ស្ថានការណ៍នយោបាយនៅក្នុងក្រុងបាងកកកាន់តែធ្ងន់ធ្ងរ

ដោយ ពៅ ពន្លក

2008-10-08

ស្ថានការណ៍នយោបាយក្នុងក្រុងបាងកករឹតតែធ្ងន់ធ្ងរឡើងនៅថ្ងៃពុធនេះ បន្ទាប់ពីការប្រយុទ្ធគ្នារវាងក្រុមប៉ូលិសបង្រ្កាបបាតុកម្មនិងបាតុករប្រឆាំងរដ្ឋាភិបាលកាលពីថ្ងៃអង្គារកន្លងទៅដែលបណ្តាលឲ្យមនុស្សពីរនាក់ស្លាប់និងជាង៤០០នាក់រងរបួស។

RFA Photo

បាតុករថៃស្ថិតក្រោមការវាយប្រហារដោយឧស្ម័នបង្ហូរទឹកភ្នែក ខណៈដែលពួកគេប៉ះទង្គិចជាមួយប៉ូលិសនៅកណ្ដាលក្រុងបាងកក នាថ្ងៃទី៧ តុលា ២០០៨។

កាសែតជាភាសាអង់គ្លេសរបស់ថៃឈ្មោះ The Nation បានពណ៌នាព្រឹត្តិការណ៍ប្រយុទ្ធគ្នានោះថាជាភាពខ្មៅងងឹតនៃខែតុលាសម្រាប់ប្រទេសថៃ។

អ្នកយកព័ត៌មានវិទ្យុអាស៊ីសេរីប្រចាំក្រុងបាងកកបានរាយការណ៍ថា ក្រុមអ្នកតវ៉ានៃសម្ព័ន្ធភាពប្រជាជនដើម្បីប្រជាធិបតេយ្យមកពីបណ្តាខេត្តភាគខាងត្បូងជាប់នឹងប្រទេសម៉ាឡេស៊ីត្រូវបានមេដឹកនាំសម្ព័ន្ធភាពនេះអះអាងថា បានធ្វើដំណើរមកចូលរួមការប្រឆាំងតវ៉ានឹងរដ្ឋាភិបាលនៅវិមានរដ្ឋាភិបាលនាក្រុងបាងកកដែលធ្វើឲ្យចំនួនអ្នកតវ៉ាប្រឆាំងនឹងរដ្ឋាភិបាលបានកើនឡើងរាប់ម៉ឺននាក់។

លោក ស៊ុមសាក់ កូសៃស៊ុក មេដឹកនាំមួយរូបនៃក្រុមប្រឆាំងនេះបានថ្លែងថា ក្រុមអ្នកតវ៉ាជាច្រើនរយនាក់មកពីខេត្តសុងក្លា ខេត្តរ៉ាក់ណុង ភាគខាងត្បូងនៃប្រទេសថៃ បានមកដល់ក្រុងបាងកកនិងបានចូលរួមប្រមូលផ្តុំគ្នានៅក្នុងអគាររដ្ឋាភិបាលដែលពួកអ្នកប្រឆាំងបានកាន់កាប់តាំងពីដើមខែសីហាមកនោះ។

លោកថា ក្រុមអ្នកតវ៉ាមកពីបណ្តាខេត្តផ្សេងៗទៀតនៅភាគខាងជើងប្រទេសសៀមនឹងធ្វើដំណើរមកចូលរួមក្នុងបាតុកម្មដែលត្រូវបានអ្នកវិភាគសភាពការណ៍នយោបាយថៃហៅថា ជាបដិវត្តន៍ប្រជាជនដើម្បីផ្តួលរំលំរដ្ឋាភិបាលនេះនៅថ្ងៃបន្ទាប់។

ក្រុមអ្នកដឹកនាំសម្ព័ន្ធភាពប្រឆាំងនេះថ្លែងទៀតថា ពួកគេបានត្រៀមខ្លួនជាស្រេចដើម្បីប្រយុទ្ធតទល់ជាមួយរដ្ឋាភិបាលក្នុងការទាមទារឲ្យរដ្ឋាភិបាលរបស់លោក ស៊ុមឆៃ រំលាយចោល។

មេបញ្ជាការទាហានសៀម លោក អនុពង្ស ប៉ៅចិន្តា បានថ្លែងប្រាប់ក្រុមអ្នកសារព័ត៌មានថា កងទាហានជើងគោក ជើងទឹក និងជើងអាកាសរាប់រយនាក់ត្រូវបានដាក់ពង្រាយនៅថ្ងៃពុធនេះ ដើម្បីត្រៀមអន្តរាគមន៍ភ្លាមៗដល់ចលាចលមិនប្រក្រត្រីណាមួយដែលកើតឡើងជាយថាហតុ ប៉ុន្តែលោកថាក្រុមទាហានទាំងនោះនឹងមិនធ្វើរដ្ឋប្រហារទេ។

នៅបន្ទាប់ពីការប្រយុទ្ធគ្នាដោយកាំភ្លើងបាញ់ផ្សែងបង្ហូរទឹកភ្នែក ជំពាមកៅស៊ូ និងការប្រើគ្រាប់បែកផ្សែងរវាងក្រុមបាតុករប្រឆាំងរដ្ឋាភិបាលនិងក្រុមប៉ូលិសប្រឆាំងបាតុកម្មនៅខាងមុខវិមានរដ្ឋសភាថៃកាលពីថ្ងៃអង្គារមក រដ្ឋមន្រ្តីក្រសួងសុខភាពសាធារណៈថៃ លោក ឆាឡឺម យូបំរុង បានប្រកាសនៅថ្ងៃពុធនេះថា មនុស្ស២នាក់បានស្លាប់និង៤៤៣នាក់រងរបួសដែលក្នុងនោះអ្នករបួសចំនួន៨២នាក់កំពុងស្ថិតក្រោមការព្យាបាលពីគ្រូពេទ្យនៅតាមមន្ទីរពេទ្យនានាក្នុងក្រុងបាងកកនៅឡើយ៕

បោះពុម្ព អ៊ីម៉េល