការទីផ្សារមូលបត្រនេះជាព្រឹត្តិការប្រវត្តិសាស្ត្រនៅកម្ពុជា ៖ "សហគ្រាសរដ្ឋ៣ ដែលទទួលបានការអនុញ្ញាតដ៏ខ្ពង់ខ្ពស់ពីសម្ដេចតេជោនាយករដ្ឋមន្ត្រីនៃរាជរដ្ឋាភិបាលធ្វើការបោះផ្សាយលក់មូលបត្រជាសាធារណៈបាន និងកំពុងដំណើរការយ៉ាងមមាញឹកកំពុងបំពេញនីតិវិធីនៃការបោះផ្សាយមូលបត្រជាសាធារណៈដើម្បីឈានដល់ការចុះបញ្ជីសម្រាប់ជួញដូរនៅក្នុងប្រពន្ធជួញដូររបស់ក្រុមហ៊ុនផ្សារមូលបត្រកម្ពុជា"។
ប្រធានក្រុមហ៊ុនទីផ្សារមូលបត្ររបស់ប្រទេសកូរ៉េខាងត្បូង លោក គឹម ប៊ុងស៊ូ (Kim Bongsoon) បានមានប្រសាសន៍ជាភាសាកូរ៉េ ហើយត្រូវបានគេប្រែសម្រួលជាភាសាខ្មែរថា ការរីកចម្រើនខាងវិស័យទីផ្សារមូលបត្រ គឺជាការរីកចម្រើនខាងវិស័យសេដ្ឋកិច្ច ៖ "ដូច្នេះក្រុមផ្សារមូលបត្រកូរ៉េយើងខ្ញុំ និងខិតខំប្រឹងប្រែងឲ្យអស់ពីសមត្ថភាព ដើម្បីជួយធ្វើឲ្យទីផ្សារមូលបត្រនៅកម្ពុជា ក្លាយជាកម្លាំងចលករដ៏សំខាន់មួយ នៃវិស័យសេដ្ឋកិច្ច តាមរយៈបទពិសោធន៍ដែលយើងមាន ក្នុងការដែលបានធ្វើឲ្យទីផ្សារមូលបត្រកូរ៉េក្លាយជាគូរប្រកួតប្រជែងមួយ មានកម្រិតស្មើនិងទីផ្សារមូលបត្រនានាលើឆាកអន្តរជាតិដូចសព្វថ្ងៃនេះ"។
នៅក្នុងពិធីសម្ពោធនោះ ក្រសួងសេដ្ឋកិច្ច និងហិរញ្ញវត្ថុកម្ពុជា បានប្រកាសប្រគល់សិទ្ធិឲ្យទៅក្រុមហ៊ុនចំនួន៣ ដើម្បីបោះពុម្ពមូលបត្រសម្រាប់ដាក់លក់នៅទីផ្សារមូលបត្រនោះ គឺទី១ ក្រុមហ៊ុនរដ្ឋាករទឹកស្វយ័តទី២ ក្រុមហ៊ុនកំពង់ផែស្វយ័តខេត្តព្រះសីហនុ និងទី៣ ក្រុមហ៊ុនទូរគមនាគមន៍ស្វយ័ត។
សេចក្ដីរាយការណ៍នានាបានឲ្យដឹងថា ក្រុមហ៊ុនមូលបត្ររបស់ប្រទេសកូរ៉េខាងត្បូងនេះ គឺឈរក្នុងលំដាប់លេខ១២ នៅលើពិភពលោក។
ប្រភពពីមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជាបានឲ្យដឹងថា មូលហេតុដែលនាំឲ្យមានការបង្កើតទីផ្សារមូលបត្រនៅកម្ពុជា គឺដោយសារតែមានការចុះហត្ថលេខាលើអនុស្សរណៈយោគយល់គ្នារវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក គាត ឈន់ ជាមួយនឹង គឹម ស៊ួហាន់ (Kim Soohan) ជាឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុប្រទេសកូរ៉េខាងត្បូង នៅថ្ងៃទី៤ ខែឧសភា ឆ្នាំ២០០៦ នៅក្នុងកិច្ចប្រជុំរដ្ឋមន្ត្រីក្រសួងហិរញ្ញវត្ថុអាស៊ាន បូក៣ នៅប្រទេសឥណ្ឌា៕