លោករដ្ឋមន្រ្តីការពារជាតិប្រទេសកម្ពុជាបានពន្យល់ថា ការដែលគេឃើញមានរូបភាពដែលបានថតចេញមកផ្សាយដែលបង្ហាញថា មានអ្នកកាន់អាវុធប្រើកម្លាំងបង្រ្កាបពលរដ្ឋអ្នកគ្មានអាវុធនោះ គឺជាការអនុវត្តតាមបញ្ជារបស់តុលាការប៉ុណ្ណោះ និងពុំមែនជាជម្រើសរបស់ពួកគេឡើយ។
ក្នុងកិច្ចប្រជុំសួរឆ្លើយដែលលោកបានផ្តល់ដល់ក្រុមអ្នកផ្សាយភាសាខ្មែរនៃវិទ្យុអាស៊ីសេរីនិងវិទ្យុសំឡេងសហរដ្ឋអាមេរិកកាលពីព្រលឹមថ្ងៃអង្គារកន្លងទៅនេះ គឺក្រោយជំនួបរបស់លោកជាមួយរដ្ឋមន្រ្តីការពារជាតិ រ៉ូប៊ើត ហ្កេតស៍ (Robert Gates) និងលោកអនុរដ្ឋមន្រ្តី ជេមស៍ ស្តេនប៊ើក (James Steinburg) នៃក្រសួងការបរទេស ប្រទេសអាមេរិក រួចហើយ។
លោកឧបនាយករដ្ឋមន្រ្តី ទៀ បាញ់ ឆ្លើយតបនឹងសំណួររបស់វិទ្យុអាស៊ីសេរីដូច្នេះ ៖ «កម្លាំងប្រដាប់អាវុធ មិនថាយោធា មិនថាប៉ូលិស ឬក៏កងរាជអាវុធហត្ថទេ គឺយើងចាត់ទុកថាជាឧបករណ៍មួយសម្រាប់អនុវត្តច្បាប់។ ដូច្នេះគឺមានចំណុចខ្លះ មានពេលខ្លះ គឺអនុវត្តទៅតាមដីការបស់តុលាការ ត្រូវអនុវត្តដីកាហ្នឹងឲ្យមានប្រសិទ្ធភាព គឺមិនដឹងជារកកម្លាំងណាក្រៅពីមកពឹងពាក់យកកងកម្លាំងប្រដាប់អាវុធនេះដើម្បីអនុវត្តដីកា។ ម៉្លោះហើយប្រាកដហើយគឺថាមាន ករណីរឿងដីធ្លីអីអ៊ីចឹង តុលាការចេញហើយគឺអ្នកឯងត្រូវតែចេញ ដល់យើងមិនចេញ គឺតុលាការត្រួវតែប្រើឧបករណ៍របស់ខ្លួនគឺកម្លាំងប្រដាប់អាវុធ ទៅដេញឲ្យចេញ»។
សូមរំឭកថា កាលពីថ្ងៃទី១៨ ខែកញ្ញាសប្តាហ៍មុននេះ អ្នកតំណាងរាស្រ្តសហរដ្ឋអាមេរិកចំនួន៨នាក់បានដាក់សំណួរទៅរដ្ឋមន្រ្តីក្រសួងការពារជាតិរបស់ខ្លួនឲ្យឆើ្លយតប ដើម្បីបញ្ជាក់ថា ជំនួយផ្នែកយោធារបស់សហរដ្ឋអាមេរិកទៅកម្ពុជានឹងមិនធ្លាក់ចូលទៅក្នុងដៃនៃក្រុមយោធាខ្មែរដែលបានរំលោភសិទ្ធិមនុស្សនៃពលរដ្ឋខ្មែរទេ។
មេបញ្ជាការយោធាបដិសេធការចោទថាទាហានប្រព្រឹត្តអំពើរំលោភសិទ្ធិមនុស្ស
ស្របពេលជាមួយគ្នានេះ មេបញ្ជាការកងពលលេខ៣១ បដិសេធការទិតៀនរបស់អង្គការសិទ្ធិមនុស្ស Human Rights Watch និងរបស់សមាជិកសភាតំណាងរាស្ត្រអាមេរិក ថា ទាហានរបស់លោកមិនបានប្រព្រឹត្តការរំលោភសិទ្ធិមនុស្សដូចការចោទនោះឡើយ។
កាសែតភ្នំពេញប៉ុស្តិ៍បានស្រង់សម្ដី លោក ស៊ុន សារឿន មេបញ្ជាការកងពលលេខ៣១ ដែលបានមានប្រសាសន៍កាលពីថ្ងៃច័ន្ទថា ទាហានលោកមិនដែលប្រើហិង្សាទៅលើជនស៊ីវិលឡើយ។ លោកថាជាកងទ័ពគឺមិនដែលមើលលើផ្លូវអាក្រក់ចំពោះប្រជាជនក្នុងសហគមន៍ដែលកំពុងរស់នៅនោះទេ។
កាលពីថ្ងៃសុក្រ សមាជិកសភាតំណាងរាស្ត្រសហរដ្ឋអាមេរិក៨រូបបានផ្ញើលិខិតជូនលោក រ៉ូប៊ើត ហ្កេតស៍ (Robert Gates) រដ្ឋមន្ត្រីក្រសួងការពារជាតិអាមេរិក សួរអំពីជំនួយរបស់អាមេរិកទៅដល់អង្គភាពយោធាកម្ពុជាដែលពាក់ព័ន្ធនឹងការចោទប្រកាន់ពីរឿងរំលោភសិទ្ធិមនុស្ស។
ក្នុងលិខិតរបស់សមាជិកសភាអាមេរិកនោះមានចារឈ្មោះកងពល៩១១ កងពល៧០ ដែលជាអង្គភាពអង្គរក្សលោកនាយករដ្ឋមន្ត្រី ហ៊ុន សែន និងកងពល៣១ ថា ពាក់ព័ន្ធនឹងការសង្ស័យថាជាអ្នកប្រព្រឹត្តការរំលោភធ្ងន់ធ្ងរក្នុងរឿងទំនាស់ដីធ្លី៕