លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានមានប្រសាសន៍ថា នៅពេលការប្រជុំបានចាប់ផ្តើមកាលពីព្រឹកថ្ងៃទី១៥ កញ្ញា ស្រាប់តែមានមន្ត្រីសាលាឃុំបានមកកោះហៅតំណាងសមាគមទៅសាលាឃុំនិងបានហាមមិនឲ្យដំណើរការការប្រជុំ ដោយបានលើកហេតុផលថា ការប្រជុំនោះមិនមានច្បាប់អនុញ្ញាតត្រឹមត្រូវ ប៉ុន្តែតាមលោក រ៉ុង ឈុន បានឲ្យដឹងថា លោកបានជូនព័ត៌មានតាមការកំណត់របស់ច្បាប់ហើយ។
លោក រ៉ុង ឈុន មានប្រសាសន៍ថា ៖ «ព្រឹកមិញហ្នឹង ខាងអាជ្ញាធរគេសុំឲ្យខ្ញុំឈប់សម្រាកនូវកិច្ចជួបប្រជុំនៅឃុំវល្លិស ស្រុកសំរោងទង ខេត្តកំពង់ស្ពឺ ដែលខ្ញុំរៀបចំសិក្ខាសាលាស្ដីអំពីសិទ្ធិនិងករណីកិច្ចគ្រូបង្រៀនហ្នឹង។ គេបញ្ជាក់អំពីថាយើងអត់បានសុំច្បាប់។ តាមផ្លូវច្បាប់ យើងមិនចាំបាច់សុំច្បាប់ទេ គ្រាន់តែជូនដំណឹងមានន័យថា ចប់សព្វគ្រប់ហើយ។ មុនដំបូងខាងសាលាឃុំ គេហៅឲ្យខ្ញុំទៅជួបនៅសាលាឃុំ ប៉ុន្តែខ្ញុំអត់បានទៅជួបទេ ខ្ញុំឲ្យតំណាងខ្ញុំទៅជួប បន្ទាប់មកខាងតំណាងខ្ញុំបានរាយការណ៍ថា បើសិនជានៅតែប្រព្រឹត្តប្រជុំ គេនឹងប្រើកម្លាំងមកបង្រ្កាប។ ដល់អ៊ីចឹងខ្ញុំក៏បានជម្រាបជូនទៅវិញថា ខ្ញុំនៅតែប្រជុំ។ មួយស្របក់ក្រោយមក មានតំណាងអាជ្ញាធរស្រុកមកមួយទៀត ជួបជាមួយខ្ញុំ ហើយគេសុំឲ្យខ្ញុំ បញ្ឈប់នូវកិច្ចប្រជុំ ហើយបើមិនឈប់ទេ គេនឹងយកកម្លាំងមកបង្រ្កាប»។
លោក ជុំ ទ្រួក អភិបាលស្រុកសំរោងទងបានមានប្រសាសន៍ឲ្យដឹងថា អាជ្ញាធរមានការរារាំងដោយសារការប្រជុំនោះមិនមានច្បាប់អនុញ្ញាត តែក្រោយមក ដោយមានការសម្រួល ការប្រជុំនោះបានដំណើរការជាធម្មតា។
លោក ជុំ ទ្រូក មានប្រសាសន៍ថា ៖ «អត់មានអីផង ប្រជុំធម្មតា។ តែគ្រាន់អ៊ីចេះ ខាងសាលាខេត្តហ្នឹង គេសុំឲ្យសមាគមសុំច្បាប់ អត់សុំច្បាប់គេផងហ្នឹង។ មានច្បាប់ឯណា គាត់គ្រាន់តែជូនដំណឹងមកស្រុក ស្រុកឃើញមានលិខិតមួយជូនដំណឹងមក ខ្ញុំថា ឥឡូវសុំច្បាប់គេទៅ សុំច្បាប់ខេត្តទៅ។ ដល់ព្រឹកមិញហ្នឹង អត់មានច្បាប់ផង ខាងខេត្តនោះក៏មានប្រតិកម្មមកដែរ»។
តាមលោក រ៉ុង ឈុន បានឲ្យដឹងថា ការជួបប្រជុំគ្នានៅឃុំវល្លិស ស្រុកសំរោងទង ខែត្រកំពង់ស្ពឺ របស់គ្រូបង្រៀនជាសមាជិករបស់សមាគមគ្រូបង្រៀនកម្ពុជាឯករាជ្យនេះ គឺដើម្បីអប់រំសមាជិកអំពីសិទ្ធិនិងករណីយកិច្ចរបស់គ្រូបង្រៀនក្នុងការបង្រៀនសិស្សនិងកាតព្វកិច្ចរបស់សមាជិកសមាគម ដោយមានគ្រូបង្រៀនជាសមាជិកចូលរួមប្រជុំចំនួន៤៦រូប។
តាមរដ្ឋធម្មនុញ្ញប្រទេសកម្ពុជា មាត្រាទី៤១ បានចែងថា ប្រជាពលរដ្ឋខ្មែរមានសេរីភាពក្នុងការបញ្ចេញមតិរបស់ខ្លួន សេរីភាពខាងសារព័ត៌មានសេរីភាពខាងបោះពុម្ពផ្សាយសេរីភាពខាងការប្រជុំ។ ជនណាក៏ដោយមិនអាចឆ្លៀតប្រើសិទ្ធិនេះដោយរំលោភ នាំឲ្យប៉ះពាល់ដល់កិត្តិយសរបស់អ្នកដទៃ ដល់ទំនៀមទម្លាប់ល្អរបស់សង្គម ដល់សណ្តាប់ធ្នាប់សាធារណៈនិងសន្តិសុខជាតិបានឡើយ៕