គ្រូបង្រៀនតាមខេត្តចំនួន៧ មិនទាន់បានបើកប្រាក់បៀវត្សខែមករា
ដោយ ដែន អយុធ្យា
2012-02-22
គ្រូបង្រៀនភាគច្រើនបានរអ៊ូរទាំថា ប្រាក់បៀវត្សខែមករា ឆ្នាំ២០១២ ក្រសួងអប់រំមិនទាន់បើកជូនទេ។ ភាពយឺតយ៉ាវនេះ ក្រុមគ្រូបង្រៀនបានអះអាងថា ពួកគាត់គ្មានកម្លាំងចិត្តបង្រៀនសិស្សទៀតទេ និងបានស្នើឲ្យរដ្ឋមន្ត្រីក្រសួងអប់រំ ពិសេសប្រមុខដឹកនាំរដ្ឋាភិបាលជួយចាត់វិធានការ។
៥-តុលា-២០១១៖ ក្រុមគ្រូបង្រៀនជួបប្រជុំគ្នាក្នុងទិវាគ្រូបង្រៀនពិភពលោក នាសួនសេរីភាព រាជធានីភ្នំពេញ។
ក្រុមគ្រូបង្រៀនមកពីតាមខេត្តក្រុងចំនួន៧ ក្នុងប្រទេសកម្ពុជា បានត្អូញត្អែរថា សព្វថ្ងៃនេះពួកគាត់ គ្មានប្រាក់សំរាប់ចំណាយទៅលើអាហារហូបចុកប្រចាំថ្ងៃ ឬផ្ដល់ឲ្យកូនៗទៅសាលារៀនទេ ព្រោះប្រាក់បៀវត្សខែមករា ក្រសួងអប់រំមិនទាន់បើកជូន។
លោក រ៉ុង ឈុន ជាប្រធានសមាគមគ្រូបង្រៀនកម្ពុជាឯករាជ្យ។ លោកបានឲ្យដឹងថា កាលពីថ្ងៃទី២១ ខែកុម្ភៈ លោកបានផ្ញើលិខិតមួយច្បាប់ជូនលោក អ៊ឹម សិទ្ធី រដ្ឋមន្ត្រីក្រសួងអប់រំឲ្យជួយពន្លឿនបើកប្រាក់បៀវត្សខែមករា ជូនគ្រូបង្រៀនឲ្យបានឆាប់។
លោកថ្លែងថា ការបើកប្រាក់បៀវត្សជូនគ្រូបង្រៀនមិនបានទៀងទាត់ គឺនាំឲ្យប៉ះពាល់ដល់ជីវភាពរស់នៅរបស់គ្រូបង្រៀន ប៉ះពាល់គុណភាពអប់រំ និងប៉ះពាល់ដល់ការសិក្សារបស់សិស្ស។
លោក រ៉ុង ឈុន ឲ្យដឹងបន្ថែម៖ «ធ្វើឲ្យលោកគ្រូអ្នកគ្រូគាត់មានការប្រឈមទៅនឹងជីវភាពរស់នៅរបស់ពួកគាត់ ពីព្រោះបៀវត្សតិចហើយ បើកមិនទាន់ពេលវេលា ប៉ះពាល់ទាំងការងារ ការបង្រៀន និងការរៀនរបស់សិស្សានុសិស្សផងដែរ»។
សមាគមគ្រូបង្រៀនបានឲ្យដឹងថា ចំនួនគ្រូបង្រៀននៅទូទាំងប្រទេសសរុបមានជាង ១០ម៉ឺន ៤ពាន់នាក់។ ចំនួនប្រាក់ខែទទួលបានជាមធ្យមមានចន្លោះពី ២០ម៉ឺនរៀល ទៅដល់ ៤០ម៉ឺនរៀល ក្នុង ១ខែ។
សមាគមគ្រូបានឲ្យដឹងថា ខេត្តក្រុងដែលគ្រូបង្រៀនមិនទាន់ទទួលបានប្រាក់បៀវត្សខែមករា មានខេត្តស្ទឹងត្រែង ក្រចេះ ព្រះវិហារ កំពង់ធំ កំពង់ចាម ព្រៃវែង និងខេត្តសៀមរាប ជាដើម។
លោក គង់ ឌី ជាគ្រូបង្រៀននៅសាលាបឋមសិក្សាស្វាយ ស្រុកព្រះស្តេច ខេត្តព្រៃវែង។ លោកបានឲ្យដឹងថា គ្រូបង្រៀននៅទូទាំងខេត្តព្រៃវែង មិនទាន់ទទួលបានប្រាក់បៀវត្សខែមករា ពិតមែន។
គ្រូបង្រៀនរូបនេះបានស្នើឲ្យប្រមុខដឹកនាំរដ្ឋាភិបាល និងថ្នាក់ក្រសួងអប់រំ ត្រូវមានវិធានការជាថ្មី ដើម្បីជំរុញឲ្យប្រាក់ខែគ្រូបង្រៀនបើកឲ្យបានទាន់ពេលវេលា៖ «សូមឲ្យថ្នាក់ដឹកនាំអាណិតអាសូរដល់គ្រូបង្រៀនដែលមានប្រាក់ខែតិចតួច និងគ្មានចំណូលទេ។ បើមានចំណូល គឺទាល់តែដើររើសអេតចាយ និងរត់ម៉ូតូឌុប ដើម្បីជីវភាព នាំឲ្យមន្ត្រីរាជការអស់តម្លៃ បើប្រាក់បៀវត្សគ្រូបង្រៀនរបៀបហ្នឹង»។
