ជនសង្ស័យម្នាក់ស្លាប់ខណៈស្ថិតក្រោមការឃុំគ្រងរបស់សមត្ថកិច្ច
ដោយ សុផលមុន្នី
2009-06-08
បុរសម្នាក់ក្នុងចំណោមមនុស្ស៥នាក់ ដែលសមត្ថកិច្ចកងរាជអាវុធហត្ថហៅមកសាកសួរពីរឿងអំពើឃាតកម្ម បានស្លាប់កាលពីយប់ថ្ងៃទី៦ ខែមិថុនា នៅក្នុងបន្ទប់អនាម័យនៃផ្ទះអ្នកភូមិមួយដែលជាកន្លែងឃាត់ខ្លួនក្នុងឃុំព្រៃត្រឡាច ស្រុករុក្ខគិរី ខេត្តបាត់ដំបង។
មេបញ្ជាការកងរាជអាវុធហត្ថ ស្រុករុក្ខគិរី លោក សៀវ សុផល បានថ្លែងនៅព្រឹកថ្ងៃច័ន្ទ ទី៨ មិថុនានេះថា អ្នកភូមិចំនួន៥នាក់ រស់នៅឃុំព្រែកជីក កាលពីថ្ងៃទី៦ ខែមិថុនា ត្រូវបានកងរាជអាវុធហត្ថកោះហៅឲ្យចូលខ្លួនដើម្បីសាកសួរទាក់ទិននឹងករណីឃាតកម្មលើស្ត្រីម្នាក់ ឈ្មោះ ហេង ហ៊ឹម អាយុ ៦៦ឆ្នាំ ជាឆ្មបភូមិរស់នៅភូមិព្រៃខ្ពស់ ឃុំព្រែកជីក ដែលត្រូវគេលួចសម្លាប់កាលពីថ្ងៃទី៣ ខែមិថុនា។
លោកបន្តថា អ្នកទាំង៥នាក់ត្រូវបានកងរាជអាវុធហត្ថ សុំផ្ទះអ្នកភូមិមួយនៅជិតសាលាឃុំព្រៃត្រឡាច ឲ្យដេកស្នាក់នៅដើម្បីរង់ចាំធ្វើការសាកសួរនៅពេលព្រឹក ស្រាប់តែបុរសឈ្មោះ ឃ្លាំង ឆក អាយុ ៤៦ឆ្នាំ បានបាត់ខ្លួននៅវេលាម៉ោងប្រហែលជា ១១យប់ ក្រោយមករកឃើញសពដោយមានខ្សែទាមរទេះគោចងជាប់នឹងធ្នឹមឈើដំបូលបង្គន់របស់ម្ចាស់ផ្ទះ។
លោក សៀវ សុផល មានប្រសាសន៍ដូច្នេះថា ៖ «៥នាក់ហ្នឹងសុទ្ធតែបងប្អូន បងថ្លៃ និងប្អូនថ្លៃ ដល់ពេលថា មកដេកជាមួយគ្នា ដល់ហើយបាត់បងថ្លៃ ឆោឡោទាំងយប់តែម្ដង។ (រកឃើញ) ចងជាប់នឹងមេដំបូលបង្គន់»។
ឃ្លាំង ធឿន អាយុ ២៩ឆ្នាំ ប្អូនប្រុសសពជនរងគ្រោះ ហើយត្រូវគេកោះហៅដើម្បីសាកសួរដែរនោះ បានថ្លែងថា ក្រោយពីបាត់បងប្រុសរបស់ខ្លួន ពួកគេក៏នាំគ្នាដើររកទាំងយប់ ក្រោយមកប្រទះឃើញសពចងកស្លាប់នៅក្នុងបង្គន់។
លោកបន្តថា ៖ «ខ្ញុំសង្ស័យថា គេធ្វើបាប វ៉ៃហើយ យកទៅចង»។
