មនុស្ស៦នាក់ដែលផ្ទុកA(H1N1)នៅកម្ពុជាបានជាសះស្បើយវិញហើយ
ដោយ ឃឹម សារ៉ង
2009-07-03
មន្ត្រីសុខាភិបាលកម្ពុជាបានមានប្រសាសន៍ថា មនុស្ស៦នាក់ដែលគេរកឃើញថា មានឆ្លងគ្រុនផ្តាសាយថ្មី A(H1N1) ហើយ បានត្រូវឲ្យសម្រាកព្យាបាលកាលពីចុងខែមិថុនាកន្លងទៅនោះ ត្រូវបានអនុញ្ញាតឲ្យវិលត្រឡប់ទៅគេហដ្ឋានវិញហើយ។
អ្នកធ្វើដំណើរដើរកាត់ម៉ាស៊ីនស្កេនកម្ដៅនៅក្នុងព្រលានយន្តហោះអន្តរជាតិភ្នំពេញ កាលពីថ្ងៃ២៩ មេសា ២០០៩។
លោកវេជ្ជបណ្ឌិត លី សូវ៉ាន់ អនុប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល មានប្រសាសន៍បញ្ជាក់កាលពីថ្ងៃព្រហស្បតិ៍យ៉ាងដូច្នេះ ៖ «រាល់ថ្ងៃមាន ៦ករណី។ ឥឡូវពួកគេចាកចេញពី[មន្ទីរពេទ្យ]វិញអស់ហើយ។ ពួកគាត់មានសុខភាពល្អហើយ យើងឲ្យចាកចេញទាំង៦នាក់ហ្នឹង»។
លោកវេជ្ជបណ្ឌិត លី សូវ៉ាន់ មានប្រសាសន៍ទៀតថា ប្រព័ន្ធតាមដានអ្នកដំណើរនៅតាមច្រកព្រលានយន្តហោះនិងតាមច្រកព្រំដែននៅតែដំណើរការដដែល ហើយក៏នៅតែឲ្យអ្នកដំណើរបំពេញទម្រង់បែបបទអំពីអសយដ្ឋានទាក់ទងពេលណាមានករណីបន្ទាន់នោះ ៖ «ប្រព័ន្ធតាមដានរបស់យើង គឺយើងតាមដានរហូត យើងមានករណីសង្ស័យរាល់ថ្ងៃ យើងតាមដានមើលរហូត»។
កាលពីចុងខែមិថុនាកន្លងទៅ នៅប្រទេសកម្ពុជាមានរកឃើញឆ្លងគ្រុនផ្តាសាយ A(H1N1) ៦ករណី ក្នុងនោះ ៤នាក់ជាយុវនិស្សិតពីសហរដ្ឋអាមេរិក ម្នាក់ជាបុរសហ្វ៊ីលីពីន និងម្នាក់ទៀតជាជនជាតិខ្មែរនៅក្នុងស្រុក។
លោកវេជ្ជបណ្ឌិត លី សូវ៉ាន់ បញ្ជាក់ដូច្នេះ ៖ «ជនជាតិហ្វ៊ីលិពីនគាត់មកពីខាងក្រៅ ចំពោះជនជាតិខ្មែរយើងគាត់មានមិត្តភក្ដិរបស់គាត់ គាត់មកទស្សនកិច្ចនៅស្រុកខ្មែរទៅ បានមកជួបជាមួយជនជាតិខ្មែរយើង បានឆ្លងមកខ្មែរយើង ហើយយើងបានរកឃើញទាន់ពេលវេលា»។
ឃឹម សារ៉ង ៖ មិត្តភក្ដិគាត់ហ្នឹងមកពីប្រទេសណាដែរ? លី សូវ៉ាន់ ៖ គាត់មកពីអូស្ត្រាលី រួចហើយឆ្លងទៅប្រទេសវៀតណាម។ ឃឹម សារ៉ង ៖ ប៉ុន្តែ ខ្មែរមកពីអូស្ត្រាលីនោះ យើងអត់បានដឹងថា គាត់ឆ្លងអីទេអ៊ីចឹងឬ? លី សូវ៉ាន់ ៖ «គាត់បញ្ជាក់នៅវៀតណាម ថាពេលទៅដល់វៀតណាម គាត់មានរោគសញ្ញាហ្នឹង។ ហើយយើងក៏តាមដានជនជាតិខ្មែរហ្នឹង ក៏រកឃើញថា គាត់មាន[A(H1N1)]ដែរ។ ដូច្នេះយើងទប់ស្កាត់បានទាន់ពេលវេលា»។
គួររំឭកថា បន្ទាប់ពីមជ្ឈមណ្ឌលជាតិកម្ពុជាសម្រាប់ជំងឺផ្តាសាយ បានបញ្ជាក់កាលពីថ្ងៃទី២៣ មិថុនា ២០០៩ ថា មានករណីវិជ្ជមាននៃជំងឺផ្តាសាយ A(H1N1) មួយករណីនោះមក នៅថ្ងៃទី២៤ មិថុនា ក្រសួងសុខាភិបាលនិងអង្គការសុខភាពពិភពលោកបានប្រកាសពីវត្តមានគ្រុនផ្តាសាយថ្មីនេះជាលើកដំបូងនៅប្រទេសកម្ពុជា៕
អត្ថបទដែលទាក់ទង
អ្នកកើតជំងឺផ្ដាសាយA(H1N1)នៅកម្ពុជាកើនដល់៤៤៤នាក់
មន្ត្រីសុខាភិបាល៖ ពលរដ្ឋយកចិត្តទុកដាក់ក្នុងការការពារជំងឺផ្តាសាយថ្មី
មន្ទីរសុខាភិបាលខែត្រសៀមរាបគ្រោងធ្វើយុទ្ធនាការផ្សព្វផ្សាយពីផ្តាសាយថ្មី
សហជីពកម្មករសុំឲ្យអាជ្ញាធរផ្សព្វផ្សាយពីវិធីការពារជំងឺផ្ដាសាយថ្មី
ថ្នាំបង្ការជំងឺគ្រុនផ្តាសាយA(H1N1)នឹងមកដល់កម្ពុជាខែក្រោយ
មន្រ្តីសុខាភិបាលបារម្ភពីការឆ្លងនៃជំងឺផ្ដាសាយថ្មីក្នុងពេលអុំទូក
WHOនិងអាជ្ញាធរត្រៀមចែកខិត្តប័ណ្ណអប់រំពីផ្ដាសាយថ្មីក្នុងពិធីបុណ្យអុំទូក
ពលរដ្ឋបារម្ភពីការឆ្លងរាតត្បាតនៃគ្រុនផ្ដាសាយA(H1N1)នៅកម្ពុជា
WHOនិងក្រសួងសុខាភិបាលគ្រោងធ្វើយុទ្ធនាការផ្សព្វផ្សាយពីគ្រុនផ្តាសាយថ្មី
អ្នកស្លាប់ដោយសារគ្រុនផ្ដាសាយ A(H1N1) កើនដល់៣នាក់ហើយនៅកម្ពុជា
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.