កាសែតបាងកកប៉ុស្តិ៍រាយការណ៍ពីថ្ងៃសៅរ៍ ទី២១ ខែវិច្ឆិកា ឆ្នាំ២០០៩ ថា អ្នកលេងល្បែងជាច្រើនកំពុងតែនៅឆ្ងាយពីបនល្បែង កាស៊ីណូ នៅកោះកុង និងនៅប៉ោយប៉ែត ក្នុងស្រុកខ្មែរ ខណៈដែលចំនួនអ្នកទេសចរណ៍កាន់តែថយចុះនោះ។
ព័ត៌មានបន្តថា យោងតាមមជ្ឈមណ្ឌលស្រាវជ្រាវ កសិកន គឺការតានតឹងកាន់តែកើនឡើងអាចនាំឲ្យប៉ះពាល់ដល់ពាណិជ្ជកម្ម និងដល់ប្រជាជនដែលរស់នៅតាមព្រំដែននៃប្រទេសទាំងពីរ។
ព័ត៌មានបន្តទៀតថា ទំនាស់រវាងរដ្ឋាភិបាលថៃនិងកម្ពុជាថ្មីៗនេះបានឈានដល់កម្រិតគួរឲ្យបារម្ភ ពេលដែលប្រទេសទាំងពីរកោះហៅឯកអគ្គរាជទូតរៀងៗខ្លួនត្រឡប់ចូលប្រទេសវិញ។ ការកោះហៅនេះធ្វើឡើងបន្ទាប់ពីកម្ពុជាបានតែងតាំងអតីតនាយករដ្ឋមន្ត្រីថៃដែលកំពុងគេចខ្លួន គឺលោក ថាក់ស៊ីន ស៊ីណាវ៉ាត់ ឲ្យធ្វើជាទីប្រឹក្សាផ្នែកសេដ្ឋកិច្ចរបស់រដ្ឋាភិបាលខ្មែរ ហើយកម្ពុជាបដិសេធមិនធ្វើបត្យាប័នបញ្ជូនលោក ថាក់ស៊ីន ទៅឲ្យថៃទេនោះ។
មកទល់ថ្ងៃនេះ ច្រកព្រំដែននៅតែបើកចំហសម្រាប់ការធ្វើពាណិជ្ជកម្មនៅឡើយទេ ហើយពាណិជ្ជកម្មរវាងប្រទេសទាំងពីរប្រមាណ៨០%នៅបន្តដំណើរការជាធម្មតា។
មជ្ឈមណ្ឌលស្រាវជ្រាវ កសិកន បន្តថា ប្រសិនបើទំនាស់នឹងត្រូវបានដោះស្រាយឆាប់ដោយសន្តិវិធីនោះ ពាណិជ្ជកម្មនឹងដំណើរការដោយមិនរអាក់រអួលឡើយ។
ទន្ទឹមនឹងការបារម្ភខាងលើ សេចក្តីរាយការណ៍នានាបានឲ្យដឹងថា ពាណិជ្ជករថៃដែលរកស៊ីនៅស្រុកខ្មែរពុំមានការចាប់អារម្មណ៍រឿងល្អក់កករផ្នែកនយោបាយរវាងក្រុងបាងកកនិងក្រុងភ្នំពេញថ្មីៗនោះឡើយ។
អ្នករកស៊ីជនជាតិថៃជាច្រើនបាននិយាយថា រឿងនយោបាយគឺជារឿងនយោបាយ បញ្ហារកស៊ីគឺជាការរកស៊ី គឺមិនអាចឡូកឡំគ្នាបានឡើយ។
គួររំឭកថា ក្នុងឆ្នាំកន្លងទៅទំនិញថៃចូលកម្ពុជាមានតម្លៃជាង២ពាន់លានដុល្លារ ចំណែកទំនិញកម្ពុជានាំចូលលក់ក្នុងស្រុកថៃវិញមានជាង៩០លានដុល្លារអាមេរិក៕