ពលរដ្ឋចំនួន ៤ឃុំ គឺឃុំគគីរ ឃុំអំពិល ឃុំដូង និងឃុំកំពង់ត្រាច ស្ថិតក្នុងស្រុករមាសហែក ខេត្តស្វាយរៀង កំពុងព្រួយបារម្ភពីការបាត់បង់ដីស្រែចម្ការធ្លាប់បង្កបង្កើនផលបណ្ដាលមកពីភាពអនាធិបតេយ្យនៃទូកបូមខ្សាច់វៀតណាម ចូលមកធ្វើសកម្មភាពបូមខ្សាច់ក្នុងមូលដ្ឋាន ហើយអាជ្ញាធរមិនមានវិធានការទប់ស្កាត់។
ក្រុមពលរដ្ឋបានសំណូមពរទៅលោកនាយករដ្ឋមន្ត្រី ហ៊ុន សែន ក៏ដូចជាថ្នាក់ដឹកនាំស្ថាប័នពាក់ព័ន្ធ មានដូចជា ក្រសួងបរិស្ថាន និងក្រសួងធនធានទឹក ជាដើម ឲ្យជួយអន្តរាគមន៍ទប់ស្កាត់សកម្មភាពទូកបូមខ្សាច់វៀតណាម ឲ្យមានប្រសិទ្ធភាព បើពុំដូច្នេះទេ ដីស្រែចម្ការពលរដ្ឋក្នុងមូលដ្ឋាន និងត្រូវបាក់ចូលទន្លេ មានទំហំកាន់តែច្រើនទៅថ្ងៃអនាគត។
ពលរដ្ឋរស់នៅឃុំកំពង់ត្រាច ស្រុករមាសហែក បានលើកឡើងប្រហាក់ប្រហែលគ្នាថា សកម្មភាពទូកបូមខ្សាច់របស់វៀតណាម គឺមានមន្ត្រីប៉ូលិសការពារព្រំដែនច្រកបិទត្រាស់ ជាអ្នកជួយកាង ឬការពារសកម្មភាពបូមខ្សាច់ទាំងនេះ ដោយក្នុងមួយថ្ងៃៗ មានទូកវៀតណាមពី ៥គ្រឿង ទៅជិត ១០គ្រឿង បានចូលមកបូមខ្សាច់ក្នុងទឹកដីស្រុករមាសហែក ចាប់តាំងពីឆ្នាំ២០០៨ មកម្ល៉េះ។
ក្រុមប្រជាពលរដ្ឋបានឲ្យដឹងដូច្នេះ ៖ «ខ្ញុំមកពីស្រែ ខ្ញុំឃើញទូកបូមខ្សាច់ ៤ ទៅ ៥គ្រឿង នៅគ្រប់កន្លែង បូមពេលព្រឹក ពេលថ្ងៃទល់ល្ងាច។ ច្រាំងធ្លាប់ដើមឈើ ដំបូងបាក់ធ្លាក់ចូលទន្លេអស់ហើយ។ មួយថ្ងៃទូកបូមខ្សាច់យួនបួនដប់គ្រឿង និងបាក់ដី ដើមឈើចូលទន្លេ»។
ទាក់ទងបញ្ហានេះ លោក កែវ សៀត អនុប្រធានភូមិតាខុប ស្ថិតក្នុងឃុំកំពង់ត្រាច ស្រុករមាសហែក នៅព្រឹកថ្ងៃទី១៨ ខែសីហា ក៏បានសំណូមពរទៅថ្នាក់ដឹកនាំស្ថាប័នកំពូលៗនៃរាជរដ្ឋាភិបាល ឲ្យជួយទប់ស្កាត់សកម្មភាពទូកវៀតណាម ដែលបានចូលមកបូមខ្សាច់នៅក្នុងមូលដ្ឋាននេះឲ្យបានទាន់ពេលវេលា។
លោក កែវ សៀត បន្ថែម ៖ «បូមខ្សាច់ដើម្បីបំបាក់ដីចូលច្រាំងទន្លេ។ ទូកបូមខ្សាច់សរុបតាំងពីកើតមកឃើញមានប្រហែល ២៥ទូក ចំណុះ ៥០គូប ៨០គូប បូមតាំងពីម៉ោង ៦ព្រឹកដល់ម៉ោង ៥។ មានថ្ងៃណាមិនពេញ បើថ្ងៃណាមិនពេញវាបូមរហូតដល់ពាក់កណ្ដាលយប់»។
បន្ថែមលើនេះ លោក គង់ សាលៀង មេឃុំកំពង់ត្រាច បានទទួលស្គាល់ថា សព្វថ្ងៃនេះទូកបូមខ្សាច់វៀតណាម ពិតជាបានចូលមកធ្វើសកម្មភាពបូមខ្សាច់ក្នុងមូលដ្ឋានរបស់លោកដូចពលរដ្ឋលើកឡើងពិតមែន។ លោកថា ករណីនេះលោកធ្លាប់បានរាយការណ៍ជូនថ្នាក់ដឹកនាំស្រុកឲ្យជួយចាត់វិធានការជាច្រើនលើកមកហើយ ប៉ុន្តែបទល្មើសទាំងនេះនៅតែបន្តកើតមាន។
