ក្រុមគ្រូបង្រៀននៅសាលាបឋមសិក្សាឈើទាល ស្ថិតក្នុងក្រុងដូនកែវ ខេត្តតាកែវ កំពុងរៀបចំឯកសារនៅថ្ងៃអង្គារ ទី១៥ ខែមករា ដើម្បីប្ដឹងនាយកសាលានោះទៅអង្គភាពប្រឆាំងអំពើពុករលួយ។
ការរៀបចំឯកសារនេះ បានធ្វើឡើងដោយសារលោកគ្រូៗទាំងនោះមិនឯកភាពនឹងការសម្របសម្រួលរបស់អាជ្ញាធរក្រុងដូនកែវ និងមន្ទីរអប់រំ កាលពីថ្ងៃច័ន្ទ ទី១៤ ខែមករា។ ពួកគាត់មិនទទួលយកចំណុចពុករលួយនៃប្រាក់ឧបត្ថម្ភបង្រៀនថ្ងៃព្រហស្បតិ៍ ឬហៅថា ប្រាក់ភីប៊ី ដែលនាយកមិនបានបើកឲ្យពួកគាត់ច្រើនឆ្នាំមកនោះ។
លោកគ្រូ កែវ សាវន បង្រៀនថ្នាក់ទី២ក សាលាបឋមសិក្សាឈើទាល ចោទថា នាយកសាលាបានដកប្រាក់ភីប៊ី នោះចំណាយមិនត្រឹមត្រូវ និងមិនបានបើកប្រាក់នោះដល់គ្រូដែលបានបង្រៀនរាល់ថ្ងៃព្រហស្បតិ៍ ច្រើនឆ្នាំមកនោះ។ មិនតែប៉ុណ្ណោះ នាយកសាលាមិនបានគ្រប់គ្រងរដ្ឋបាលសាលាបានត្រឹមត្រូវ ទាំងបណ្ណាល័យ ទាំងពេលវេលាគោរពទង់ជាតិជាដើម៖ «អីចឹង ឥឡូវលោកនាយកថាអ្នកដែលគ្មានតួនាទីបង្រៀន គឺអត់មានលុយទេ ប៉ុន្តែមានលុយប្រជុំបច្ចេកទេស។ អីចឹង ចាប់តាំងពីឆ្នាំ២០១០ មកទល់បច្ចុប្បន្ននេះ អាលុយប្រជុំបច្ចេកទេស គឺយើងមិនដែលបានទទួលទាល់តែសោះ»។
លោកគ្រូ អ៊ី សុន បង្រៀនថ្នាក់ទី១គ ថ្លែងថា ក្រៅពីចំណាយប្រាក់ភីប៊ី មិនត្រឹមត្រូវ សាលានៅខ្វះជួងសម្រាប់វាយប្រាប់គ្រូ និងសិស្ស ថាចេញលេង ឬចេញទៅផ្ទះ៖ «តាំងពីលុយភីប៊ី ទៅ គឺចាយទូទាត់វាមិនចំទិសដៅ ក្នុងការបង្រៀន វាបែងចែកខុសតែប៉ុណ្ណឹង»។
លោកគ្រូ អ៊ុន សុផល បង្រៀនថ្នាក់ទី២ខ ថ្លែងថា នាយកសាលាបានដកប្រាក់ភីប៊ី ម្តង ១០ម៉ឺន ថាកសាងសួនច្បារ តែមិនបានកសាង។ ក្រោយមក ដកយកជាង ៣០ម៉ឺនទៀត ថាចាក់ដីអភិវឌ្ឍទីធ្លាសាលា ប៉ុន្តែមិនឃើញធ្វើសោះ ទើបពួកគាត់សង្ស័យថា អាចមានអំពើពុករលួយ។
