ពលទាហានខ្មែរមួយរូបកំពុងការពារព្រំដែននៅតំបន់ភ្នំចាក់ច្រែង បាននិយាយដោយមិនបញ្ចេញឈ្មោះ ឲ្យដឹងកាលពីព្រឹកថ្ងៃអាទិត្យថា ទាហានប៉ារ៉ាថៃដែលបានបោះជំរំត្រង់តំបន់ហាមឃាត់មិនឲ្យមានកងទ័ពនោះបានដឹកជញ្ជូនសសរបេតុងជាច្រើនដើម បម្រុងនឹងបោះបង្គោលទាំងនោះនៅជុំវិញជំរំរបស់ពួកគេកាលពី២ថ្ងៃមុននេះ។
ចំណែកនៅតំបន់សម្បុកឃ្មុំដែលជាខ្សែត្រៀមប្រឈមមុខដាក់គ្នារវាងទាហានខ្មែរ-ថៃនៅទល់មុខប្រាសាទព្រះវិហារវិញ ទាហានខ្មែររូបនោះ ឲ្យដឹងកាលពីថ្ងៃច័ន្ទថា បីបួនថ្ងៃមកហើយ ទាហានឈុតខ្មៅថៃបានជញ្ជូនសសរបេតុងនិងថ្មកិនល្អិតៗចូលមកខ្សែត្រៀមជួរមុខ បម្រុងសាងសង់លេណដ្ឋានរឹងមាំ ប៉ុន្តែត្រូវបានកងទាហានខ្មែរហាមឃាត់ ៖ «មុខប្រាសាទយើងក៏វាធ្វើដែរ បេតុងវាចាក់ក្រួស ៤គុណនឹង៤ យកលាយស៊ីម៉ងត៍ចាក់អាហ្នុង។ វាឈប់ធ្វើកង់ឡាន វាធ្វើបេតុងហ្នុងវិញ។ យើងហាមឃាត់តាំងពីល្ងាចម្សិលម្ង៉ៃ»។
មេបញ្ជាការកងពលធំអន្តរាគមន៍លេខ៣ ដែលកំពុងគ្រប់គ្រងកម្លាំងយោធាខ្មែរនៅតំបន់ជម្លោះជិតប្រាសាទព្រះវិហារ គឺលោកឧត្តមសេនីយ៍ទោ ស្រី ឌឹក បានមានប្រសាសន៍កាលពីព្រឹកថ្ងៃច័ន្ទម្សិលមិញថា លោកនៅពុំទាន់បានទទួលព័ត៌មាននេះនៅឡើយទេ ប៉ុន្តែលោកថា ទោះយ៉ាងណាក៏ដោយ ក៏លោកនឹងមិនអនុញ្ញាតឲ្យទាហានថៃដែលបោះជំរំនៅលើតំបន់ជម្លោះនោះធ្វើការសាងសង់លេណដ្ឋានរឹងមាំបែបនោះបានឡើយ លើកលែងតែការសាងសង់នោះត្រូវគេធ្វើជ្រៅទៅក្នុងទឹកដីថៃផុតពីព្រំដែនជាប់ជាមួយខ្មែរ។
លោកឧត្ដមសេនីយ៍ទោ ស្រី ឌឹក ថ្លែងយ៉ាងដូច្នេះ ៖ «អត់ដឹងផង គេអត់ទាន់រាយការណ៍។ យើងពិនិត្យមើលអាណាដីគេជ្រៅ ហ្នឹងឲ្យគេធ្វើទៅ សិទ្ធិរបស់គេ ប៉ុន្តែបើតំបន់ដែលប្រទាញប្រទង់ យើងឃាត់គេហើយ។ គេឃាត់យើង យើងឃាត់គេដូចតែគ្នាហ្នឹង»។
លោករដ្ឋលេខាធិការ ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្រ្តីខ្មែរ ដែលទើបបញ្ចប់ទស្សនកិច្ចពីរថ្ងៃនៅតាមបណ្តោយព្រំដែនជាប់ប្រទេសថៃនៅតំបន់ជម្លោះជិតប្រាសាទព្រះវិហារ បានបញ្ជាក់ថា មានការប៉ុនប៉ងរបស់ថៃនៅតំបន់ខ្លះដូចសេចក្តីរាយការណ៍មែន ៖ «នៅតាមខ្សែត្រៀមតំបន់មុខ មានការប៉ុនប៉ងមែន ក៏ប៉ុន្តែមានការរារាំង។ សម្ភារៈសាងសង់មិនទាន់ឃើញចូលមកដល់ទីតាំងនៅឡើយទេ បន្ទាប់ពីសម្បុកឃ្មុំនៃជើងភ្នំព្រះវិហារ។ បើយើងងាកទៅខាងលិចគេហៅភ្នំទ្រព្យ នៅក្នុងតំបន់ភ្នំទ្រព្យ ខ្ញុំអត់បានចូលមើលទេ ប៉ុន្តែមិនមានសេចក្ដីរាយការណ៍ថាមានការប៉ុនប៉ងធ្វើលេណដ្ឋានទេ។ បន្ទាប់មកគឺកំពូលភ្នំតាទឹម ដែលជាចំណុចយុទ្ធសាស្រ្ដធំមួយ នៅចំកំពូលភ្នំហ្នឹង គឺខ្ពង់រាប ដែលគេអាចធ្វើដំណើរតាមរថយន្តបាន ដែលជាផ្លូវអតីតយោធាខ្មែរក្រហម។ នៅតំបន់នោះគឺកងវិស្វកម្មយោធាថៃ បានឈូសធ្វើថ្នល់សម្រាប់កងទ័ពរបស់ថៃ ហើយជាកន្លែងមួយដែលយើងកំពុងតែជជែកគ្នា រៀបចំទុកឲ្យគណៈកម្មការខណ្ឌសីមាកម្ពុជា-ថៃជាអ្នកចូលវាស់វែង ពីព្រោះនៅលើខ្នងភ្នំហ្នឹងតែម្ដង។ ហើយម្ដុំត្រង់ហ្នឹងគ្រាន់តែគេធ្វើការរាយការណ៍ថា គេបម្រុងយកធ្វើថ្នល់ ក៏ប៉ុន្តែវានៅចំទឹកដីកម្ពុជា ពាក់កណ្ដាលម្នាក់។ ហួសពីហ្នឹងតទៅទៀត គឺភ្នំចាក់ច្រែង គឺមានសេចក្ដីរាយការណ៍មក ភ្នំចាក់ច្រែង គេឃើញសម្ភារៈសម្រាប់សាងសង់ហ្នឹងដែរ ប៉ុន្តែនៅម្ដុំនោះ យោធាកម្ពុជាបានប្រាប់ខ្ញុំថា មានការដឹកជញ្ជូនដូចជាកង់ឡានអីហ្នឹងសម្រាប់ធ្វើប៉ុស្តិ៍ប៉មយាម ឬក៏ប៉ុស្តិ៍ការពារខ្លួន ប៉ុន្តែមិនមានសេចក្ដីរាយការណ៍ថា មានការប៉ុនប៉ងធ្វើលេណដ្ឋានទេ»៕