អ្នកយកព័ត៌មានវិទ្យុអាស៊ីសេរីប្រចាំក្រុងបាងកកបានរាយការណ៍មកថា នៅព្រឹកថ្ងៃព្រហស្បតិ៍នេះមេបញ្ជាការយោធាថៃ លោក អនុពង្សប៉ៅចិន្តា បានព្រមានថាអាចនឹងមានការវាយប្រហារអាក្រក់ថ្មីមួយទៀតដើម្បីបង្កឲ្យមានចលាចលនៅក្នុងក្រុងបាងកកពីក្រុមអ្នកតវ៉ាប្រឆាំងរដ្ឋាភិបាល។
មេបញ្ជាការកងទ័ពថៃថ្លែងដូច្នេះដោយយោងលើព័ត៌មានសម្ងាត់ពីក្រុមមន្ត្រីសន្តិសុខនិងមន្ត្រីចារកិច្ចដោយលោកបញ្ជាក់ថា ការរំខានថ្មីមួយអាចនឹងផ្ទុះឡើងក្នុងទម្រង់ជាការបង្កការភ័យខ្លាចដល់រដ្ឋាភិបាល។
នៅខណៈពេលជាមួយគ្នានេះទូរទស្សន៍និងបណ្តាញសារព័ត៌មានថៃបានរាយការណ៍ថា គណៈរដ្ឋមន្រ្តីរបស់លោក ស៊ុមឆៃ បានជួបប្រជុំប្រចាំសប្តាហ៍របស់ខ្លួននៅចំណតអាកាសយានដ្ឋាន ដនមឿង នៅព្រឹកថ្ងៃព្រហស្បតិ៍នេះ បន្ទាប់ពីខកខានមិនបានប្រជុំកាលពីល្ងាចថ្ងៃអង្គារដោយការអុកឡុកពីសំណាក់ក្រុមបាតុករនៃសម្ព័ន្ធភាពប្រជាជនដើម្បីលទ្ធិប្រជាធិបតេយ្យ។
ទូរទស្សន៍ថៃបានចាក់ផ្សាយនូវសកម្មភាពពង្រឹងសន្តិសុខដោយក្រុមប៉ូលិសថៃដែលត្រូវបានដាក់ពង្រាយនៅជុំវិញអាកាសយានដ្ឋានដនមឿងដើម្បីការពារដល់ការប្រជុំគណៈរដ្ឋមន្រ្តីនោះ។
ចំណែកឯក្រុមអ្នកគាំទ្រអតីតនាយករដ្ឋមន្ត្រីថាក់ស៊ីនរាប់រយនាក់មកពីសម្ព័ន្ធភាពប្រជាធិបតេយ្យដើម្បីប្រឆាំងនឹងរបបផ្តាច់ការយោធាកាលពីព្រឹកថ្ងៃព្រហស្បតិ៍នេះបានទៅប្រមូលផ្តុំគ្នានៅមុខទីបញ្ជាការកងប៉ូលិសថៃក្នុងក្រុងបាងកក ដើម្បីលើកកម្លាំងចិត្តដល់ក្រុមប៉ូលិសដែលធ្វើសកម្មភាពបង្រ្កាបក្រុមអ្នកតវ៉ាប្រឆាំងរដ្ឋាភិបាលដែលបានរំខានការប្រជុំសភាកាលពីព្រឹកថ្ងៃអង្គារ។
ការប្រយុទ្ធគ្នាដោយគ្រាប់បែកផ្សែង ការបាញ់ឧស្ម័នបង្ហូរទឹកភ្នែកនិងជំពាមរវាងកងប៉ូលិសបង្រ្កាបបាតុកម្មថៃនិងក្រុមអ្នកប្រឆាំងរដ្ឋាភិបាលមកពីសម្ព័ន្ធភាពប្រជាជនដើម្បីប្រជាធិបតេយ្យនៅខាងក្រៅវិមានរដ្ឋសភាថៃកាលពីថ្ងៃអង្គារបានបណ្តាលឲ្យមនុស្ស២នាក់បាត់បង់ជីវិតនិង៤៤៣នាក់រងរបួស។
ក្រុមអ្នកតវ៉ាប្រឆាំងរដ្ឋាភិបាលនៅតែទាមទារឲ្យរដ្ឋាភិបាលរបស់លោក ស៊ុមឆៃ វង់សាវ៉ាត់ រំលាយចោល ហើយព្រមានថាប្រសិនបើមិនរំលាយទេនោះពួកគេនឹងចាត់វិធានការក្តៅ៕