ការទាមទារឲ្យរដ្ឋាភិបាលដំឡើងប្រាក់បៀវត្សរ៍ដល់គ្រូបង្រៀននេះគឺបានធ្វើឡើងក្នុងទិវាគ្រូបង្រៀនពិភពលោក ៥ តុលា ដែលក្នុងឱកាសនោះ មានសមាជិករបស់សមាគមគ្រូបង្រៀនកម្ពុជាឯករាជ្យ ប្រមាណ៥០នាក់មកពីក្រុងភ្នំពេញនិងខេត្តកណ្ដាលបាននាំគ្នាជួបជុំគ្នានៅទីក្រុងភ្នំពេញ។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានឲ្យដឹងថា សព្វថ្ងៃប្រាក់ខែមធ្យមរបស់គ្រូបង្រៀននៅក្នុងប្រទេសកម្ពុជា គឺប្រមាណជា១៨ម៉ឺនរៀល ឬជិត៥០ដុល្លារសហរដ្ឋអាមេរិក ហើយទាមទារឲ្យរដ្ឋាភិបាលដំឡើងប្រាក់ខែដល់គ្រូបង្រៀនឲ្យបាន១លានរៀលប្រមាណជា២៥០ដុល្លារសម្រាប់គ្រូបង្រៀនម្នាក់។
លោក រ៉ុង ឈុន បានលើកឡើងថា គ្រូបង្រៀនសព្វថ្ងៃកំពុងជួបបញ្ហាជីវភាពប្រចាំថ្ងៃព្រោះប្រាក់ខែរបស់ពួកគាត់មិនគ្រប់គ្រាន់សម្រាប់ការចំណាយដើម្បីទ្រទ្រង់ជីវភាពឡើយ។
លោក រ៉ុង ឈុន បានមានប្រសាសន៍ថា ៖ «ការអបអរសាទរទិវាគ្រូបង្រៀនពិភពលោកនេះ យើងធ្វើដើម្បីជាការក្រើនរំឭកដាស់តឿន និងការទាមទារឲ្យរដ្ឋាភិបាលធ្វើការដោះស្រាយទៅនឹងកម្រិតស្ថានភាពគ្រូបង្រៀននៅកម្ពុជា ក៏ដូចជាវិស័យសិក្សាធិការជាតិរបស់យើងដែរ។ ហើយដែលយើងមើលឃើញដែលធ្ងន់ធ្ងរបំផុតសម្រាប់គ្រូបង្រៀននៅកម្ពុជា គឺកម្រិតជីវភាពរបស់ពួកគាត់»។
សមាជិកជាន់ខ្ពស់របស់គណបក្សប្រជាជនកម្ពុជាដែលកំពុងកាន់អំណាច គឺលោក ជៀម យៀប ដែលជាប្រធានគណៈកម្មការសេដ្ឋកិច្ចហិរញ្ញវត្ថុ ធនាគារ និងសវនកម្ម របស់រដ្ឋសភា បានមានប្រសាសន៍ថា រដ្ឋាភិបាលកម្ពុជាបានតំឡើងប្រាក់បៀវត្សរ៍ដល់គ្រូបង្រៀនជាបន្តបន្ទាប់យ៉ាងតិចបំផុត២០%ក្នុងមួយឆ្នាំ។
លោក ជៀម យៀប បានមានប្រសាសន៍ថា ៖ «ឥឡូវនេះយើងមានសុទិដ្ឋិនិយមថា ក្រសួងសេដ្ឋកិច្ចនិងហិរញ្ញវត្ថុដែលតំណាងរាជរដ្ឋាភិបាលក្នុងការប្រមូលនូវសក្ដានុពល នូវប្រភពចំណូល បំពេញការចំណាយជាតិហ្នឹងអាចប្រមូលបានកាន់តែច្រើនឡើង កាន់តែហួសផែនការដែលរដ្ឋបានកំណត់ យ៉ាងហោចសម្ដេចលោកសន្យាថា បើសិនជាបានលើសផែនការកំណត់ច្រើន លោកនឹងបន្ថែមលើសពី២០%ហ្នឹងតទៅទៀតជូនដល់មន្រ្តីរាជការរបស់យើង ពិសេសគឺថាបុគ្គលិកសិក្សា»។
ទោះជាយ៉ាងណា លោក រ៉ុង ឈុន បានមានប្រសាសន៍ថា ការតំឡើងប្រាក់បៀវត្សរ៍ដែលដំឡើងដោយរដ្ឋាភិបាលនោះមិនសមមាត្រទៅនឹងតម្លៃទំនិញទីផ្សារនាពេលបច្ចុប្បន្នឡើយ។
ក្រៅពីទាមទារឲ្យរដ្ឋាភិបាលដំឡើងប្រាក់បៀវត្សរ៍ហើយនោះសមាគមគ្រូបង្រៀនកម្ពុជាឯករាជ្យក៏បានសុំឲ្យរដ្ឋាភិបាលបញ្ចុះតម្លៃទំនិញលើទីផ្សារ ជាពិសេសតម្លៃប្រេងឥន្ធនៈឲ្យមកនៅត្រឹម៤០០០រៀលក្នុងមួយលីត្រ។
លោកនាយករដ្ឋមន្ត្រី ហ៊ុន សែន ធ្លាប់បានប្រកាសជាញឹកញាប់កាលពីពេលថ្មីៗនេះឲ្យមានការបញ្ចុះតម្លៃប្រេងឥន្ធនៈនៅលើទីផ្សារកម្ពុជា បន្ទាប់ពីមើលឃើញថាតម្លៃប្រេងនៅលើទីផ្សារអន្តរជាតិក៏បានធ្លាក់ចុះជាបន្តបន្ទាប់ហើយនោះ៕