មន្ត្រីស្ថានទូតអាមេរិក មិនជួបតំណាងកម្មកររោងចក្រតៃណាន
h081612ay.mp3
មន្ត្រីសហភាពសហជីពកម្ពុជា និងតំណាងកម្មកររោងចក្រតៃណាន (Tai Nan) អតីតរោងចក្រតៃយៀន (Tai Yean) ទី១ ទី២ និងខេមវែល (Camwell) ប្រមាណ២០នាក់ បានឈរលើកបដាពីមុខស្ថានទូតសហរដ្ឋអាមេរិក ប្រចាំប្រទេសកម្ពុជា នៅព្រឹកថ្ងៃទី១៦ ខែសីហា ឆ្នាំ២០១២។
តំណាងកម្មកររោងចក្រតៃណាន លោកស្រី សុខ ហេង ដែលបានឈរលើកបដាក្រោមកម្ដៅថ្ងៃវេលាម៉ោង១១ព្រឹក ពីមុខស្ថានទូតសហរដ្ឋអាមេរិក បានសម្ដែងការខកចិត្ត នៅគ្រាឃើញទង្វើរបស់មន្ត្រីស្ថានទូតសហរដ្ឋអាមេរិក ស្រដៀងគ្នាទៅនឹងទង្វើរបស់មន្ត្រីរដ្ឋាភិបាល ដែលមិនសូវខ្វល់ខ្វាយពីសុខទុក្ខប្រជាពលរដ្ឋ ឬកម្មករកន្លងមក។
លោកស្រី សុខ ហេង ឲ្យដឹងថា គោលបំណងនៃការប្រមូលផ្តុំរបស់កម្មករនៅមុខស្ថានទូត ដើម្បីចង់ដឹងលទ្ធផលនៃការដាក់ញត្តិរបស់ពួកគេ ជូនស្ថានទូតសហរដ្ឋអាមេរិក កាលពីខែកក្កដា នោះ តើមន្ត្រីស្ថានទូតបានជួយគិតគូរបានកម្រិតណា។
កាលពីថ្ងៃទី២៣ ខែកក្កដា ឆ្នាំ២០១២ កម្មកររោងចក្រតៃណាន ប្រមាណ៥០នាក់ បានដាក់ញត្តិដាក់ជូនស្ថានទូតសហរដ្ឋអាមេរិក ដើម្បីឲ្យជួយអន្តរាគមន៍ទៅក្រុមហ៊ុនធំៗ ដែលបញ្ជាទិញសម្លៀកបំពាក់ពីក្រុមហ៊ុនតៃណាន ឲ្យជួយជំរុញទៅថៅកែរោងចក្រនេះ ផ្តល់សំណងជូនពួកគេលើករណីប្ដូរឈ្មោះក្រុមហ៊ុន។
លោក រ៉ុង ឈុន ប្រធានសហភាពសហជីពកម្ពុជា ដែលបានដឹកនាំកម្មកររោងចក្រតៃណាន មកប្រមូលផ្តុំគ្នាមុខស្ថានទូតសហរដ្ឋអាមេរិក លោកបានសោកស្ដាយ និងខកចិត្តចំពោះសកម្មភាពរបស់មន្ត្រីស្ថានទូតសហរដ្ឋអាមេរិក ដែលគេចមិនចេញមកជួបកម្មករ។
ទោះយ៉ាងណា មេដឹកនាំសហជីពកម្មកររូបនេះ មិនទាន់លះបង់ការតស៊ូ ដើម្បីស្វែងរកកិច្ចអន្តរាគមន៍ពីប្រទេសមហាអំណាចសហរដ្ឋអាមេរិក ទេ ប៉ុន្តែលោកថា នឹងមានគម្រោងប្រមូលផ្តុំគ្នាទ្រង់ទ្រាយធំ នាថ្ងៃខាងមុខ ដើម្បីស្នើកិច្ចអន្តរាគមន៍ជាថ្មីម្តងទៀត។
ទាក់ទងបញ្ហានេះ វិទ្យុអាស៊ីសេរី បានផ្ញើសំណួរតាមរយៈអ៊ីមែលជូនលោក វីល្លៀម ថត (William Todd) ឯកអគ្គរដ្ឋទូតសហរដ្ឋអាមេរិក ប្រចាំទីក្រុងភ្នំពេញ ដើម្បីបំភ្លឺជុំវិញការខកខានមិនបានចេញមុខជួបកម្មកររោងចក្រតៃណាន នេះដែរ ប៉ុន្តែមិនទាន់មានការឆ្លើយតបទេ នៅរសៀលថ្ងៃទី១៦ ខែសីហា។