ទោះជាយ៉ាងនេះក្តី លោកស្រី មោង យឿត អាយុ ៤៧ឆ្នាំ ភរិយាសពបានថ្លែងថា នៅលើរាងកាយសពប្តី លោកស្រីមានការសង្ស័យថា ការស្លាប់នោះដោយអំពើទារុណកម្ម ៖ «ខ្ញុំស្រាតខោគាត់ទៅ ឃើញឈាម ឈាមជាប់ខោ[ទ្រនាប់]គាត់ច្រើន ហើយខ្ញុំក៏ហៅកូនខ្ញុំឲ្យជួយបង្វិលឃើញខ្នងជាំបីកន្លែង ហើយកែងដៃគាត់ឃើញស្នាមបែកទាំងសងខាង។ ខ្ញុំសង្ស័យថា ប្តីខ្ញុំមិនមែនចងកដោយខ្លួនឯងទេ សង្ស័យថា គេលួចវាយ ឲ្យសន្លប់រួចហើយយកទៅចងកសម្លាប់»។
មន្ត្រីសិទ្ធិមនុស្សសមាគមការពារសិទ្ធិមនុស្ស អាដហុក លោក យិន ម៉េងលី ដែលបានចុះស៊ើបអង្កេតករណីនេះ មិនទាន់ធ្វើការសន្និដ្ឋានជាក់លាក់ជុំវិញការស្លាប់របស់លោក ឃ្លាំង ឆក នេះទេ៖ «ករណីនេះមានការលំបាកក្នុងការសន្និដ្ឋានដែរ ដោយសាសពត្រូវបានយកដុតជាបន្ទាន់»។
កាលពីខែមេសានិងឧសភាកន្លងទៅនេះ មានជនសង្ស័យពីរនាក់ហើយ បានស្លាប់នៅកន្លែងឃុំខ្លួនរបស់ប៉ូលិសខេត្តប៉ៃលិន និងប៉ូលិសស្រុកមោងឫស្សីខេត្តបាត់ដំបង ដែលក្រុមគ្រួសាបានចោទប្រកាន់ថា ការស្លាប់អាចបណ្តាលមកពីការធ្វើទារុណកម្មហួសហេតុរបស់ប៉ូលិស។
គួរបញ្ជាក់ថា សពលោក ឃ្លាំង ឆក ក្រោយពីគេប្រទះឃើញ ត្រូវយកទៅដាក់នៅវត្តស្តុកប្រវឹក ស្ថិតក្នុងឃុំព្រៃត្រឡាច ស្រុករុក្ខគិរី ហើយត្រូវបានគេបូជាភ្លាមៗកាលពីព្រឹកថ្ងៃអាទិត្យ ទី៧ មិថុនានេះ៕
អត្ថបទដែលទាក់ទង
ប៉ូលិសខែត្រមណ្ឌលគិរីតាមចាប់ជនសង្ស័យ២នាក់ក្នុងករណីប្លន់
បុរសម្នាក់ត្រូវសមត្ថកិច្ចចាប់ខ្លួនដោយសារទាត់កូនស្រីឲ្យសន្លប់
បុគ្គលិកអង្គការមិត្តគ្មានព្រំដែនអំពាវនាវឲ្យពន្លឿនការស៊ើបអង្កេតករណីឃាតកម្ម
ទាហានម្នាក់រងរបួសធ្ងន់ដោយសារមេបញ្ជាការវាយដំ
ប៉ូលិសម្នាក់នៅមណ្ឌលគិរីរងការចោទថាប៉ុនប៉ងធ្វើឃាតអ្នកភូមិ
ពលរដ្ឋម្នាក់នៅកំពង់ឆ្នាំងត្រូវអ្នកយាមឡូត៍នេសាទបាញ់ឲ្យស្លាប់
អតីតអ្នកកាសែតម្នាក់ត្រូវផ្តន្ទាទោសឲ្យជាប់គុក២ឆ្នាំពីបទផ្សាយព័ត៌មានមិនពិត
បុរសតៃវ៉ាន់ម្នាក់ជាប់គុក៣៧ឆ្នាំពីបទរត់ពន្ធគ្រឿងញៀន
ជនដាណាម៉ាកម្នាក់រងការចោទថាចាប់បង្ខំរួមភេទជាមួយកុមារីខ្មែរ
ក្មេងស្រី១៧នាក់ត្រូវឃាត់ខ្លួនពីបទសង្ស័យថាប្រកបរបរផ្លូវភេទ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.