យុវជនម្នាក់នៅព្រៃវែងរងរបួសធ្ងន់ដោយសារក្រុមក្មេងទំនើងលួចកាប់
ដោយ សុខ សេរី
2009-11-01
យុវជនជាសិស្សសាលាម្នាក់នៅក្នុងឃុំស្ពឺក ស្រុកបាភ្នំ ខេត្តព្រៃវែង បានរងរបួសយ៉ាងធ្ងន់ធ្ងរដោយសារការកាប់ឲ្យផុងលលាដ៍ក្បាលជាច្រើនកាំបិតពីសំណាក់ក្រុមក្មេងទំនើងចំនួន២នាក់ នៅគ្រាដែលយុវជនរូបនោះបានធ្វើដំណើរតែម្នាក់ឯងទៅមើលល្ខោននៅក្នុងភូមិ។
ក្រុមសមត្ថកិច្ចនៅមូលដ្ឋានបានដោះលែងជនសង្ស័យឲ្យទៅកាន់ផ្ទះសម្បែងវិញដោយសារតែគ្មានភស្តុតាងដើម្បីដាក់បន្ទុក។
លោកស្រី អួន ជឹម អាយុ៥០ឆ្នាំ រស់នៅក្នុងភូមិក្រាំង ឃុំស្ពឺក ស្រុកបាភ្នំ ខេត្តព្រៃវែង បានថែ្លងប្រាប់វិទ្យុអាស៊ីសេរីថា កូនប្រុសរបស់លោកស្រីឈ្មោះ អ៊ី សុខា អាយុ១៨ឆ្នាំ រៀនថ្នាក់ទី៩ បានរងរបួសធ្ងន់ធ្ងរដោយសារអំពើហិង្សាព្រួតវាយនិងកាប់ចាក់ពីសំណាក់ក្មេងទំនើងមួយក្រុមមានគ្នាចំនួន២នាក់បានស្ទាក់វាយ កាលពីយប់ថ្ងៃសៅរ៍។
លោកស្រី អួន ជឹម បានឲ្យដឹងថា ៖ «វាចង់ទៅមើលល្ខោននៅវត្តកោះជ្រុំ ដល់ពេលល្ខោនអត់មាន វាបកទៅមើលកន្លែងផ្សារគេនៅស្ពឺខាងលិចហ្នឹង ហើយដល់ពេលត្រឡប់មកវិញទៅ វាស្ទាក់ចាំកាប់តែម្ដង អត់ដឹង ជិះម៉ូតូ២នាក់ ម្នាក់អ្នកបើក ម្នាក់អ្នកកាប់ ហើយកូនចៅខ្ញុំជិះកង់គ្មានដឹងខ្លួនផងហ្នឹង។ ចំដល់លលាដ៍ ឆែបលលាដ៍»។
វេជ្ជបណ្ឌិតម្នាក់នៃគ្លីនិកឯកជនមួយនៅក្នុងខេត្តព្រៃវែងដែលកំពុងតែព្យាបាលជនរងគ្រោះនោះបានថ្លែងថា ជនរងគ្រោះមានសង្ឃឹមរស់តិចតួច ប៉ុន្តែបើសិនជានៅរស់ ក៏រស់នៅក្នុងសភាពមិនប្រក្រតី ៖ «អ្នកជំងឺហ្នឹងដេរបាន១១ថ្នេរ ធ្ងន់ណាស់ កាប់ដល់ឆែបលលាដ៍»។
ទាក់ទងនឹងអំពើហិង្សានៃក្រុមក្មេងទំនើងខាងលើនេះ លោក ផន ភៀង ជាប្រធានប៉ុស្តិ៍នគរបាលរដ្ឋបាលនៅក្នុងឃុំស្ពឺក ស្រុកបាភ្នំ ខេត្តព្រៃវែង ដែលកំពុងតែចាត់ការលើសំណុំរឿងនេះ បានមានប្រសាសន៍ថា លោកបានឃាត់ខ្លួនយុវជនចំនួន២នាក់ដើម្បីសាកសួរក្រោមបទសង្ស័យថាជាក្រុមបង្ករឿង ប៉ុន្តែលោកបានដោះលែងទៅវិញ។
លោក ផន ភៀង បានបញ្ជាក់ថា ៖ «យើងមិនមែនចាប់ឃាត់ខ្លួនទេ យើងគ្រាន់តែហៅសាកសួរបំភ្លឺ។ ករណីនេះមិនមែនករណីបទល្មើសជាក់ស្ដែងទេ ជាបទល្មើសស៊ើបអង្កេត ព្រោះកើតហេតុរយៈពេលប្រហែលជាពីរម៉ោងហើយបានមកប្ដឹងសមត្ថកិច្ចយើង។ យើងសង្ស័យហ្នឹងតាមអ្នកបំភ្លឺថា មានពីរនាក់»។
សុខ សេរី ៖ សាកសួរបានដឹងអ្វីខ្លះហើយ? ផន ភៀង ៖ សាកសួរទៅ វាមិនសារភាពប្រាប់ថា វាប្រព្រឹត្តផងហ្នឹង។ យើងអត់មានភស្តុតាងអីផង។ ស្នាមរបួសយើងដឹងថាកាំបិតហើយ ប៉ុន្តែរកបង្ហាញអ្នកកាប់ហ្នឹង យើងរកអត់ទាន់ឃើញ។
