លោកឧត្តមសេនីយ៍ត្រី ហ៊ុន ហ៊ាន ស្នងការនគរបាលខេត្តបន្ទាយមានជ័យ បានថ្លែងនៅថ្ងៃអង្គារ ទី១៧ ខែវិច្ឆិកា ថា អាជ្ញាធរខេត្តស្រះកែវថៃបានសន្យានឹងដោះលែងប្រជាពលរដ្ឋខ្មែរ៨នាក់ក្នុងចំណោម១២នាក់ដែលពួកគេបានចាប់កាលពីពេលកន្លងទៅថ្មីៗនេះឲ្យភាគីកម្ពុជាវិញ។
លោកឧត្តមសេនីយ៍ត្រី ហ៊ុន ហ៊ាន បានបញ្ជាក់ថា ៖ «ថ្ងៃទី២២ បានគេឲ្យត្រឡប់មកវិញ ប៉ុន្តែក្មេង២នាក់ត្រូវបានគេបានបញ្ជូនទៅមណ្ឌល ដោយសារតែក្មេងនោះមិនគ្រប់អាយុ»។
កាលពីថ្ងៃទី៩ ប្រជាពលរដ្ឋខ្មែរ២នាក់ត្រូវបានសមត្ថកិច្ចថៃចាប់ខ្លួនខណៈដែលឆ្លងដែនខុសច្បាប់ជិះម៉ូតូឌុបក្នុងគោលដៅទៅក្រុងបាងកករកការងារធ្វើ និងនៅថ្ងៃទី១០ ខែវិច្ឆិកា ប្រជាពលរដ្ឋខ្មែរ១០នាក់ទៀតត្រូវចាប់ខ្លួនដូចគ្នាខណៈដែលពួកគេជិះកង់ដឹកអង្ករលក់ក្នុងដីថៃតាមបន្ទាត់ព្រំដែន។
លោក ឌៀប ឈួន អភិបាលរងស្រុកថ្មពួក បានថ្លែងថា ប្រជាពលរដ្ឋខ្មែរទាំង១២នាក់នោះបានឆ្លងដែនតាមច្រកអូរសាយជិតច្រកបឹងត្រកួន ក្នុងឃុំគោករមៀត ស្រុកថ្មពួក លុះចូលដល់ចំណុចមួយក្នុងភូមិថាត់ថៃ ឃុំថាត់ថៃ ស្រុកតាប់ព្រះយ៉ា ខេត្តស្រះកែវ ត្រូវកងទាហានបារ៉ាថៃចាប់ដោយចោទថា ៖ «ឆ្លងដែនខុសច្បាប់ និងគេចោទបងប្អូនយើង២ករណី ទី១ បទឆ្លងដែនខុសច្បាប់ ទី២ ការយកទំនិញទៅលក់អត់បង់គយ»។
លោក ប្រាក់ សាំ ប្រធានប៉ុស្តិ៍នគរបាលច្រកបឹងត្រកួន បានថ្លែងថា សមត្ថកិច្ចខ្មែរបានធ្វើអន្តរាគមន៍រួចហើយជុំវិញករណីខាងលើនេះ ដោយបានស្នើឲ្យថៃធ្វើការដោះលែង។
លោក ប្រាក់ ស្រាំ បានឲ្យដឹងថា ៖ «ខ្ញុំបានធ្វើការសំណូមពរធ្វើយ៉ាងណាឲ្យប្រជាជន១០នាក់ហ្នឹងវិលត្រឡប់មកវិញ»។
លោក អ៊ឹម រិទ្ធ មេភូមិត្រពាំងសំរោង បានថ្លែងថា ប្រជាពលរដ្ឋខ្មែរទាំង១២នាក់ដែលថៃចាប់នោះមាន៧នាក់នៅភូមិត្រពាំងសំរោង ៣នាក់នៅភូមិសាមគ្គី និង២នាក់មិនស្គាល់ឈ្មោះមកពីស្រុកផ្សេងស្នាក់នៅឃុំគោករមៀត ស្រុកថ្មពួក ខេត្តបន្ទាយមានជ័យ។
លោកបន្តថា ប្រជាពលរដ្ឋទាំង១០នាក់ដែលថៃចាប់នោះមានគ្រួសារមួយបានបន្សល់កូនស្រីអាយុ១០ឆ្នាំនៅផ្ទះតែម្នាក់ឯង។
លោក អ៊ឹម រិទ្ធ បានឲ្យដឹងថា ៖ «នៅសល់កូនមួយនៅនឹងផ្ទះ អាណិតដល់ហើយ។ កូនដែលនៅនេះអាយុប្រហែល១០ឆ្នាំ កូនស្រី»។
ប្រជាពលរដ្ឋខ្មែរទាំង១២នាក់ ប្រុស៩នាក់ ស្រី៣នាក់នោះ មានឈ្មោះ ប៉ិត ស៊ីម, ប៊ុន កេសរ, ស៊ុន កំសត់, អួរ ស្រុន, ថន ថាច, សំ ថាន, ស៊ុត សុផល, ហ៊ុយ ឈុនលី និងក្មេងអាយុ១៥ឆ្នាំម្នាក់ ឈ្មោះ លី ប៊ុន លាង និង វីរៈ ចំណែកឯបុរស២នាក់ផ្សេងជាអ្នកស្នាក់នៅក្នុងមូលដ្ឋានបណ្តោះអាសន្នមិនមានអ្នកស្គាល់ឈ្មោះ៕