ការជំរុញរបស់សហគមន៍ខ្មែរនៅក្រៅប្រទេសនេះ ធ្វើឡើងនៅក្នុងជំនួបរវាងពលរដ្ឋខ្មែរអាមេរិកាំងដែលមកពីតាមរដ្ឋ California, New Jersey, Pennsylvania, Maryland និងVirginia ជាមួយលោក សុរិយា ស៊ូប៊ែឌី ក្នុងរដ្ឋធានី Washington សហរដ្ឋអាមេរិក កាលពីល្ងាចថ្ងៃច័ន្ទ ទី១៦ មេសា។
ប្រធានអង្គការខ្មែរ-អាមេរិកាំង ដើម្បីសិទ្ធិមនុស្ស និងប្រជាធិបតេយ្យ លោក ម៉ុង ហេង មានប្រសាសន៍ថា ក្រុមរបស់លោកបានជំរុញឲ្យលោក ស៊ូប៊ែឌី ចាប់អារម្មណ៍អំពីប្រព័ន្ធបោះឆ្នោតបែបឯកត្តនាម និងជំរុញឲ្យរដ្ឋសភាកម្ពុជា ធ្វើកំណែទម្រង់ច្បាប់បោះឆ្នោតរបស់ខ្លួនឲ្យមានប្រសិទ្ធភាព។
លោក ម៉ុង ហេង ប្រាថ្នាចង់ឃើញមន្ត្រីរាជការ និងកងប្រដាប់អាវុធដែលមានតួនាទីបម្រើពលរដ្ឋប្រកាន់យកភាពអព្យាក្រឹត្យ។ លោកមានប្រសាសន៍ថា ច្បាប់ស្ដីពីគណបក្សនយោបាយបច្ចុប្បន្ន បានចែងអំពីមន្ត្រីយោធា កងរាជអាវុធហត្ថ នគរបាល និងព្រះសង្ឃ ដែលត្រូវស្ថិតនៅអព្យាក្រឹត្យ មិនត្រូវធ្វើសកម្មភាពគាំទ្រ ឬប្រឆាំងគណបក្សនយោបាយណាមួយនោះឡើយ ប៉ុន្តែអាចមានសិទ្ធិបោះឆ្នោតជ្រើសរើសគណបក្សណាមួយបាន។
ថ្វីបើមានការចែងដូច្នេះមែន ច្បាប់នេះនៅមានចន្លោះប្រហោងដែលមិនបានចែងអំពីការដាក់ទណ្ឌកម្ម ឬការដាក់ពិន័យចំពោះមន្ត្រីណាដែលប្រព្រឹត្តបំពានច្បាប់នោះឡើយ។ របាយការណ៍របស់អង្គការឃ្លាំមើលការបោះឆ្នោតនានានៅកម្ពុជាកន្លងមក បានអោយដឹងថា គេសង្កេតឃើញមន្ត្រីរាជការ និងកងប្រដាប់អាវុធចូលរួមយ៉ាងសកម្មក្នុងការជួយធ្វើយុទ្ធនាការឃោសនាបោះឆ្នោតគាំទ្រគណបក្សកាន់អំណាច។
លោក សុរិយា ស៊ូប៊ែឌី មានប្រសាសន៍ក្រោយពីជំនួបជាមួយសហគមន៍ខ្មែរទាំងនោះថា ពលរដ្ឋខ្មែរនៅឯនាយសមុទ្រភាគច្រើនបានសម្ដែងកង្វល់អំពីបញ្ហាដីធ្លី និងដំណើរការបោះឆ្នោតឃុំសង្កាត់ ក៏ដូចជាដំណើរការបោះឆ្នោតសកលឆ្នាំ២០១២ ៖ «ខ្ញុំមានក្ដីសប្បាយរីករាយខ្លាំងដែលមានឱកាសស្ដាប់ពីក្ដីកង្វល់របស់ពលរដ្ឋខ្មែរអាមេរិកាំងទាំងនេះ។ ខ្ញុំចង់ឲ្យពួកគេផ្ដល់ព័ត៌មានច្បាស់ការអំពីកម្ពុជា ដើម្បីជួយខ្ញុំសម្រាប់របាយការណ៍ជូនដល់រដ្ឋាភិបាល។ ដូចលោកបានឃើញហើយថា មនុស្សមួយចំនួនលើកអំពីបញ្ហាសិទ្ធិដីធ្លី និងការបោះឆ្នោតនាពេលខាងមុខ ដែលពួកគេចង់ឲ្យមានភាពសេរីត្រឹមត្រូវ និងយុត្តិធម៌។»
ចំណែកលោកយាយអាយុ៨៤ឆ្នាំ មា្នក់ ឈ្មោះ លឹម សារ៉ាន់ ធ្វើដំណើរពីរដ្ឋ Virginia មកចូលរួមស្ដាប់លោក សុរិយា ស៊ូប៊ែឌី ដែរនោះ មានប្រសាសន៍ថា លោកយាយមានភាពអាណិត និងសោកសង្រែកដល់ពលរដ្ឋខ្មែរក្រីក្រ ដែលត្រូវគេបណ្ដេញទាំងបង្ខំចេញពីលំនៅឋាន។
សំណូមពរមួយទៀតរបស់ពលរដ្ឋខ្មែរនៅក្នុងកិច្ចប្រជុំនោះ គឺសុំអោយរដ្ឋាភិបាលកម្ពុជាពិភាក្សាជាមួយពលរដ្ឋរបស់ខ្លួនជាមុនសិន មុនសម្រេចចិត្តផ្ដល់ដីសម្បទានសេដ្ឋកិច្ចដល់ក្រុមហ៊ុន ឬមានការជម្លៀសចេញពីលំនៅឋាន ដើម្បីយកដីឲ្យពួកក្រុមហ៊ុននោះ ម្យ៉ាងទៀតរដ្ឋាភិបាលត្រូវផ្ដល់នូវកញ្ចប់សំណងសមរម្យដល់ពួកគេ។
ចំណែកអ្នកស្រី ប៊ូ ឆេងហុង ពីទីក្រុង Long Beach រដ្ឋ California វិញ បានជំរុញឲ្យរដ្ឋាភិបាលកម្ពុជាដោះស្រាយឲ្យមានយុត្តិធម៌នៅពេលចង់រឹបអូសយកដីធ្លីរបស់ប្រជាពលរដ្ឋសម្រាប់អភិវឌ្ឍន៍នោះ។
បញ្ហាដីធ្លីជាបញ្ហាដ៏ស្មុគស្មាញមួយ កំពុងកើតយ៉ាងរ៉ាំរ៉ៃសឹងពាសពេញផ្ទៃប្រទេស ចាប់តាំងពីកណ្ដាលទីក្រុង រហូតដល់តំបន់ព្រំដែននៃបណ្ដាប្រទេសជិតខាង។ រដ្ឋាភិបាលកម្ពុជាធ្លាប់បង្ហាញអំពីកិច្ចខិតខំប្រឹងប្រែងក្នុងការដោះស្រាយវិបត្តិនេះដែរ។ ប៉ុន្តែចាប់តាំងពីឆ្នាំ២០០០ មក បញ្ហានេះនៅតែវិវឌ្ឍឥតស្រាកស្រាន្ត។
របាយការណ៍ប្រចាំឆ្នាំរបស់អង្គការសង្គមស៊ីវិលក្នុងស្រុកកាលពីឆ្នាំ២០១១ កន្លងទៅនេះ បង្ហាញថា ពលរដ្ឋខ្មែរប្រមាណជិតបួនម៉ឺននាក់ កំពុងរងគ្រោះពីការបណ្ដេញចេញពីលំនៅឋានយ៉ាងបង្ខំ ដោយគ្មានសំណងសមរម្យ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។