បុរសឈ្មោះ ពៅ គ្រី និយាយរៀបរាប់ពីព្រឹត្តិការណ៍ដ៏គួរឲ្យភ័យរន្ធត់ដែលគាត់បានទទួលរងព្រមទាំងចង្អុលទៅផ្ទះគាត់ដែលត្រូវបាក់រលំទៅក្នុងទឹកនោះថា ៖ «ដំបូងខ្យល់មកបន្តិចៗទេ ដល់មួយសន្ទុះទៀត មកពីជ្រុងហ្នឹងខ្លាំងតែម្ដង តែត្រឹមមនុស្សក៏ប៉ើងដែរ។ ខ្ញុំបានពកូន១ ហើយម៉ែវាពម្នាក់ ស្រាប់តែខ្យល់ទាញប្រពន្ធខ្ញុំដួល ប្រពន្ធខ្ញុំបានស្រែក ជួយផង! ខ្ញុំមានជួយទាន់ឯណា ខ្ញុំនៅឯណោះដែរ ខ្ញុំបានតោងកូនមួយ ហើយនិងសសររោង កុំអីប៉ើងទាំងមនុស្ស ទាំងអីទាំងអស់ទៅ។ ខ្យល់កញ្ឆក់ ២-៣សា»។
បុរសវ័យប្រមាណ២៥ឆ្នាំឈ្មោះ ស្មោញ វ៉ាន និយាយរៀបរាប់ពីការតស៊ូដើម្បីសង្គ្រោះកូនស្រីអាយុ ៧ឆ្នាំដែលជាប់ក្នុងផ្ទះហើយត្រូវខ្យល់ព្យុះបក់បំប៉ើងចម្ងាយប្រមាណ ១០០ម៉ែត្រ ពីខ្នងទំនប់ចូលទៅក្នុងទឹក ឯម្តាយរបស់គាត់ត្រូវស្លាប់ក្នុងពេលនោះ យ៉ាងដូច្នេះថា ៖ «ព្យុះខ្លាំង ខ្ញុំហែលរកកូនខ្ញុំ ហើយឃើញកូនខ្ញុំកំពុងឱបសសរ ចាប់កូនខ្ញុំមក កូនខ្ញុំយំអើយយំៗ ឃើញហើយបានខ្ញុំស្ងាត់ ពួកម៉ាកខ្ញុំបានទៅចម្លងខ្ញុំមកវិញ។ ...ម៉ែខ្ញុំគាត់ភ័យ ភ័យគាំងបេះដូងស្លាប់ទៅ។ តាមមានទាន់ឯណា ទើរផ្ទះនៅឯណោះបានទៅទាន់... ខ្ញុំហែលមានទាន់ឯណា អស់ជើង ខ្ញុំថាលិចហើយ បើសិនជាផ្ទះហ្នឹងទាញទៅតែ ១០ម៉ែត្រទៀត អាចលិចមែន»។
គួរបញ្ជាក់ថា ប្រជាពលរដ្ឋប្រមាណ១៥០គ្រួសារ ដែលរងគ្រោះដោយខ្យល់ព្យុះនេះ បានប្រមូលផ្តុំគ្នារស់នៅតាមបណ្តោយខ្នងទំនប់លេខ៣៨ ដែលមានបណ្តោយប្រមាណ១២គីឡូម៉ែត្រ ស្ថិតក្នុងនៅភូមិសាស្ត្រឃុំពោធិបានមួយកំណាត់និងឃុំលើកដែកមួយកំណាត់នៃស្រុកកោះធំ ខេត្តកណ្តាល។ ការរស់នៅរបស់ប្រជាពលរដ្ឋទាំងនេះ ពុំទាន់មានការគ្រប់គ្រងជាផ្លូវការពីអាជ្ញាធរឃុំទាំង២នៅឡើយទេ។
មេឃុំពោធិបានលោក សាម ម៉េងហ៊រ មានប្រសាសន៍ពីការខូចខាតរបស់ប្រជាពលរដ្ឋក្នុងភូមិសាស្ត្រឃុំពោធិបានថា ៖ «ខ្យល់ព្យុះពីព្រឹកមិញហ្នឹង គ្រោះថ្នាក់ផ្ទះហ្នឹង គឺ ៥៨ខ្នង ក្នុងហ្នឹង ៥០ខ្នង គឺដួលដល់ដី និងមានប៉ើងធ្លាក់ប្រឡាយ ហើយ ៨ខ្នងទៀត គឺគ្រាន់តែទ្រេត។ ហើយក្នុងហ្នឹង គឺស្រ្តីម្នាក់ដែលស្លាប់ក្នុងអាយុ ៣១ឆ្នាំ ហ្នឹងផ្នែកឃុំខ្ញុំ»។
មេឃុំលើកដែក លោក សុខ គឹមលៀង មានប្រសាសន៍ថា ប្រជាពលរដ្ឋខាងឃុំលោក រងគ្រោះធ្ងន់ជាងខាងឃុំពោធិបាន ៖ «រលំដួលខ្ទេច គឺ ៥៤ខ្នង ហើយនិងទ្រេតជិតរលំហ្នឹង៣៧ខ្នង ហើយនិងប៉ះដំបូលនិងអស់ជញ្ជាំងហ្នឹង គឺ ៩០ខ្នង»។
គួរបញ្ជាក់ថា ស្ត្រីដែលរងគ្រោះបាត់បង់ជីវិតពីរនាក់នោះម្នាក់ឈ្មោះ សួន ថន អាយុ៥៨ឆ្នាំ ស្លាប់ដោយភ័យរន្ធត់រហូតដល់គាំងបេះដូង ឯម្នាក់ទៀតឈ្មោះ បេ យឿង អាយុ ២៨ឆ្នាំ ស្លាប់ដោយសារខ្យល់បោកខ្ទប់នឹងគល់ឈើ៕