ចំណែកគ្រូបង្រៀននៅអនុវិទ្យាល័យអ្នកលឿង ស្រុកពាមរ ខេត្តព្រៃវែង បានរអ៊ូរទាំចំពោះការយឺតយ៉ាវក្នុងការបើកប្រាក់បៀវត្សខែមករា នេះដែរ។ លោកថា សព្វថ្ងៃនេះមានគ្រូបង្រៀនខ្លះបានជំពាក់បំណុលគេវណ្ឌក និងមានគ្រូបង្រៀនខ្លះបង្ខំចិត្តដើររើសអេតចាយក្រៅម៉ោងធ្វើការ ដើម្បីរកកម្រៃចិញ្ចឹមគ្រួសារ។
ក្រុមគ្រូបង្រៀន៖ «ផលវិបាកប្រាក់ខែតិចហើយបើកយឺត ហើយចាយក្នុងគ្រួសារអត់គ្រប់គ្រាន់។ ខ្ចីគេផង ចងការគេផង ដើម្បីកូនរៀន។ ពិបាកណាស់! គ្រូខ្លះរើសអេតចាយ និងទូលលៀសនៅក្បាលសាឡាងក៏មាន។ សំណូមពរឲ្យបានប្រាក់ខែច្រើន ហើយបើកឲ្យបានទៀតទាត់រាល់ខែ។ គ្រូអត់មានចំណូលអីក្រៅពីប្រាក់ខែទេ ដូច្នេះត្រូវខ្ចីគេចាយឲ្យដល់ខែ។ ដល់បើកមិនទៀតទាត់ បង់លុយឲ្យអង្គការមិនតាមកំណត់របស់គេ អង្គការគេរករឿង»។
វិទ្យុអាស៊ីសេរីមិនទាន់អាចទាក់ទងលោក អ៊ឹម សិទ្ធី រដ្ឋមន្ត្រីក្រសួងអប់រំ ដើម្បីបំភ្លឺជុំវិញប្រាក់បៀវត្សខែមករា ដែលក្រសួងមិនទាន់បើកជូនគ្រូបង្រៀននេះបានទេ។
លោក ភួង សុវណ្ណ ជាប្រធានសមាគមមន្ត្រីរាជការឯករាជ្យកម្ពុជា។ លោកឲ្យដឹងថា សមាគមនេះបានទទួលលិខិតជាច្រើនពីមន្ត្រីរាជការតាមស្ថាប័នរដ្ឋមួយចំនួនមិនទាន់បើកប្រាក់បៀវត្សខែមករា នេះដែរ។
លោកបានស្នើទៅក្រសួងពាក់ព័ន្ធ ពិសេសលោកនាយករដ្ឋមន្ត្រី គួរមានវិធានការជាថ្មីដើម្បីជំរុញឲ្យប្រាក់បៀវត្សមន្ត្រីរាជការបើកឲ្យបានទាន់ពេល៖ «មន្ត្រីរាជការទូទៅប្រាក់ខែតិច បានត្រឹម ២០ម៉ឺន ឬជាងទេ ដល់ពេលធ្វើការដល់ ៥០ ទៅ ៦០ថ្ងៃ គឺគាត់អត់អាចធ្វើការងារបានល្អទេ ហើយគាត់នឹងមានបញ្ហាច្រើនជាងគេ គឺបញ្ហាផ្គត់ផ្គង់គ្រួសារនេះឯង»។
យ៉ាងណាក៏ដោយ ក្រុមគ្រូបង្រៀនបានទទូចស្នើឲ្យលោកនាយករដ្ឋមន្ត្រី ហ៊ុន សែន និងលោករដ្ឋមន្ត្រីក្រសួងអប់រំ ឲ្យពិនិត្យ និងជំរុញឲ្យប្រាក់បៀវត្សគ្រូបង្រៀន ឬមន្ត្រីរាជការតាមស្ថាប័នផ្សេងទៀត ធ្វើយ៉ាងណាបើកឲ្យបានទៀតទាត់។ ព្រោះថា ប្រាក់ខែតិច និងបើកមិនទៀតទាត់នេះ ពួកគាត់គ្មានទឹកចិត្តធ្វើការ ឬបង្រៀនសិស្សនោះទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
អត្ថបទដែលទាក់ទង
ផលប៉ះពាល់ពីការផ្ដល់ដីសម្បទានបង្ខំឲ្យពលរដ្ឋធ្វើចំណាកស្រុក
លោក ហ៊ុន សែន ប្រកាសជាថ្មីទៀតថាមិនឲ្យនរណាម្នាក់ស្លាប់ដោយអត់បាយ
គ្រួសារស្ត្រីស្លាប់បន្ទាប់ពីសម្រាលកូនចោទគ្រូពេទ្យថាមិនយកចិត្តទុកដាក់
ពលរដ្ឋខ្មែរស្វែងរកការងារធ្វើនៅប្រទេសថៃកាន់តែច្រើន
សាលារៀនភាសាចិនរីកដុះដាលនៅកម្ពុជា
សកម្មភាពសមាគមជួយមនុស្សចាស់នៅផ្សារដើមថ្កូវ
យុទ្ធនាការលើកកម្ពស់វិស័យអប់រំ
មតិ
Click here to add your own comment