នៅកំពង់ចាម ផ្ទះជាច្រើនត្រូវខ្យល់ព្យុះបំផ្លាញ មនុស្សម្នាក់ត្រូវរន្ទះបាញ់ស្លាប់

ដោយ ឱ ភារិទ្ធ

2008-06-03

ផ្ទះអ្នកស្រុកជាច្រើនខ្នងក្នុងស្រុកព្រៃឈរខេត្តកំពង់ចាម ត្រូវបានដួលរលំបែកបាក់ដោយសារខ្យល់ព្យុះកំបុងត្បូង រួមទាំងស្លាកគណបក្សមួយចំនួន និងមនុស្សម្នាក់ស្លាប់ដោយសាររន្ទះបាញ់កាលពីល្ងាចថ្ងៃទី ២ មិថុនា ។

ជំទប់ទី២ឃុំថ្មពូន ស្រុកព្រៃឈរ គឺលោក អ៊ឹម ស៊ាងឡេង បានឲ្យដឹងនៅព្រឹកថ្ងៃទី៣ មិថុនា ថា ប្រមាណជាម៉ោង ៥ល្ងាច កាលពីថ្ងៃទី២ មិថុនា មានខ្យល់ព្យុះយ៉ាងខ្លាំងនាំគ្រាប់ភ្លៀងធំៗ បានបោកបក់មកលើផ្ទះអ្នកស្រុកក្នុងឃុំ ធ្វើឲ្យផ្ទះ១៥ខ្នងដួលរលំបែកបាក់ ប៉ុន្តែពុំបណ្ដាលឲ្យគ្រោះថ្នាក់ដល់ជីវិតមនុស្សឡើយ ។

អ្នកស្រី ឡុង រុន បានមានប្រសាសន៍ថា ប្រមាណជាម៉ោង៥ល្ងាច មេឃងងឹតគ្រាប់ភ្លៀងធំៗ ខ្យល់ព្យុះក៏បោកបក់មកជាមួយ កួចដើមឈើដួលរលំជាច្រើនដើម រួចបន្តទៅកួចផ្ទះអ្នកស្រីនៅចុងភូមិបឹងឲ្យដួលរលំថែមទៀតផង ។

អ្នកស្រីថា អ្នកស្រីគ្មានទីជម្រកទេពេលនេះ ហើយសម្ភារៈនៅក្នុងផ្ទះក៏ត្រូវខ្យល់ព្យុះបំផ្លាញគ្មានសល់ដែរ ៖ «ដើមឈើក្បែរផ្ទះខ្ញុំដួលអស់រលីង ហើយកូនខ្ញុំត្រូវផ្ទះរលំលើត្រូវឆ្អឹងខ្នង ។ សំណូមពរឲ្យអាជ្ញាធរជួយខ្ញុំផង ខ្ញុំវេទនាណាស់» ។

អ្នកស្រី មុំ ដែលរងគ្រោះដោយសារខ្យល់កួចឲ្យរបើកដំបូលផ្ទះខូចខាតប្រមាណ៨០ភាគរយ បានឲ្យដឹងថា អ្នកស្រីកំពុងជួបនូវភាពទុរគតហើយនៅពេលនេះ ៖ «អីវ៉ាន់ខូចខាត បែកចានឆ្នាំងអស់រលីងហើយ ជញ្ជាំងដំបូងរបើកអស់ហើយ ។ សូមជួយសង្គ្រោះខ្ញុំផង ព្រោះខ្ញុំអត់ ខ្ញុំវេទនាណាស់» ។

ជំទប់ទី២ អ៊ឹម ស៊ាងឡេង បានឲ្យដឹងថា ផ្ទះរងគ្រោះទាំង១៥ខ្នងសុទ្ធតែជាផ្ទះប្រក់ស្លឹក ហើយក្រីក្រស៊ីឈ្នួលគេដើម្បីរស់តែមួយពេលៗ ប៉ុណ្ណោះ ។

អភិបាលស្រុកព្រៃឈរ គឺលោក ស្រី សារឿន បានផ្ដល់សម្ភាសន៍ថា កាលពីល្ងាចថ្ងៃទី២ មិថុនា មានផ្ទះជាច្រើនខ្នងតាមបណ្ដាឃុំមួយចំនួនទៀត រួមទាំងស្លាកគណបក្សក៏ត្រូវដួលរលំខូចខាតដែរ ហើយក៏មានមនុស្សម្នាក់ស្លាប់ដោយសាររន្ទះបាញ់ថែមទៀត ៖ «នៅឃុំល្វា អស់១០ខ្នង ឃុំព្រៃឈរមាន៧ខ្នង ឃុំសូរសែន ២ខ្នង នៅស្រងែ រន្ទះបាញ់ស្លាប់ម្នាក់ ... រលំស្លាកគណបក្ស ៩...» ។

អភិបាលស្រុកព្រៃឈរ បានឲ្យដឹងបន្តទៀតថា នេះជាលើកទីមួយហើយ នៅក្នុងស្រុកព្រៃឈរដែលមានផ្ទះនិងស្លាកគណបក្សដួលរលំដោយខ្យល់ព្យុះ ហើយលោកថា ទុក្ខវេទនានេះត្រូវបានលោកអភិបាលខេត្តនិងក្រុមការងារមួយចំនួនបានចុះជួយរំលែកទុក្ខ ដោយផ្ដល់សម្ភារៈនិងអាហារូបត្ថម្ភសង្គ្រោះបន្ទាន់ហើយ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព