លោក ចៅ វី មន្ត្រីនៃគណៈកម្មាធិការជាតិគ្រប់គ្រងគ្រោះមហន្តរាយមានប្រសាសន៍ថា តាមការសរុបចុងក្រោយបានបង្ហាញថា មានប្រជាពលរដ្ឋចំនួន២៤នាក់ ត្រូវបានស្លាប់ដោយខ្យល់ព្យុះកំបុតត្បូងឈ្មោះកេតសាណា ដែលបានបក់បោកមកលើខេត្តមួយចំនួននៃប្រទេសកម្ពុជា នាពេលថ្មីៗកន្លងមកនេះ។
លោក ចៅ វី មានប្រសាសន៍ដូច្នេះ ៖ «បូករឿងបញ្ហាខ្យល់ព្យុះកេតសាណាហ្នឹង មាន៣នាក់នៅរតនគិរី ៦នាក់នៅសៀមរាប ៩នាក់នៅកំពង់ធំ ២នាក់នៅកំពង់ឆ្នាំង និង៤នាក់នៅខេត្តសីហនុ»។
លោក ញឹម វណ្ណដា ទេសរដ្ឋមន្រ្តីនិងជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ប្រាប់វិទ្យុអាស៊ីសេរីនៅល្ងាចថ្ងៃទី៩ តុលា ថា តួលេខនៃការខូចខាតខាងលើគ្រាន់តែជាការសន្និដ្ឋានបណ្តោះអាសន្នប៉ុណ្ណោះ។
លោក ញឹម វណ្ណដា មានប្រសាសន៍ដូច្នេះថា ៖ «នេះជាការវាយតម្លៃបណ្ដោះអាសន្នទេ...។ ផ្លូវដែលខូច ដែលមិនទាន់គិតដល់ផ្លូវថ្នល់ ផ្លូវស្ពាន។ ផ្លូវថ្នល់ហ្នឹងគឺផ្លូវលំសំខាន់ជាងគេ ផ្លូវជាតិមិនសូវមានខូចប៉ុន្មានទេ ហើយផ្ទះសម្បែងប្រជាជនយើងប៉ាន់ស្មានទៅ»។
ព្យុះកំបុតត្បូងកេតសាណាបានបោកបក់មកលើខេត្តមួយចំនួន នៃប្រទេសកម្ពុជា។ ប៉ុន្តែខេត្តដែលរងគ្រោះធ្ងន់ធ្ងរនោះ រួមមានខេត្តរតនគិរី សៀមរាប កំពង់ធំ កំពង់ឆ្នាំង និងខេត្តព្រះសីហនុ។
គួររំឭកដែរថា មុនទទួលរងគ្រោះមហន្តរាយដោយព្យុះកេតសាណា ប្រទេសកម្ពុជាក៏បានរងផងដែរនូវមហន្តរាយបណ្តាលមកពីគ្រោះរាំងស្ងួតអូសបន្លាយនៅខេត្តមួយចំនួន។
ប្រភពពីក្រសួងកសិកម្ម រុក្ខាប្រមាញ់និងនេសាទ បានឲ្យដឹងថា គ្រោះរាំងស្ងួតឆ្នាំនេះបានបណ្តាលឲ្យដីស្រែប្រមាណ៤២.៤១៤ហិកតារ ក្នុងចំណោមដីស្រែ២,២៦លានហិកតារក្នុងទូទាំងប្រទេស រងផលប៉ះពាល់ ដែលក្នុងនោះមាន ខេត្តបាត់ដំបង១៣.៧០៦ហិកតារ ពោធិ៍សាត់១២.៣៧៩ហិកតារ ព្រៃវែង៨.៥២៧ហិកតារ កណ្តាល៥.៥២៨ហិកតារ តាកែវ២.៥០២ហិកតារ និងកំពង់ធំ១៧២ហិកតារ។
លោក ញឹម វណ្ណដា បានមានប្រសាសន៍ថា ឆ្នាំនេះគ្រោះធម្មជាតិមានសភាពធ្ងន់ធ្ងរជាងបណ្តាឆ្នាំមុនៗ។ លោកបន្តថា រាជរដ្ឋាភិបាលបានត្រៀមលក្ខណៈជាស្រេចក្នុងការសង្គ្រោះប្រជាពលរដ្ឋពីគ្រោះទុរ្ភិក្សដែលអាចកើតមានជាយថាហេតុ រួមទាំងគ្រោះមហន្តរាយនៃព្យុះកេតសាណា នាពេលថ្មីៗនេះផងដែរ៕