លោកគ្រូ អ៊ុន សុផល៖ «បញ្ហាប្រាក់ភីប៊ី ហ្នឹង ដូចលុយចំនួន ១០ម៉ឺន ថាដកទុកភ្ជួរដាំផ្កា លុយ ៣៧ម៉ឺន សម្រាប់ចាក់ដីហ្នឹងក៏រហូតមកដល់បច្ចុប្បន្នហ្នឹង ក៏អត់មានឃើញមានចាក់ដីទេ។ ក៏ប៉ុន្តែ គាត់មានថា ដកលុយនេះទុកសម្រាប់ដំណើរការហ្នឹង ប៉ុន្តែគាត់អត់បានធ្វើអីទេ អត់ឃើញសកម្មភាពដែលថាធ្វើអីហ្នឹង អត់ឃើញទេ។ ហើយមួយទៀត បញ្ហាបណ្ណាល័យ ចង់ឲ្យបណ្ណាល័យហ្នឹងបើកទ្វារ ហើយមានសិស្សចូលអាន បែងចែកតាមថ្នាក់ៗណាត្រូវចូលអានម៉ោងប៉ុន្មានៗ ដើម្បីឲ្យមានសកម្មភាពបណ្ណាល័យដែរ»។
ពាក់ព័ន្ធទៅលើការចោទពីសំណាក់គ្រូៗ លោក ខឹម សារិន នាយកសាលាបឋមសិក្សាឈើទាល ថ្លែងថា ថវិកាសម្រាប់អភិវឌ្ឍន៍សាលា គឺនៅទាំងអស់ ប៉ុន្តែលោកមិនទាន់បានកសាងនៅឡើយ តាំងពីដើមឆ្នាំសិក្សា២០១២ ឆ្នាំ២០១៣ ព្រោះថវិកានោះដកយកបានតិចតួច មិនទាន់គ្រប់ចំនួនដែលអាចយកទៅអភិវឌ្ឍន៍បាន៖ «ប៉ុន្តែលុយនៅក្នុងជុំឆ្នាំ២០១១ ឆ្នាំ២០១២ ប៉ុន្តែលុយហ្នឹងលុយភីប៊ី មិនមែនមកទាន់ឆ្នាំទេ ព្រោះថាលុយវាត្រូវឆ្នាំសិក្សាមុននោះចាយ ប៉ុន្តែដល់ពេលមកជុំទី៤ អត់ទាន់អីចឹង ទាល់តែដើមឆ្នាំបានគេទម្លាក់លុយហ្នឹងមកដល់។ អីចឹង រយៈពេលនោះតាំងពីដើមឆ្នាំមក»។
មន្ត្រីអប់រំក្រុងដូនកែវ ខេត្តតាកែវ លោក សោម ស៊ីចន មិនធ្វើអត្ថាធិប្បាយចំពោះរឿងចោទប្រកាន់នេះទេ នៅថ្ងៃអង្គារ ទី១៥ ខែមករា។
តំណាងស៊ើបអង្កេតសម្របសម្រួលនៅប្រទេសកម្ពុជា នៃបណ្ដាញរួបរួមដើម្បីគណនេយ្យភាពសង្គមអាស៊ីបូព៌ា និងប៉ាស៊ីហ្វិក លោក សន ជ័យ ថ្លែងថា បើក្រុមគ្រូបង្រៀនយល់ថាទង្វើរបស់លោកនាយកសាលាជាអំពើពុករលួយ គួរដាក់ពាក្យប្ដឹងទៅអង្គភាពប្រឆាំងអំពើពុករលួយ។ អង្គការនេះនឹងជំរុញអង្គភាពនោះឲ្យអនុវត្តបណ្ដឹងនេះឲ្យមានប្រសិទ្ធភាព ដើម្បីបន្ថយអំពើពុករលួយក្នុងវិស័យអប់រំ នៅក្នុងសាលារៀន៖ «អង្គភាពប្រឆាំងអំពើពុករលួយ គេនឹងបើកការស៊ើបអង្កេត ហើយបើសិនជាមានពាក្យបណ្ដឹង។ នេះជាវិធីសាស្ត្រមួយនៅក្នុងការចូលរួមទៅក្នុងប្រយុទ្ធប្រឆាំងអំពើពុករលួយ»។
ក្រុមគ្រូបង្រៀនកំពុងតែរៀបចំឯកសារ ដើម្បីដាក់ជូនទៅអង្គភាពប្រឆាំងអំពើពុករលួយ ដើម្បីពិនិត្យបញ្ហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។