គេបានកត់សម្គាល់ឃើញថា មានអំពើហិង្សាជាច្រើនករណីបានកើតមានទ្បើងនៅតាមភូមិ ឃុំនិងខេត្តមួយចំនួន ជុំវិញការកាប់ចាក់គ្នាបណ្តាលឲ្យរងរបួសធ្ងន់ដោយក្រុមយុវជនឬក្មេងទំនើង នៅពេលដែលមានពិធីបុណ្យនានា រាប់ទាំងបុណ្យភ្ជុំបិណ្ឌ បុណ្យចូលឆ្នាំថ្មីនិងបុណ្យអុំទូកជាដើម។
ករណីអំពើហិង្សានៅទូទាំងប្រទេសកម្ពុជាមិនទាន់មានសេចក្ដីរាយការណ៍បូកសរុបណាមួយត្រូវបានផ្សព្វផ្សាយឲ្យដឹងជាសាធារណៈនោះទេ ប៉ុន្តែកាលពីថៃ្ងទី២៤ ខែមិថុនាកន្លងទៅនេះ ប្រមុខរដ្ឋាភិបាលកម្ពុជា លោក ហ៊ុន សែន បានចេញសារាចរមួយបញ្ជាឲ្យក្រសួងមហាផៃ្ទ, ក្រសួងការពារជាតិ, ក្រសួង អប់រំ យុវជននិងកីទ្បា និងក្រសួងទេសចរណ៍ ព្រមទាំងអាជ្ញាធរពាក់ព័ន្ធនានា គ្រប់គ្រងមុខសញ្ញានិងសកម្មភាពនៃក្មេងទំនើងដែលបង្កការអុកទ្បុករំខានដល់ប្រជាពលរដ្ឋ អសន្តិសុខសង្គមនិងសណ្តាប់ធ្នាប់សាធារណៈ៕
អត្ថបទដែលទាក់ទង
បុរសម្នាក់ត្រូវសមត្ថកិច្ចចាប់ខ្លួនដោយសារទាត់កូនស្រីឲ្យសន្លប់
បុគ្គលិកអង្គការមិត្តគ្មានព្រំដែនអំពាវនាវឲ្យពន្លឿនការស៊ើបអង្កេតករណីឃាតកម្ម
ទាហានម្នាក់រងរបួសធ្ងន់ដោយសារមេបញ្ជាការវាយដំ
ប៉ូលិសម្នាក់នៅមណ្ឌលគិរីរងការចោទថាប៉ុនប៉ងធ្វើឃាតអ្នកភូមិ
ពលរដ្ឋម្នាក់នៅកំពង់ឆ្នាំងត្រូវអ្នកយាមឡូត៍នេសាទបាញ់ឲ្យស្លាប់
អតីតអ្នកកាសែតម្នាក់ត្រូវផ្តន្ទាទោសឲ្យជាប់គុក២ឆ្នាំពីបទផ្សាយព័ត៌មានមិនពិត
បុរសតៃវ៉ាន់ម្នាក់ជាប់គុក៣៧ឆ្នាំពីបទរត់ពន្ធគ្រឿងញៀន
ជនដាណាម៉ាកម្នាក់រងការចោទថាចាប់បង្ខំរួមភេទជាមួយកុមារីខ្មែរ
ក្មេងស្រី១៧នាក់ត្រូវឃាត់ខ្លួនពីបទសង្ស័យថាប្រកបរបរផ្លូវភេទ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
if i were a policemen, i will clear all those matter so easy. those kids like to show off, and they had someone in high reanking family. if you a cop, you should know what to do. first let them show off, then follow them till you got to the their root caused, then arrested them for their violation, but don't jailed them the place where they lived, must be somewhere else that far from their home.
2009-11-05 23:26
This is a Chess game and Hun Sen can't do anything.
2009-11-02 19:54
មើលមតិទាំងអស់.