លោកមេឃុំបានអំពាវនាវទៅស្ថាប័នពាក់ព័ន្ធ ពិសេសលោកនាយករដ្ឋមន្ត្រី ហ៊ុន សែន ឲ្យលោកជួយមានវិធានការទប់ស្កាត់ភាពអនាធិបតេយ្យនៃទូកបូមខ្សាច់វៀតណាម ដែលអាជ្ញាធរព្រំដែនបានអនុញ្ញាតឲ្យចូលមកធ្វើសកម្មភាពក្នុងមូលដ្ឋានឃុំកំពង់ត្រាច ក៏ដូចជាតាមឃុំមួយចំនួនទៀតឲ្យបានទាន់ពេលវេលា ប្រយោជន៍ដើម្បីរក្សាដីស្រែចម្ការបង្កបង្កើនផលរបស់ពលរដ្ឋ កុំឲ្យបាក់ចូលទៅក្នុងទន្លេបន្តទៀត។
លោក គង់ សាលៀង បន្ថែម ៖ «ព្រោះវាឃើញថាវា ហិនហោចអស់ហើយ បាក់ទាំងច្រាំងទន្លេ ទាំងដីប្រជាជនដល់ដីស្រែទៀត។ កន្លងមករាយការណ៍ជូនថ្នាក់ដឹកនាំស្រុក ស្រុកបានចុះទៅមើលដែរ មិនដឹងជារាយការណ៍ទៅថ្នាក់លើយ៉ាងម៉េចចេះតែស្ងាត់ៗទៅ ខ្ញុំក៏មិនបានដឹងថា ម៉េចដែរ។ ប្រជាជនរាយការណ៍មកថា ឃើញតែទូកវៀតណាម អត់ឃើញមានខ្មែរទេ ហើយស្រឡាងមានទំហំធំៗទៀត»។
វិទ្យុអាស៊ីសេរី មិនអាចទាក់ទងលោក ជាង អំ អភិបាលខេត្តស្វាយរៀង ដើម្បីបំភ្លឺពីកង្វល់របស់ពលរដ្ឋចំនួន ៤ឃុំ នៅស្រុករមាសហែក ដែលព្រួយបារម្ភពីការបាត់បង់ដីស្រែចម្ការ ផ្ដើមដោយទូកបូមខ្សាច់របស់ឈ្មួញវៀតណាម បានទេ តាមទូរស័ព្ទ នៅរសៀលថ្ងៃទី១៨ ខែសីហា។ ប៉ុន្តែលោក ហែម សុគន្ធ អភិបាលស្រុករមាសហែក មានប្រសាសន៍ថា នឹងចាត់វិធានការទប់ស្កាត់បទល្មើសនៃទូកបូមខ្សាច់របស់ឈ្មួញវៀតណាម មិនឲ្យចូលមកធ្វើសកម្មភាពក្នុងមូលដ្ឋាននេះទៀតទេ។
លោក ហែម សុគន្ធ មានប្រសាសន៍ដូច្នេះ ៖ «ឥឡូវខ្ញុំក៏បានព័ត៌មានពីប្រជាពលរដ្ឋដែរ តែឥឡូវខ្ញុំបានចាត់វិធានការហាមឃាត់មិនឲ្យធ្វើសកម្មភាពទៀតទេ»។
ទាក់ទងបញ្ហានេះដែរ មន្ត្រីសង្គមស៊ីវិលនៅខេត្តស្វាយរៀង បានលើកឡើងថា បទល្មើសរបស់ទូកបូមខ្សាច់វៀតណាម ដែលអាចធ្វើសកម្មភាពក្នុងមូលដ្ឋានស្រុករមាសហែក ទៅបាន ទាល់តែមានការអនុញ្ញាតពីអាជ្ញាធរតាមព្រំដែន ឬអាជ្ញាធរពាក់ព័ន្ធក្នុងមូលដ្ឋាន ទើបឈ្មួញហ៊ានចូលទូកឆ្លងកាត់ព្រំដែនពីប្រទេសវៀតណាម ចូលមកក្នុងទឹកដីខ្មែរបាន។
លោក ប្រាក់ សារ៉ាន់ មន្ត្រីសម្របសម្រួលសមាគមអាដហុក ប្រចាំខេត្តស្វាយរៀង ដែលបានចុះអង្កេតផ្ទាល់ដល់ទីតាំងបាក់ដីស្រែចម្ការពលរដ្ឋចូលទៅក្នុងទន្លេ បណ្ដាលមកពីសកម្មភាពទូកបូមខ្សាច់របស់ឈ្មួញវៀតណាម នៅព្រឹកថ្ងៃទី១៨ ខែសីហា មានប្រសាសន៍ថា បើអាជ្ញាធរមិនទប់ស្កាត់ទូកបូមខ្សាច់កំពុងធ្វើសកម្មភាពនៅមូលដ្ឋានស្រុករមាសហែក ឲ្យបានទាន់ពេលទេ ពលរដ្ឋនឹងបាត់បង់ដីបង្កបង្កើនផលកាន់តែច្រើនទៅថ្ងៃអនាគត។
លោក ប្រាក់ សារ៉ាន់ ឲ្យដឹងបន្ថែមដូច្នេះ ៖ «ប៉ះពាល់ដីស្រែធ្លាក់ចូលក្នុងទន្លេគាត់ថា ច្រើនគ្រួសារ ហើយកន្លែងខ្លះបាក់ដល់ទៅ ៥០ ទៅ ៦០ម៉ែត្រ ហើយគាត់បានប្រាប់ថា ទូកវៀតណាម ដែលបានចូលមកហ្នឹង ឥឡូវដល់ទន្លេបាក់ច្រាំងធំទៅៗ ទូកវៀតណាម ដែលចូលមកអាធំៗច្រើនមកបូមខ្សាច់ហ្នឹង ហើយពេលខ្លះបូមពេលយប់ទៀត។ បារម្ភណាស់ទៅថ្ងៃមុខទៅ ខ្លាចស្រែគាត់ដែលមានតិចតួចហ្នឹង ខូចខាតដោយសារតែបាក់ច្រាំងទន្លេធ្លាក់ទៅ ធ្វើឲ្យគាត់អនាគតទៅមុខគាត់បាត់ដីស្រែរបស់គាត់នៅតាមបណ្តោយមាត់ទន្លេ»។
ចំណែកលោក នុត បូពិណ្ណារ័ត្ន មន្ត្រីសម្របសម្រួលអង្គការលីកាដូ ប្រចាំខេត្តស្វាយរៀង បានថ្លែងដោយចង់ឃើញចំណាត់ការរបស់ថ្នាក់ដឹកនាំរដ្ឋាភិបាល និងក្រសួងពាក់ព័ន្ធ ធ្វើយ៉ាងណាត្រូវទប់ស្កាត់ភាពអនាធិបតេយ្យនៃទូកបូមខ្សាច់វៀតណាម កំពុងធ្វើសកម្មភាពក្នុងមូលដ្ឋានស្រុករមាសហែក ឲ្យបានទាន់ពេល និងមានប្រសិទ្ធភាព។
លោក នុត បូពិណ្ណារ័ត្ន បន្ថែម ៖ «បើតាមការពិនិត្យរបស់សង្គមស៊ីវិលដល់កន្លែងកើតហេតុ យើងព្រួយបារម្ភជំនួសពលរដ្ឋដែរ គឺយើងមើលឃើញជាក់ស្ដែង កន្លែងខ្លះដីស្រែបានបាក់បាត់អស់ ១ស្រែ និងកន្លែងខ្លះពាក់កណ្ដាលស្រែតែម្ដង ហើយបើមិនទប់ស្កាត់របស់ប្រជាជនវៀតណាម ឲ្យបានទាន់ពេលវេលាទេ នឹងនាំឲ្យបាត់បង់ផលប្រយោជន៍ និងដីស្រែពលរដ្ឋទាំងស្រុង មិនយូរមិនឆាប់បីបួនឆ្នាំខាងមុខនឹងបាក់កាន់តែច្រើន។ រយៈពេលបីឆ្នាំសោះយើងឃើញថា ការខូចខាតនូវផលប្រយោជន៍របស់ពលរដ្ឋមានទំហំកាន់តែធំ»។
ក្រុមពលរដ្ឋមកពី ៤ឃុំ ស្ថិតក្នុងស្រុករមាសហែក បានឲ្យដឹងថា បច្ចុប្បន្នមានប្រជាពលរដ្ឋចំនួនជិត ៤០០គ្រួសារ បានផ្តិតស្នាមមេដៃដើម្បីត្រៀមដាក់ញត្តិជូនលោកអភិបាលខេត្តស្វាយរៀង ថ្នាក់ដឹកនាំក្រសួងធនធានទឹក ក្រសួងបរិស្ថាន និងអង្គការសង្គមស៊ីវិល ឲ្យជួយជំរុញទៅរដ្ឋាភិបាលជួយទប់ស្កាត់ភាពអនាធិបតេយ្យនៃទូកបូមខ្សាច់វៀតណាម កំពុងធ្វើសកម្មភាពក្នុងមូលដ្ឋានឲ្យបានឆាប់ និងមានប្រសិទ្ធភាព។
ពលរដ្ឋបន្តថា សកម្មភាពបូមខ្សាច់របស់ឈ្មួញវៀតណាម ដែលបានធ្វើសកម្មភាពក្នុងមូលដ្ឋានស្រុករមាសហែក បានកើតមានតាំងពីឆ្នាំ២០០៨ មកម្លេះ ប៉ុន្តែនៅឆ្នាំ២០១១ នេះ ទូកបូមខ្សាច់ទាំងនេះបានចូលមកធ្វើសកម្មភាពមានចំនួនកាន់តែច្រើន និងមានមន្ត្រីប៉ូលិសការពារព្រំដែនច្រកបិទត្រាស់ ធ្វើជាខ្នងបង្អែករង់ចាំការពារថែមទៀតផង៕