គ្រូបង្រៀនម្នាក់ដែលសុំមិនបញ្ចេញឈ្មោះ តំណាងឲ្យគ្រូបង្រៀននៅស្រុកបន្ទាយមាស បានថ្លែងនៅថ្ងៃចន្ទ ទី១ ខែធ្នូនេះ ថា លោកគ្រូអ្នកគ្រូកំពុងតែប្រឈមនឹងការលំបាកក្នុងការរស់នៅ ព្រោះតែប្រាក់ខែមិនត្រូវបានបើកជូនពួកគាត់ឲ្យបានទៀងទាត់តាមពេលកំណត់ ៖ «រាល់ថ្ងៃធ្វើការ សង្ឃឹមលើប្រាក់ខែ ហើយដល់ប្រាក់ខែបើអត់ទាន់ ខ្វះក្នុងការហូបចុកអី ដូចជា ខ្វះថវិកាសម្រាប់ទិញអង្ករហូបអីហ្នឹង ដោយបុគ្គលិកខ្លះគាត់គ្មានថវិកា គាត់ឡើងទៅលើភ្នំយកអុសមកលក់ដើម្បីយកលុយមកទិញអង្ករហូប»។
ឆ្លើយតបទៅនឹងការការត្អូញត្អែរនេះ ប្រធានមន្ទីរអប់រំ យុវជន និងកីឡា ខេត្តកំពត លោក ភូ តៃកុក បានមានប្រសាសន៍ថា ភាពយឺតយ៉ាវក្នុងការបើកប្រាក់បៀវត្សរ៍ជូនបុគ្គលិកសិក្សា បានកើតឡើងដោយសារការដំឡើងប្រាក់បៀវត្សរ៍និងការផ្ដល់ជូននូវប្រាក់ឧបត្ថម្ភចំនួនពីរម៉ឺនរៀលសម្រាប់គ្រូបង្រៀនម្នាក់ៗ ដែលរដ្ឋាភិបាលបានប្រកាសផ្ដល់ជូនចាប់ពីខែកក្កដា ឆ្នាំ២០០៨ ហើយដែលបណ្ដាលឲ្យមានកង្វះសាច់ប្រាក់សម្រាប់បើកបៀវត្សរ៍ជូនបុគ្គលិកសិក្សាឲ្យបានទាន់ពេលវេលា។
លោក ភូ តៃកុក បានមានប្រសាសន៍អះអាងថា លោកគ្រូអ្នកគ្រូនឹងទទួលបានប្រាក់ខែរបស់ពួកគាត់ក្នុងពេលឆាប់ៗនេះ ព្រោះក្រសួងសេដ្ឋកិច្ចនិងហិរញ្ញវត្ថុបានចេញប្រកាសដំឡើងថវិការួចហើយ ហើយលោកក៏បានជម្រាបរឿងនេះជូនដល់លោកគ្រូអ្នកគ្រូហើយដែរ។
លោក ភូ តៃកុក មានប្រសាសន៍ដូច្នេះថា ៖ «យើងយឺតយ៉ាងហ្នឹង មូលហេតុរង់ចាំប្រកាសបន្ថែមថវិកាពីក្រសួងសេដ្ឋកិច្ចហិរញ្ញវត្ថុ។ មានម្នាក់ ២នាក់ដែលមានគំនិតចាំតែជំទាស់ហ្នឹង ធ្វើមិនដឹងមិនឮ ខ្ញុំមិនដឹងទេ ប៉ុន្តែទូទាំងខេត្តគេដឹង»។
ជុំវិញការយឺតយ៉ាវក្នុងការបើកប្រាក់បៀវត្សរ៍ជូនគ្រូបង្រៀន ប្រធានសមាគមគ្រូបង្រៀនកម្ពុជាឯករាជ លោក រ៉ុង ឈុន បានដាក់ការសង្ស័យទៅលើកង្វះតម្លាភាពក្នុងការគ្រប់គ្រងថវិកាពីសំណាក់ស្ថាប័នដែលពាក់ព័ន្ធ។
ទាក់ទិននឹងប្រាក់ឧបត្ថម្ភចំនួនពីរម៉ឺនរៀល លោក រ៉ុង ឈុន បានមានប្រសាសន៍យ៉ាងដូច្នេះ ៖ «ប្រាក់ ២ម៉ឺន នៅមុនថ្ងៃបោះឆ្នោតឈានមកដល់ ប្រមុខរាជរដ្ឋាភិបាលកម្ពុជា លោកបានប្រកាសថា នឹងផ្ដល់ប្រាក់ឧបត្ថម្ភពីរម៉ឺន ចាប់គិតពីខែ ៧ រហូតដល់ដំណាច់ឆ្នាំ២០០៨។ ប៉ុន្តែលុយហ្នឹង យើងឃើញថា មានខេត្តកំពង់ធំ ខេត្តកណ្ដាល បានផ្ដល់ ៤ខែហើយ នៅពីរខែទៀត ប៉ុន្តែខេត្តផ្សេងៗទៀត រួមទាំងខេត្តកំពតហ្នឹង ឃើញថា លោកគ្រូ អ្នកគ្រូមិនទាន់ទទួលបានទេ»។
ដើម្បីជាការជួយលើកទឹកចិត្តដល់គ្រូបង្រៀននិងជួយពួកគាត់ក្នុងការកាត់បន្ថយការលំបាកផ្នែកជីវភាព ជាពិសេសដើម្បីជួយលើកស្ទួយវិស័យអប់រំ លោក រ៉ុង ឈុន បានអំពាវនាវសូមឲ្យមានការយកចិត្តទុកដាក់ក្នុងការបើកប្រាក់បៀវត្សរ៍ជូនដល់លោកគ្រូ អ្នកគ្រូ ឲ្យបានទៀងទាត់ ដោយជៀសវាងឲ្យបាននូវការអូសបន្លាយពេលវេលា៕