កម្មកររោងចក្រតៃណាន អតីតរោងចក្រតៃយៀនទី១ ទី២ និងខេមវែល មានទីតាំងនៅឃុំបែកចាន ស្រុកអង្គស្នួល ខេត្តកណ្ដាល បានធ្វើកូដកម្មចាប់តាំងពីថ្ងៃទី២៥ ខែមិថុនា ឆ្នាំ២០១២ មកម្ល៉េះ។ ប៉ុន្តែ រហូតមកដល់ថ្ងៃទី១៦ ខែសីហា មិនទាន់មានមន្ត្រីក្រសួង ឬស្ថាប័នផ្នែកណាមួយជួយរកដំណោះស្រាយជូនពួកគេទេ។
តំណាងកម្មករម្នាក់ទៀត ឈ្មោះ ខឺន កុសល បានអះអាងថា សព្វថ្ងៃនេះ តំណាងរោងចក្រតៃណាន បានចោទការធ្វើកូដកម្មរបស់ក្រុមកម្មករថា ជាទង្វើខុសច្បាប់ ប៉ុន្តែតំណាងរោងចក្របានព្យាយាមទិញទឹកចិត្តតំណាងកម្មករ ជាថ្នូរមិនឲ្យបន្តដឹកនាំកម្មករធ្វើកូដកម្មបន្តទៀត។
ការធ្វើកូដកម្មនេះ ក្រុមកម្មករបានទាមទារឲ្យភាគីនិយោជក ឬថៅកែក្រុមហ៊ុន ផ្តល់ប្រាក់អត្ថប្រយោជន៍តាមច្បាប់ស្ដីពីការងារលើ ៥ចំណុច ឬស្នើ ១៧០ដុល្លារអាមេរិក ក្នុង១ឆ្នាំ សម្រាប់កម្មករម្នាក់ និងសុំឲ្យនិយោជកផ្តល់ប្រាក់អត្ថប្រយោជន៍យ៉ាងតិចចំនួន១៣៥ដុល្លារ ក្នុង១ឆ្នាំសម្រាប់កម្មករម្នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
ការបែកបាក់សាមគ្គីរវាងរ៉ុងឈុន និងជាមុនី បានធ្វើឲ្យមានការខកចិត្តពីសាធារណៈជន រាប់ទាំងអន្តរជាតិផងដែរ។ រវាងអ្នកទាំងពីរនេះ តើអ្នកណាមួយជាអ្នកធ្វើការដើម្បីផលប្រយោជន៏កម្មករពិតប្រាកដ?
Aug 19, 2012 01:55 AM
CheyVorman007
ពី AngKor Watសូមកុំអស់សង្ឃឹម សូមមានជំនឿទៅលើមនុស្សដែលមកពី
ប្រទេសមហាអំណាចសេរី ទោះជាគេជាមនុស្សគរក៏គេគង់
ព្យាយាមគូសវាសជាសញ៉ាប្រាប់គ្នាអោយដឹងអោយយល់ដែរ
កុំរារថយក្នុងការបព្ចោញមតិ តក់ៗពេញបំពង់
Aug 17, 2012 12:30 PM
ពលរដ្ឋ
ពី ភ្នំពេញមានតែ ២០នាក់ទេមកតវ៉ា? លោកឈុន ត្រូវរហូត គ្រាន់តែគេមិនចេញមកជួបក៏គេខុស។ តិចទៀតលោកឈុន ថាព្រះធ្វើខុសទៀត ព្រោះបន់ព្រះអោយជួយ ប៉ុន្តែព្រះអត់ជួយ។
Aug 17, 2012 11:13 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
