ការតវ៉ានេះបានធ្វើឡើង បន្ទាប់ពីការសិក្សាបានបញ្ចប់និងចប់ការបង្រៀន ហើយខាងគណនេយ្យការិយាល័យភូមិភាគខេត្តតាកែវ គ្មានបា្រក់បើកឲ្យគ្រូនិងសិស្សគ្រប់ចំនួន។
គុរសិស្សមកពីខេត្តកំពត សុំមិនប្រាប់ឈ្មោះ អះអាងថា គណនេយ្យការិយាល័យគរុកោសល្យភូមិភាគខេត្តតាកែវ មិនចង់បើកប្រាក់ឧបត្ថម្ភការសិក្សាគ្រប់ចំនួន ឲ្យទៅគរុសិស្សចប់ការសិក្សារយៈពេល ១ខែកន្លះនោះទេ។
លោកថា វគ្គសិក្សាបំប៉នផ្នែកគរុកោសល្យបន្ថែម ចាប់ផ្តើមពីថ្ងៃ១ ខែសីហា មកដល់ថ្ងៃច័ន្ទ ទី១៥ ខែកញ្ញា។ លោកបន្តថា ប្រាក់ឧបត្ថម្ភសិក្សាក្នុង១អាទិត្យគិតពីថ្ងៃច័ន្ទ ដល់ថ្ងៃសៅរ៍ ១ថ្ងៃ ២ដុល្លារ បានបើកគ្រប់ចំនួនក្នុងខែសីហា។ ប៉ុន្តែក្នុងខែកញ្ញា ប្រាក់២សប្តាហ៍ចុងក្រោយ គណនេយ្យមិនចង់បើកឲ្យគ្រប់ចំនួន២៤ដុល្លារទេ។ ចង់បើកឲ្យតែ ២២ដុល្លា កាត់យក១ថ្ងៃចេញ ទើបមានការតវ៉ា ៖ «លុយអត់បើកឲ្យរហូតដល់ថ្ងៃនេះហើយ»។
គ្រូគរុកោសល្យមកពីក្រុងព្រះសីហនុ សុំមិនប្រាប់ឈ្មោះ មានប្រសាសន៍ថា គាត់មកបង្រៀនត្រូវជួលផ្ទះនិងទិញអាហារហូបរាល់ថ្ងៃ។ ការិយាល័យគរុកោសល្យភូមិភាគខេត្តតាកែវ គួរតែបើកបា្រក់ម៉ោង ឲ្យគ្រប់ចំនួនដល់គ្រូ។ បើកាត់ប្រាក់ម៉ោង ២ដុល្លារ គួរតែពន្យល់ហេតុផល ៖ «ខ្ញុំបញ្ចប់នៅម្សិលមិញហ្នឹង ហើយលុយគេអត់ទាន់បើកឲ្យទេ។ អ៊ីចឹងហើយគឺខ្ញុំត្រូវតែចំណាយនៅលើការស្នាក់នៅហ្នឹងទៀត ហើយណាមួយពួកខ្ញុំមកពីខេត្តឆ្ងាយ ខ្ញុំត្រូវការញ៉ាំបាយខែគេអ៊ីចឹង ឥឡូវគេផ្ដាច់ហើយ ហើយផ្ទះត្រូវជួលហ្នឹង ក៏គេលែងឲ្យនៅដែរ អ៊ីចឹងយើងមានបញ្ហាខ្លាំងដល់ពួកខ្ញុំ ដែលមកពីខេត្តឆ្ងាយៗ»។
វិទ្យុអាស៊ីសេរីមិនអាចទាក់ទងលោក កង សេរី គណនេយ្យគរុកោសល្យភូមិភាគតាកែវ បានភ្លាមៗទេ ប៉ុន្តែមន្រ្តីគរុកោសល្យភូមិភាគតាកែវ សុំមិនប្រាប់ឈ្មោះ អះអាងថា ក្រោយមានការចរចាច្រើនដង គណនេយ្យគរុកោសល្យភូមិភាគ លោក កង សេរី កំពុងរៀបចំបើកប្រាក់គ្រប់ចំនួន តាមការទាមទារហើយ។
ប្រភពចុងក្រោយពីខាងគរុសិស្សឲ្យដឹងថា ក្រោយការចរចាច្រើនដង នៅរសៀលថ្ងៃអង្គារ ទី១៦ ខែកញ្ញា មន្រ្តីគណនេយ្យការិយាល័យគរុកោសល្យភូមិភាគខេត្តតាកែវ យល់ព្រមបើកប្រាក់គ្រប់ចំនួន ២៤ដុល្លារសហរដ្ឋអាមេរិក ជូនគរុសិស្សទាំងជិត៥០០នាក់ ចំណែកខាងគ្រូនៅជំពាក់សិន។
សូមជម្រាបថា គរុសិស្សនិងគ្រូ ដែលមកបង្រៀននិងសិក្សាបំប៉នផ្នែកគរុកោសល្យ មាន៤ខេត្តក្រុង មានខេត្តតាកែវ ខេត្តកំពត ក្រុងកែប និងក្រុងព្រះសីហនុ ជាង ៥០០នាក់៕