បុគ្គលិកសិក្សានៅកំពតប្រតិកម្មជុំវិញការជ្រើសរើសបុគ្គលិកការិយាល័យបោះឆ្នោត

ដោយ អ៊ួន ឈិន

2008-07-23

បុគ្គលិកសិក្សានៅក្នុងស្រុកពីរនៃខេត្តកំពត បានបញ្ចេញប្រតិកម្មដោយចោទថាមានអំពើពុករលួយក្នុងការជ្រើសរើសបុគ្គលិកគណៈកម្មការការិយាល័យរៀបចំការបោះឆ្នោត ។

លោកគ្រូ អ្នកគ្រូ នៅស្រុកឈូកនិងស្រុកដងទង់ ខេត្តកំពត បានអះអាងកាលពីព្រឹកថ្ងៃទី២២ ខែកក្កដាកន្លងទៅនេះ ថាមានអំពើពុករលួយនិងការរើសអើងក្នុងការជ្រើសរើសបុគ្គលិកសម្រាប់គណៈកម្មការការិយាល័យរៀបចំការបោះឆ្នោត ដែលអំពើទាំងនោះរួមមានការសូកប៉ាន់ជាទឹកប្រាក់ពី២ម៉ឺនរៀលទៅ៣ម៉ឺនរៀលនិងការនិយមបក្សពួកជាដើម ។

គ្រូបង្រៀននៅសាលាបឋមសិក្សាដូនយ៉យក្នុងស្រុកឈូក អ្នកស្រី ង៉ែត ថាច បានសម្ដែងនូវការខកចិត្តចំពោះភាពមិនប្រក្រតីក្នុងការជ្រើសរើសបុគ្គលិកសម្រាប់គណៈកម្មការការិយាល័យរៀបចំការបោះឆ្នោត ។

អ្នកស្រី ង៉ែត ថាច បានឲ្យដឹងថា ៖ «នឹកឃើញសុំគេបាន គេយក២ម៉ឺន ឲ្យខ្ញុំ៦ ខ្ញុំថាអ៊ីចឹងក៏ខ្ញុំយកដែរខ្ញុំវាក្រជាងគេ ។ គ្រូមួយសាលាហ្នឹងគេជិះសុទ្ធតែ ០៨ ទាំងអស់ ជិះកង់តែខ្ញុំម្នាក់ឯងទេ ។ ដល់ហើយគេឲ្យតែគ្នាគេអា០៨ហ្នឹងទាំងអស់ ហើយប្រពន្ធកូនគេទាំងអស់ ហើយអាអ្នកអត់ប្រឡងក៏ជាប់ដែរ» ។

គ្រូបង្រៀននៅសាលាបឋមសិក្សាមគ្គិរីសាលវន្តក្នុងស្រុកដងទង់ អ្នកស្រី ភឹម សុភា ក៏បានអះអាងពីការសូកប៉ាន់ក្នុងការជ្រើសរើសបុគ្គលិកគណៈកម្មការការិយាល័យរៀបចំការបោះឆ្នោតដែរ ។

អ្នកស្រី ភឹម សុភា បានមានប្រសាសន៍ថា ៖ «ចាប់ត្រឹមពី២ម៉ឺនទៅ៣ម៉ឺនបានជាប់ បើយើងអត់ឲ្យលុយគេអត់ជាប់ ដូចជារូបខ្ញុំជាដើម» ។

ចំណែកគ្រូបង្រៀននៅវិទ្យាល័យអង្គរមាសក្នុងស្រុកដងទង់ដែរ គឺលោក នុត សុភាព បានធ្វើការរិះគន់នូវដំណើរនៃការជ្រើសរើសផងដែរ ។

លោក នុត សុភាព បានបញ្ជាក់ថា ៖ «ខ្ញុំបានទៅសុំពាក្យដើម្បីសរសេរដាក់ធ្វើជាមន្ត្រីការិយាល័យបោះឆ្នោត ។ ពេលដែលខ្ញុំសរសេរហើយយកទៅដាក់ហ្នឹង គឺមន្ត្រី CEC (គណៈកម្មការឃុំសង្កាត់រៀបចំការបោះឆ្នោត) ហ្នឹង គេបាននិយាយថាសុំភ្ជាប់លុយទៅម្នាក់២ម៉ឺន ។ ហើយគាត់សួរត្រឡប់មកវិញថាតើលោកគ្រូចង់ធ្វើអ៊ីចឹងឬក៏ចង់តាមដំណើរ តាមព្រេងសំណាង ? ពួកខ្ញុំឆ្លើយថាឥឡូវតាមដំណើរហ្នឹងទៅ ។ អ៊ីចឹងពេលដែលលទ្ធផលចេញមកកូនសិស្សរបស់ខ្ញុំជាប់ តែខ្ញុំ៣នាក់គ្រូហ្នឹងដែលជាអ្នកអត់ដាក់លុយទាំង៣ធ្លាក់ ។ ហើយខ្ញុំជាគ្រួម្នាក់មកពីឆ្ងាយ មកពីខេត្តកណ្ដាល មកបង្រៀនកូនសិស្សនៅទីនេះ ប៉ុន្តែគេអត់មានឲ្យតម្លៃដល់គ្រូទាល់តែសោះ អ៊ីចឹងគេគិតថាលុយ២ម៉ឺនសំខាន់ជាង ។ ខ្ញុំក៏មានអារម្មណ៍សោកស្ដាយ អន់ចិត្ត ហើយអស់កម្លាំងនឹងធ្វើការបន្តទៀត» ។

ប្រធានគណៈកម្មការរៀបចំការបោះឆ្នោតឃុំដូនយ៉យ លោក សូ សីហា បានមានប្រសាសន៍ថាការជ្រើសរើសត្រូវបានធ្វើឡើងតាមនីតិវិធី ។

លោក សូ សីហា បានមានប្រសាសន៍ថា ៖ «ធម្មតាពេលដែលគាត់គ្មានបានលទ្ធផលអីគាត់ចេះតែដើរនិយាយទៅ មានបុគ្គលិកខាងដាក់ពាក្យហ្នឹងមកធ្វើតេស្តហ្នឹង គឺយឺតពេលវេលាមែន គឺប្រហែលជា២០នាទី ប៉ុន្តែកាលបរិច្ឆេទរបស់ពួកខ្ញុំហ្នឹងគឺកំណត់មួយម៉ោង» ។

ផ្អែកតាមប្រសាសន៍របស់អ្នកសម្របសម្រួលនៃគណៈកម្មាធិការ ខុមហ្វ្រែល ប្រចាំខេត្តកំពត និង ក្រុងកែប អ្នកស្រី ទ្រី ឈូន និងយោងតាមរបាយការណ៍របស់អ្នកសង្កេតការណ៍នៃគណៈកម្មាធិការ ខុមហ្វ្រែល បានឲ្យដឹងថាករណីសូកប៉ាន់ក្នុងការជ្រើសរើសបុគ្គលិកបោះឆ្នោតបានកើតមានស្ទើរតែគ្រប់ទីកន្លែងទូទាំងខេត្តកំពត ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព